Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 81: Kugomezga Wovwiri wa Ciuta

Nkhani Nambara 81: Kugomezga Wovwiri wa Ciuta

Pafupifupi ŵanthu 50,000 ŵakaŵa pa ulendo kufuma ku Babulone kuluta ku Yerusalemu. Kweni ŵakati ŵafika, ŵakasanga kuti Yerusalemu ni mapopa pera. Mukakhalanga munthu waliyose yayi. Ŵaisrayeli ŵakeneranga kuzengaso cilicose.

Cinthu cakwamba ico ŵakazenga ni jochero. Agha ni malo agho ŵakawochelangapo sembe za nyama, panji vyawanangwa, kupeleka kwa Yehova. Myezi yicoko waka pamanyuma pake, Ŵaisrayeli ŵakamba kuzenga tempele. Kweni ŵalwani awo ŵakakhalanga mu vyaru vyapafupi ŵakakhumbanga yayi kuti Ŵaisrayeli ŵazenge tempele. Ntheura ŵakayezga kuŵawofya kuti ŵaleke. Paumaliro pake, ŵalwani aŵa ŵakalomba fumu yiphya ya Ŵaperesi kuti yiŵike dango kulekeska nchito ya kuzenga.

Vilimika vinandi vikajumphapo. Pakajumpha vilimika 17 kufumira apo Ŵaisrayeli ŵakizira kufuma ku Babulone. Yehova wakatuma Hagai na Zekariya, nchimi zake, kuphalira ŵanthu kuti ŵayambeso kuzenga. Ŵanthu ŵakagomezga wovwiri wa Yehova, ndipo ŵakapulikira ivyo nchimi zikayowoya. Ŵakambaso kuzenga, nangauli dango likati ŵaleke.

Kwa cifukwa ici Tatenayi, kazembe wa Peresiya, wakiza na kufumba Ŵaisrayeli uko ŵakapokera mazaza gha kuzenga tempele. Ŵaisrayeli ŵakamuphalira kuti apo ŵakaŵa mu Babulone, Fumu Sayirasi yikaŵaphalira kuti: ‘Lutani, sono, ku Yerusalemu kuti mukazenge tempele la Yehova Ciuta winu.’

Tatenayi wakatuma kalata ku Babulone kufumba usange Sayirasi, uyo pa nyengo iyi wakaŵa kuti wafwa, wakayowoya nadi mazgu agha. Mwambura kucedwa fumu yiphya ya Peresiya yikazgora kalata. Kalata iyi yikayowoya kuti Sayirasi wakayowoya nadi mazgu agha. Ntheura fumu yikalemba kuti: ‘Ŵalekani Ŵaisrayeli ŵazenge tempele la Ciuta wawo. Ndipo nkhumulangurani kuti muŵawovwire.’ Tempele likamara kuzengeka pafupifupi vilimika vinayi, ndipo Ŵaisrayeli ŵakakondwa comene.

Vilimika vinyake vinandi vikajumphapo. Vilimika pafupifupi 48 vikajumphapo kufumira apo tempele likamalira kuzengeka. Ŵanthu mu Yerusalemu ŵakaŵa ŵakavu comene, ntheura msumba na tempele la Ciuta vikawonekanga makora yayi. Ku Babulone, Ezira, Muisrayeli, wakapulika za kukhumbikwa kwa kunozga tempele la Ciuta. Sono kasi ukumanya ico wakacita?

Ezira wakaluta kukakumana na Aritakisasi, fumu ya Peresiya, ndipo fumu yiwemi iyi yikapa Ezira vyawanangwa vinandi kuti walute navyo ku Yerusalemu. Ezira wakalomba Ŵaisrayeli awo ŵakakhalanga mu Babulone kuti ŵamovwire kuyegha vyawanangwa ivi pakuluta ku Yerusalemu. Ŵanthu pafupifupi 6,000 ŵakazomera kuti ŵalutenge. Ŵakaŵa na siliva na golide munandi ndiposo vinthu vinyake vyakuzirwa kuti ŵayeghe.

Ezira wakaŵa wakwenjerwa cifukwa mu nthowa mukaŵa ŵanthu ŵaheni ŵanandi. Ŵanthu aŵa ŵakatenge ŵaŵapokenge siliva na golide wawo, ndiposo kuŵakoma. Ntheura Ezira wakawunganya ŵanthu pamoza, nga ni umo ukuwonera pa cithuzithuzi apa. Ŵakalomba kwa Yehova kuti waŵavikilire pa ulendo wawo utali wakuwelera ku Yerusalemu.

Ezira na ŵanthu ŵakulomba

Yehova wakaŵavikilira nadi. Ndipo pakati pajumpha myezi yinayi, ŵakafika makora ku Yerusalemu. Kasi ici cikulongora yayi kuti Yehova wakuvikilira awo ŵakumugomezga?

Ezra cipaturo 2 mupaka 8.



Mafumbo

  • Kasi ni ŵanthu ŵalinga awo ŵakaŵa pa ulendo kufuma ku Babulone kuluta ku Yerusalemu, kweni ŵakati ŵafika ŵakasanga vici?
  • Kasi Ŵaisrayeli ŵakamba kuzenga vici ŵakati ŵafika waka, ndipo ŵalwani ŵawo ŵacitaci?
  • Kasi Hagai na Zekariya ŵakaŵa anjani, ndipo ŵakaphaliranga vici ŵanthu?
  • Cifukwa wuli Tatenayi wakatuma kalata ku Babulone, ndipo wakapokera zgoro wuli?
  • Kasi Ezira wakacitaci wakati wapulika za kukhumbikwa kwa kunozga tempele la Ciuta?
  • Kasi Ezira wakulomba vici pa cithuzithuzi apa, kasi lurombo lwake lukazgoleka wuli, ndipo ici cikutisambizga vici?

Mafumbo ghanyake

  • Ŵazgani Ezra 3:1-13.

    Usange tikukhala ku cigaŵa ico kulije mpingo wa ŵanthu ŵa Ciuta, kasi tikwenera kulutizga kucitaci? (Ezra 3:3, 6; Mil. 17:16, 17; Heb. 13:15)

  • Ŵazgani Ezra 4:1-7.

    Ni ciyelezgero wuli ico Zerubabele wakalongora cakukhwaskana na kusopa pamoza na visopo ivyo tikupambana cipulikano? (Ex. 34:12; 1 Kor. 15:33; 2 Kor. 6:14-17)

  • Ŵazgani Ezra 5:1-5, 17 na 6:1-22.

    Cifukwa wuli ŵanthu ŵakususka ŵakatondeka kulekeska nchito ya kuzenga tempele? (Ezra 5:5; Yes. 54:17)

    Kasi ivyo ŵakacita ŵanalume ŵalara Ŵaciyuda vikovwira wuli ŵalara Ŵacikhristu kupenja ulongozgi wa Yehova para ŵakususkika? (Ezra 6:14; Sal. 32:8; Rom. 8:31; Yak. 1:5)

  • Ŵazgani Ezra 8:21-23, 28-36.

    Pambere tindambe kucita vinthu ivyo tikukhumba kucita, kasi nchiyelezgero wuli ciwemi ca Ezira ico tikwenera kulondezga? (Ezra 8:23; Sal. 127:1; Zinth. 10:22; Yak. 4:13-15)