Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 74: Mwanalume Wambura Wofi

Nkhani Nambara 74: Mwanalume Wambura Wofi

Wona ŵanthu ŵakuseka mwanalume uyu. Kasi ukumumanya? Ni Yeremiya. Wakaŵa nchimi yakuzirwa comene ya Ciuta.

Ŵanthu ŵakuseka Yeremiya

Fumu Yosiya yikati yayamba waka kuwuskamo vikozgo mu caru, Yehova wakaphalira Yeremiya kuti waŵe nchimi Yake. Ndipouli, Yeremiya wakaghanaghana kuti ni mwana mucoko comene kuŵa nchimi. Kweni Yehova wakamuphalira kuti wamovwirenge.

Yeremiya wakaphalira Ŵaisrayeli kuti ŵaleke kucita vinthu viheni. Iye wakati: ‘Ŵaciuta awo ŵamitundu ŵakusopa mbautesi.’ Kweni Ŵaisrayeli ŵanandi ŵakatemwa kusopa vikozgo m’malo mwa kusopa Yehova Ciuta waunenesko. Apo Yeremiya wakaŵaphaliranga kuti Ciuta waŵalangenge cifukwa ca mauheni ghawo, iwo ŵakamusekanga waka.

Vilimika vinandi vikajumphapo. Yosiya wakafwa, ndipo pati pajumpha myezi yitatu Yehoyakimu mwana wake wakaŵa fumu. Yeremiya wakalutilira kuphalira ŵanthu kuti: ‘Yerusalemu wabwangandukenge usange mukuleka kusintha macitiro ghinu ghaheni.’ Ŵasofi ŵakakora Yeremiya na kucemerezga kuti: ‘Ukwenera kufwa cifukwa ca kuyowoya mazgu agha.’ Ŵakaphalira ŵakaronga ŵa Israyeli kuti: ‘Yeremiya wakwenera kukomeka, cifukwa wayowoyera uheni msumba withu.’

Kasi Yeremiya wakacita vici? Wakacita wofi yayi! Wakaŵaphalira wose kuti: ‘Yehova wakanituma kuti nimuphalirani vinthu ivi. Usange mukuleka kusintha mendero ghinu ghaheni, Yehova wabwangandurenge Yerusalemu. Kweni manyani ici: Usange mwakoma ine, mbwenu mwakoma munthu wambura kwananga.’

Ŵakaronga ŵakamuleka Yeremiya kwambura kumukoma, kweni Ŵaisrayeli ŵakasintha yayi macitiro ghawo ghaheni. Nyengo yikati yalutapo, Nebukadinezara, fumu ya ku Babulone, yikiza na kutimbana na Yerusalemu. Paumaliro pake Nebukadinezara wakazgora Ŵaisrayeli kuŵa ŵateŵeti ŵake. Wakatora Ŵaisrayeli ŵanandi kuluta nawo ku Babulone. Aghanaghanira waka umo kungaŵira usange ŵanthu ŵacilendo ŵangakutora na kuluta nawe ku caru cacilendo!

Yeremiya 1:1-8; 10:1-5; 26:1-16; 2 Mathemba 24:1-17.



Mafumbo

  • Kasi mwanalume uyo wali pa cithuzithuzi ni apa njani?
  • Kasi Yeremiya wakaghanaghanaci za kuŵa nchimi, ndipo Yehova wakamuphalira vici?
  • Ni uthenga wuli uwo Yeremiya wakaphaliranga ŵanthu?
  • Kasi ŵasofi ŵakayezgayezga wuli kumukanizga Yeremiya, kweni iye wakalongora wuli kuti wakaŵavya wofi?
  • Kasi nchivici cikaŵacitikira Ŵaisrayeli cifukwa ca kuleka kusintha mendero ghawo ghaheni?

Mafumbo ghanyake

  • Ŵazgani Yeremiya 1:1-8.

    Mwakuyana na ciyelezgero ca Yeremiya, kasi nchivici ico cikupangiska kuti munthu waŵe wakwenelera kuteŵetera Yehova? (2 Kor. 3:5, 6)

    Kasi ŵawukirano Ŵacikhristu mazuŵa ghano ŵakukhozgeka wuli na ciyelezgero ca Yeremiya? (Muph. 12:1; 1 Tim. 4:12)

  • Ŵazgani Yeremiya 10:1-5.

    Kasi ni ciyelezgero wuli cambura kususkika ico Yeremiya wakayowoya kulongora uheni wakugomezga vikozgo? (Yer. 10:5; Yes. 46:7; Hab. 2:19)

  • Ŵazgani Yeremiya 26:1-16.

    Para ŵakucenjezga ŵanthu mazuŵa ghano, ni mwauli umo Ŵakhristu ŵakuphakazgika na mzimu wa Ciuta ŵakulondezgera ivyo Yehova wakaphalira Yeremiya kuti ‘ŵaleke kusida lizgu nanga ndimoza’? (Yer. 26:2; Dute. 4:2; Mil. 20:27)

    Nchiyelezgero wuli ciwemi ico Yeremiya wakapeleka ku Ŵakaboni ŵa Yehova mazuŵa ghano ca kucenjezga ŵanthu ŵa mitundu? (Yer. 26:8, 12, 14, 15; 2 Tim. 4:1-5)

  • Ŵazgani 2 Mathemba 24:1-17.

    Nchivici ico cikacitikira Yuda cifukwa ca kuleka kugomezgeka kwa Yehova? (2 Mathe. 24:2-4, 14)