Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 72: Ciuta Wakawovwira Fumu Hezekiya

Nkhani Nambara 72: Ciuta Wakawovwira Fumu Hezekiya

Kasi ukumanya cifukwa ico mwanalume uyu wakulombera kwa Yehova? Nchifukwa wuli ico waŵikira makalata agha panthazi pa jochero la Yehova? Mwanalume uyu ni Hezekiya. Wakaŵa fumu ya mafuko ghaŵiri gha kumwera gha Israyeli. Ndipo wakaŵa mu suzgo yikuru. Cifukwa wuli?

Fumu Hezekiya yikulomba

Nchifukwa cakuti ŵasilikari ŵa ku Asiriya ŵakaparanya mafuko 10 gha kumpoto. Yehova wakazomerezga kuti ici cicitike cifukwa ŵanthu aŵa ŵakaŵa ŵaheni comene. Ŵasilikari ŵa ku Asiriya ŵakiza kuti ŵatimbane na ufumu wa mafuko ghaŵiri.

Fumu ya ku Asiriya yikatuma makalata kwa Fumu Hezekiya. Agha ndigho makalata agho Hezekiya waghaŵika panthazi pa Ciuta pa cithuzithuzi apa. Makalata agha ghakayuyura Yehova, na kuphalira Hezekiya kuti wathere. Ici ndico cifukwa cake Hezekiya wakalomba kuti: ‘Mbaya mwe Yehova, tiponoskani kwa fumu ya ku Asiriya. Usange mucitenge ntheura mbwenu mitundu yose yimanyenge kuti imwe mwekha ndimwe Ciuta.’ Kasi Yehova wakapulika ivyo Hezekiya wakalomba?

Hezekiya wakaŵa fumu yiwemi. Wakaŵa nga ni mafumu ghaheni gha ufumu wa kumpoto wa Israyeli yayi, panji nga ni umo ŵakaŵira adada ŵake, Fumu Ahazi cara. Hezekiya wakaŵa wakapulikira mwakupwelelera malango ghose gha Yehova. Mwantheura, Hezekiya wati wamara kulomba, nchimi Yesaya yikamutumira uthenga uwu wakufumira kwa Yehova: ‘Fumu ya Asiriya yinjilenge yayi mu Yerusalemu. Palije nanga njumoza wa ŵasilikari ŵake uyo wizenge kufupi. Ŵaponyengemo muvi nanga ngumoza yayi.’

Awona cithuzithuzi ico cili pa peji lino. Kasi ukuŵamanya ŵasilikari ŵakufwa aŵa? Mbasilikari ŵa ku Asiriya. Yehova wakatuma mungelo wake, ndipo mu usiku umoza mungelo uyu wakakoma ŵasilikari ŵa ku Asiriya 185,000. Ntheura fumu ya Asiriya yikathera na kuwelera kukaya kwake.

Ŵasilikari Ŵaasiriya ŵafwa

Ufumu wa mafuko ghaŵiri ukapona, ndipo ŵanthu ŵakaŵa pa mtende kwa nyengo yicoko waka. Kweni Hezekiya wakati wafwa, Manase mwana wake wakaŵa fumu. Wose ŵaŵiri, Manase na mwana wake Amoni, ghakaŵa mafumu ghaheni comene. Antheura caru cikazulaso na vivulupi na viwawa. Fumu Amoni yikati yakomeka na ŵateŵeti ŵake, mwana wake Yosiya wakimikika kuŵa fumu ya ufumu wa mafuko ghaŵiri.

2 Mathemba 18:1-36; 19:1-37; 21:1-25.



Mafumbo

  • Kasi mwanalume uyo wali pa cithuzithuzi apa ni njani, ndipo nchifukwa wuli wali mu suzgo yikuru?
  • Kasi makalata agho Hezekiya waghaŵika panthazi apa nga vici, ndipo wakulombaci?
  • Kasi Hezekiya ni fumu ya mtundu mbu, ndipo ni uthenga wuli uwo Yehova wakatuma kwizira mwa nchimi Yesaya?
  • Kasi mungelo wa Yehova wakacita nawo vici Ŵasiriya, nga ni umo cithuzithuzi ici cikulongolera?
  • Nangauli ufumu wa mafuko ghaŵiri ukaŵa pa mtende kwa nyengo yicoko waka, kasi nchivici cikacitika apo Hezekiya wakati wafwa?

Mafumbo ghanyake

  • Ŵazgani 2 Mathemba 18:1-36.

    Ni mwauli umo Rabusheke wakacitira kuti watimbanizge cigomezgo ca Ŵaisrayeli? (2 Mathe. 18:19, 21; Ex. 5:2; Sal. 64:3)

    Para ŵakususkika, kasi Ŵakaboni ŵa Yehova wakulondezga wuli ciyelezgero ca Hezekiya? (2 Mathe. 18:36; Sal. 39:1; Zinth. 26:4; 2 Tim. 2:24)

  • Ŵazgani 2 Mathemba 19:1-37.

    Kasi ŵanthu ŵa Yehova mazuŵa ghano ŵakulondezga wuli Hezekiya para ŵali mu suzgo yikuru? (2 Mathe. 19:1, 2; Zinth. 3:5, 6; Heb. 10:24, 25; Yak. 5:14, 15)

    Kasi Fumu Senakeribu yikathereskeka mu nthowa zitatu zini, ndipo yikwimira njani mwakuyana na ucimi? (2 Mathe. 19:32, 35, 37; Civ 20:2, 3)

  • Ŵazgani 2 Mathemba 21:1-6, 16.

    Cifukwa wuli tingayowoya kuti Manase wakaŵa yumoza wa mafumu ghaheni comene agho ghakawusa mu Yerusalemu? (2 Mid. 33:4-6, 9)