Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 77: Ŵakakana Kujikama

Nkhani Nambara 77: Ŵakakana Kujikama

Kasi uli kupulikapo za ŵanyamata ŵatatu aŵa? Mbabwezi ŵa Daniyele awo ŵakakana kurya vyakurya ivyo vikaŵa viwemi yayi kwa iwo. Ŵababulone ŵakaŵathya mazina ghakuti Shadiraki, Misheki na Abedinego. Kweni ŵawona sono. Nchifukwa wuli ŵakuleka kujikamira cikozgo ici nga ni umo waliyose wakucitira? Tiye tiwone cifukwa cake.

Kasi ukughakumbuka Malango Khumi agho Yehova mweneco wakalemba? Dango lakwamba likaŵa lakuti: ‘Ungasopanga ŵaciuta ŵanyake padera pa ine cara.’ Ŵanyamata aŵa ŵakapulikira dango ili, nangauli kucita nthena kukaŵa kupusu yayi.

Nebukadinezara, fumu ya Babulone, wakacema ŵanthu ŵanandi ŵakuzirwa kuti ŵazakacindike cikozgo ico wakimika. Wakaŵa kuti wamara waka kuphalira ŵanthu wose kuti: ‘Para mwapulika kulira kwa mbata, zeze na mitundu yinyake ya vyakwimbira, mukwenera kujikama na kusopa cikozgo ca golide ici. Waliyose uyo wakuleka kujikama na kusopa waponyekenge mu ng’anjo ya moto nyengo yeneyiyo.’

Nebukadinezara wakati wapulika kuti Shadiraki, Misheki na Abedinego ŵakana kujikamira cikozgo, wakakwiya comene. Wakaŵacema kuti ŵize nawo kwa iyo. Wakaŵapa mupata unyake kuti ŵajikamire cikozgo. Kweni ŵanyamata aŵa ŵakagomezga mwa Yehova. Iwo ŵakaphalira Nebukadinezara kuti: ‘Ciuta withu uyo tikumuteŵetera wali na nkhongono kutithaska. Ndipo nanga wangaleka kutithaska, tijikamirenge cara cikozgo cinu ca golide.’

Shadiraki, Misheki, na Abedinego

Wakati wapulika mazgu agha, apo ndipo Nebukadinezara wakakwiya comene. Pakaŵa ng’anjo ya moto pafupi ndipo wakalangura kuti: ‘Sonkhani ng’anjo kankhondi na kaŵiri kuluska pakwamba!’ Pamanyuma pake wakatuma ŵanalume ŵankhongono mu ŵasilikari ŵake kuti ŵakake Shadiraki, Misheki na Abedinego na kuŵaponya mu ng’anjo. Ng’anjo yikawocha comene mwakuti ŵanalume ŵankhongono ŵakafwa na dimi la moto. Kweni wuli pakuyowoya za ŵanyamata ŵatatu awo ŵakaŵaponyamo?

Fumu yikalaŵiska mu ng’anjo ndipo yikacita wofi comene. Yikafumba kuti: ‘Asi tanguponyamo ŵanalume ŵatatu ŵakukakika mu ng’anjo ya moto?’

‘Enya, tanguponyamo ŵatatu,’ ŵateŵeti ŵake ŵakazgora ntheura.

‘Kweni ine nkhuwona ŵanalume ŵanayi ŵakwenda mu moto,’ iye wakayowoya ntheura. ‘Mbambura kukakika, ndipo moto ukuŵawocha yayi. Wacinayi wakuwoneka nga ni ciuta.’ Fumu yikasendelera kufupi na muryango wa ng’anjo na kucemerezga kuti: ‘Shadiraki! Misheki! Abedinego! Fumani, imwe ŵateŵeti ŵa Ciuta Wapacanya pa Vyose!’

Ŵakati ŵafuma, waliyose wakawona kuti ŵawocheka yayi na moto. Pamanyuma pake fumu yikati: ‘Watumbikike Ciuta wa Shadiraki, Misheki na Abedinego! Watuma mungelo wake na kuŵathaska cifukwa ŵangukana kujikama na kusopa ciuta munyake kweni wawo pera.’

Kasi ici ni ciyelezgero ciwemi yayi ca kugomezgeka kwa Yehova cakuti ticilondezge?

Exodus 20:3; Daniel 3:1-30.



Mafumbo

  • Ni dango wuli ilo Nebukadinezara fumu ya Babulone yikapeleka ku ŵanthu?
  • Cifukwa wuli ŵanyamata ŵatatu awo ŵakaŵa ŵanyake ŵa Daniyele ŵakakana kujikamira cikozgo ca golide?
  • Peneapo Nebukadinezara wakaŵapa mupata unyake wakuti ŵajikamire cikozgo, kasi Ŵahebere ŵatatu ŵakalongora wuli kuti ŵakagomezga Yehova?
  • Kasi Nebukadinezara wakatuma ŵanalume ŵake kuti ŵacite vici na Shadiraki, Misheki na Abedinego?
  • Apo Nebukadinezara wakalaŵiska mu ng’anjo, kasi wakawonamo vici?
  • Cifukwa wuli fumu yikacindika Ciuta wa Shadiraki, Misheki, na Abedinego, ndipo ni ciyelezgero wuli ciwemi ico tikwenera kulondezga?

Mafumbo ghanyake

  • Ŵazgani Daniel 3:1-30.

    Kasi ni ukhaliro wuli uwo ŵanyamata ŵatatu Ŵacihebere ŵakalongora uwo ŵateŵeti wose ŵa Ciuta ŵakwenera kulondezga para ŵakumana na viyezgo vyakukhwaskana na kugomezgeka kwawo kwa Ciuta? (Dan. 3:17, 18; Mat. 10:28; Rom. 14:7, 8)

    Ni sambiro wuli lakuzirwa ilo Yehova Ciuta wakasambizga Nebukadinezara? (Dan. 3:28, 29; 4:34, 35)