Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 80: Ŵanthu ŵa Ciuta Ŵakawerako Ku Babulone

Nkhani Nambara 80: Ŵanthu ŵa Ciuta Ŵakawerako Ku Babulone

Pafupifupi vilimika viŵiri vikajumpha kufumira apo Babulone wakapokeka na Ŵamedi na Ŵaperesiya. Ndipo wona ico cikucitika apa! Ŵaisrayeli ŵakufuma mu Babulone. Kasi ŵakasuturika wuli? Ni njani uyo wakaŵazomerezga kuti ŵalutenge?

Sayirasi, fumu ya Ŵaperesi, ndiyo yikacita ici. Vilimika vinandi pambere Sayirasi wandababike, Yehova wakatuma Yesaya, nchimi yake, kuti yilembe za Sayirasi. Wakati: ‘Ucitenge mwakuyana na vyose ivyo nkhukhumba kuti ucite. Vipata vyamujulika kuti iwe upoke msumba.’ Ndipo Sayirasi wakalongozga nadi pakupoka Babulone. Ŵamedi na Ŵaperesiya ŵakanjira mu msumba usiku kwizira pa vipata ivyo vikalekeka mwazi.

Yesaya, nchimi ya Yehova, yikayowoyaso kuti Sayirasi wazamulangura kuti Yerusalemu na tempele lake vizengekeso. Kasi Sayirasi wakapeleka nadi langulo ili? Enya, wakapeleka. Sayirasi wakaphalira Ŵaisrayeli kuti: ‘Lutani sono ku Yerusalemu kuti mukazenge tempele la Yehova, Ciuta winu.’ Ici ndico cifukwa cake Ŵaisrayeli aŵa ŵali pa ulendo kuti ŵakazenge tempele.

Ŵaisrayeli ŵakufuma mu Babulone

Kweni Mbaisrayeli wose cara mu Babulone awo ŵakafiska kwenda ulendo utali uwu kuwelera ku Yerusalemu. Ukaŵa ulendo utali wa makilomita pafupifupi 800 ndipo ŵanandi ŵakaŵa ŵacekuru panji ŵalwari comene mwakuti ŵangakwaniska yayi kwenda ulendo utali. Paliso vifukwa vinyake ivyo ŵanthu ŵanyake ŵakatondekera kuwera. Kweni Sayirasi wakaphalira awo ŵakatondeka kuwera kuti ‘Ŵapeleke siliva na golide na vyawanangwa vinyake ku ŵanthu awo ŵakuwelera kukazenga Yerusalemu na tempele lake.’

Mwantheura, vyawanangwa vinandi vikapelekeka ku Ŵaisrayeli awo ŵakaluta ku Yerusalemu. Sayirasi wakaŵapaso mbale na makapu ivyo Fumu Nebukadinezara yikatora mu tempele la Yehova apo yikabwangandulanga Yerusalemu. Ŵanthu ŵakaŵa na vinthu vinandi vyakuti ŵayeghe pakuwera.

Pakati pajumpha pafupifupi myezi yinayi, Ŵaisrayeli ŵakafika ku Yerusalemu. Pakajumpha vilimika 70 kufumira apo msumba wa Yerusalemu ukabwangandulikira, ndipo caru cikalekeka kwambura munthu nanga njumoza. Nangauli Ŵaisrayeli pa nyengo iyi ŵakawelera ku caru cawo, kweni ŵakakumana na masuzgo ghanyake nga ni umo tiwonelenge.

Yesaya 44:28; 45:1-4; Ezra 1:1-11.



Mafumbo

  • Nga ni umo tikuwonera pa cithuzithuzi apa, kasi Ŵaisrayeli ŵakucitaci?
  • Kasi Sayirasi wakafiska wuli ucimi wa Yehova uwo wakayowoya kwizira mwa nchimi Yesaya?
  • Kasi Sayirasi wakaŵaphalira vici Ŵaisrayeli awo ŵakatondeka kuwelera ku Yerusalemu?
  • Ni vinthu wuli ivyo Sayirasi wakapa ŵanthu kuti ŵayeghe pa kuwelera ku Yerusalemu?
  • Kasi Ŵaisrayeli ŵakenda kwa nyengo ya utali wuli kuti ŵakafike ku Yerusalemu?
  • Kasi pakajumpha vilimika vilinga kufuma apo caru cikalekeka cambura ŵanthu?

Mafumbo ghanyake

  • Ŵazgani Yesaya 44:28 na 45:1-4.

    Kasi Yehova wakasimikizga wuli kuti ucimi wake wakukhwaskana na Sayirasi ufiskikenge nadi? (Yes. 55:10, 11; Rom. 4:17)

    Kasi ucimi wa Yesaya wakukhwaskana na Sayirasi ukulongora vici za nkhongono za Yehova pa vinthu ivyo vicitikenge munthazi? (Yes. 42:9; 45:21; 46:10, 11; 2 Pet. 1:20)

  • Ŵazgani Ezra 1:1-11.

    Mwakulondezga ciyelezgero ca awo ŵakatondeka kuwelera ku Yerusalemu, kasi ise lero ‘tingakhozga wuli’ awo ŵakukhumba kucita uteŵeti wa nyengo zose? (Ezra 1:4, 6; Rom. 12:13; Kol. 4:12)