Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 82: Morodekayi na Esitere

Nkhani Nambara 82: Morodekayi na Esitere

Tiye tiwelere kumanyuma pacoko waka pambere Ezira wandalute ku Yerusalemu. Morodekayi na Esitere ŵakaŵa Ŵaisrayeli ŵakuzirwa comene mu ufumu wa Peresiya. Esitere wakaŵa fumukazi, ndipo muvyara wake Morodekayi wakaŵa waciŵiri kwa fumu. Tiye tiwone umo ici cikacitikira.

Ŵapapi ŵa Esitere ŵakafwa apo iye wakaŵa mwana, mwantheura Morodekayi ndiyo wakamulera. Nyumba ya Ahasuweru, fumu ya Peresiya, yikaŵa mu msumba wa Shushani, ndipo Morodekayi wakaŵa yumoza wa ŵateŵeti ŵake. Zuŵa limoza, Vashiti, muwoli wa fumu, wakakana kumupulikira, ntheura fumu yikasankha mwanakazi muphya kuti waŵe fumukazi yake. Kasi ukumanya mwanakazi uyo wakasankha? Wakaŵa Esitere, msungwana wakutowa.

Hamani wakwiya na Morodekayi

Kasi ukumuwona mwanalume wakujikuzga uyu, uyo ŵanthu ŵakumusindamira apa? Zina lake ni Hamani. Wakaŵa munthu wakuzirwa comene mu Peresiya. Hamani wakakhumbanga kuti Morodekayi, uyo wakhala pasi apa nayoso wamusindamirenge. Kweni Morodekayi wakakana kucita ntheura. Wakaghanaghana kuti mbuwemi yayi kusindamira munthu muheni nga ni uyu. Ici cikakwiyiska comene Hamani. Mwantheura ici ndico wakacita.

Hamani wakaphalira fumu mautesi ghakukhwaskana na Ŵaisrayeli. Iye wakati: ‘Mbanthu ŵaheni awo ŵakukana kupulikira malango ghinu. Iwo ŵakwenera kukomeka.’ Ahasuweru wakamanya yayi kuti Esitere, muwoli wake, ni Muisrayeli. Ntheura wakapulikira ivyo Hamani wakayowoya, ndipo wakimika dango lakuti pa zuŵa linyake Ŵaisrayeli wose ŵakomeke.

Morodekayi wakakwiya comene wakati wapulika za dango ili. Wakatumizga uthenga kwa Esitere: ‘Ukwenera kuphalira fumu, ndipo uyilombe kuti yitithaske.’ Dango la Peresiya likakananga kukawonana na fumu kwambura kucemeka. Kweni Esitere wakaluta kwambura kumucema. Fumu yikamulongora na ndodo yake ya golide, ico cikang’anamuranga kuti waleke kukomeka. Esitere wakacemera fumu na Hamani ku ciphikiro. Fumu yikafumba ico Esitere wakakhumbanga kwa iye. Esitere wakaphalira fumu kuti wazamuyiphalira usange iye na Hamani ŵangiza ku ciphikiro cinyake zuŵa lakulondezgapo.

Pa ciphikiro ici, Esitere wakaphalira fumu kuti: ‘Ŵanthu ŵane na ine tikomekenge.’ Fumu yikakwiya comene. Yikafumba kuti: ‘Kasi ni njani uyo wakukhumba kucita cinthu ici?’

‘Mwanalume mulwani ni Hamani muheni uyu!’ Esitere wakayowoya mwantheura.

Fumukazi Esitere yikucombora Hamani

Fumu yikakwiya comene. Yikalangura kuti Hamani wakomeke. Pamanyuma pake, fumu yikimika Morodekayi kuŵa muwusi waciŵiri kwa iye. Morodekayi wakawoneseska kuti paŵe dango liphya lakuzomerezga Ŵaisrayeli kurwa nkhondo kuti ŵajivikilire pa zuŵa ilo ŵakeneranga kukomeka. Cifukwa cakuti pa nyengo iyi Morodekayi wakaŵa munthu wakuzirwa, ŵanthu ŵanandi ŵakawovwira Ŵaisrayeli, ndipo ŵakavikilirika ku ŵalwani ŵawo.

Esther cipaturo 1 mupaka 10.



Mafumbo

  • Kasi Morodekayi na Esitere ŵakaŵa anjani?
  • Cifukwa wuli Fumu Ahasuweru yikakhumbanga mwanakazi muphya, ndipo wakasankha njani?
  • Kasi Hamani wakaŵa njani, ndipo nchivici ico cikamukwiyiska comene?
  • Kasi ni dango wuli ilo likimikika, ndipo Esitere wakacitaci wakati wapulika uthenga wakufuma kwa Morodekayi?
  • Nchivici ico cikacitikira Hamani, ndiposo nchivici ico cikacitikira Morodekayi?
  • Kasi Ŵaisrayeli ŵakapona wuli ku ŵalwani ŵawo?

Mafumbo ghanyake

  • Ŵazgani Esther 2:12-18.

    Ni mwauli umo Esitere wakalongolera kuzirwa kwa “mzimu wakujiyuyura na wakuzika”? (Est. 2:15; 1 Pet. 3:1-5)

  • Ŵazgani Esther 4:1-17.

    Nga ni umo Esitere wakapikira mwaŵi wakukhozgera kusopa kwaunenesko, kasi ise tili na mwaŵi wuli mazuŵa ghano wa kulongora kugomezgeka kwithu kwa Yehova? (Est. 4:13, 14; Mat. 5:14-16; 24:14)

  • Ŵazgani Esther 7:1-6.

    Ni mwauli umo ŵanthu ŵa Ciuta lero ŵakuŵikira umoyo wawo pangozi nga ni umo wakacitira Esitere? (Est. 7:4; Mat. 10:16-22; 1 Pet. 2:12)