Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 85: Yesu Wakababikira mu Ciŵaya

Nkhani Nambara 85: Yesu Wakababikira mu Ciŵaya

Kasi bonda uyu ukumumanya? Ni Yesu. Wakababikira mu ciŵaya. Ciŵaya ni malo agho viŵeto vikugona. Mariya wakagoneka Yesu mu cakulyeramo mbunda na viŵeto vinyake. Kweni kasi nchifukwa wuli Mariya na Yosefe ŵakaŵa mu ciŵaya pamoza na viŵeto? Agha ni malo ghakuti mwana wababikiremo yayi, asi nthena?

Enya, ni malo ghawemi yayi. Kweni cifukwa ico ŵakaŵira mu ciŵaya ni ici. Fumu ya ku Roma, Kesare Augusto, likalangura kuti waliyose wakenera kuluta ku msumba uko wakababikira kuti wakalembeske zina lake mu buku. Yosefe wakababikira ku Betelehemu. Kweni iye na Mariya ŵakati ŵafika, ŵakasanga kuti malo gha kugona ghose ghamara. Ntheura kukaŵavya kulikose kwakuti ŵangagona kweni mu ciŵaya mwekha. Ndipo pa zuŵa leneili Mariya wakababa Yesu! Kweni, nga ni umo ukuwonera apa, iyo wali makora.

Yosefe, Mariya, na bonda uyo ni Yesu

Kasi ukuŵawona ŵaliska ŵakwiza kuzakawona Yesu? Ŵakaŵa ku thondo usiku kuliska mberere zawo, ndipo ungweru ukuru ukaŵaŵalira. Wakaŵa mungelo! Ŵaliska ŵakacita wofi comene. Kweni mungelo wakati: ‘Lekani kopa! Niza na makani ghawemi. Muhanya uno, muno mu Betelehemu, Khristu Fumu wababika. Wazamuponoska ŵanthu! Mwamumusanga wavungilizgika na salu mu cakulyeramo viŵeto.’ Mwamabuci mzinda ukuru wa ŵangelo ukiza na kwamba kulumba Ciuta. Mwantheura ŵaliska aŵa ŵakaluta kukapenja Yesu, ndipo ŵakamusanga.

Kasi ukumanya cifukwa ico Yesu waliri wapadera comene? Kasi ukumumanya makora? Kumbukira kuti mu nkhani yakwamba ya buku ili tikayowoyapo za Mwana wakwamba wa Ciuta. Mwana uyu wakateŵetera lumoza na Yehova pakulenga kucanya na caru capasi na vinthu vinyake. Mwana uyu ndiyo Yesu!

Yehova wakatora umoyo wa Mwana wake kufuma kucanya na kuwuŵika mu nthumbo ya Mariya. Ndipo mwana wakamba kukura mu nthumbo mwake nga ni umo ŵana ŵanyake ŵakukulira mu nthumbo za ŵanyinawo. Kweni uyu wakaŵa Mwana wa Ciuta. Paumaliro pake Yesu wakababikira mu ciŵaya ku Betelehemu. Kasi wawona cifukwa ico ŵangelo ŵakaŵira ŵakukondwa kuphalira ŵanthu kuti Yesu wababika?

Luka 2:1-20.



Mafumbo

  • Kasi bonda uyo wali pa cithuzithuzi ici ni njani, ndipo Mariya wakumugoneka mu vici?
  • Cifukwa wuli Yesu wakababikira mu ciŵaya?
  • Pa cithuzithuzi apa, kasi ŵanalume awo ŵakunjira mu ciŵaya mbanjani, ndipo mungelo wakaŵaphalira vici?
  • Cifukwa wuli Yesu ngwapadera?
  • Cifukwa wuli Yesu wakucemeka Mwana wa Ciuta?

Mafumbo ghanyake

  • Ŵazgani Luka 2:1-20.

    Kasi Kesare Augusto wakacita vici kuti ucimi wakuyowoya za kubabika wa Yesu ufiskike? (Luka 2:1-4; Mika 5:2)

    Kasi munthu wangacita wuli kuti waŵe yumoza wa ‘ŵanthu ŵeneawo ŵakuca na’ mtende? (Luka 2:14; Mat. 16:24; Yoh. 17:3; Mil. 3:19; Heb. 11:6)

    Usange ŵaliska ŵakujipepura Ŵaciyuda ŵakaŵa na cifukwa cakuŵira na cimwemwe cifukwa ca kubabika kwa Muponoski, kasi ŵateŵeti ŵa Ciuta mazuŵa ghano ŵali na cimwemwe cikuru wuli? (Luka 2:10, 11; Efe. 3:8, 9; Civ. 11:15; 14:6)