Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 71: Ciuta Wakalayizga Paradiso

Nkhani Nambara 71: Ciuta Wakalayizga Paradiso

Ici nchithuzithuzi ca paradiso ico Ciuta wakwenera kuti wakalongora nchimi yake Yesaya. Yesaya wakaŵako pati pajumpha nyengo yicoko waka pamanyuma pa Yona.

Ŵanthu ŵali mu Paradiso

Lizgu lakuti paradiso likung’anamura “munda” panji “paki.” Kasi cithuzithuzi ici cikukukumbuska za cinthu cinyake ico tawonapo kale mu buku ili? Cikukozgana na munda wakutowa uwo Yehova Ciuta wakapeleka kwa Adamu na Heva, kasi ni nthena yayi? Kweni kasi caru cose cizamuŵapo paradiso?

Yehova wakaphalira Yesaya nchimi yake kuti walembe za paradiso muphya uyo wizirenge ŵanthu ŵa Ciuta. Wakati: ‘Mphumphi yizamukukhala pamoza na kanamberere mu mtende. Kana ka ng’ombe na kana ka nkharamu vizamurya pamoza, ndipo mwana mucoko wazamuvipwelelera. Nanga ni mwana kuti wazamulumika yayi usange wazamuseŵera pafupi na njoka yakofya.’

‘Ici cingacitika yayi,’ ŵanandi ŵangayowoya nthena. ‘Caru capasi caŵa na masuzgo nyengo zose, ndipo ghalutilirenge kuŵapo.’ Kweni aghanaghanira ici: Kasi Ciuta wakapa Adamu na Heva malo gha mtundu wuli?

Ciuta wakaŵika Adamu na Heva mu paradiso. Iwo ŵakataya malo ghawo ghakutowa, ŵakacekura na kufwa cifukwa ŵakakana kupulikira Ciuta. Ciuta wakulayizga kuti wazamupeleka ku ŵanthu awo ŵakumutemwa vinthu ivyo Adamu na Heva ŵakataya.

Mu paradiso muphya uyo wakwiza muzamuŵavya cakupweteka cilicose. Muzamuŵa mtende weneco. Ŵanthu wose ŵazamuŵa na umoyo uwemi ndiposo ŵakukondwa. Ukhaliro uzamuŵa nga ni umo Ciuta wakakhumbiranga pakwamba. Kweni tisambirenge za umo Ciuta wazamucitira ici kunthazi.

Yesaya 11:6-9; Civumbuzi 21:3, 4.



Mafumbo

  • Kasi Yesaya wakaŵa njani, wakaŵako pa nyengo mbu, ndipo Yehova wakamulongora vici?
  • Lizgu lakuti “paradiso” likung’anamuraci, ndipo likumukumbuskani vici?
  • Kasi Yehova wakamuphalira Yesaya kuti walembe vici vyakukhwaskana na Paradiso muphya?
  • Cifukwa wuli Adamu na Heva ŵakataya malo ghawo ghakutowa?
  • Kasi Yehova walayizga vici ku ŵanthu awo ŵakumutemwa?

Mafumbo ghanyake

  • Ŵazgani Yesaya 11:6-9.

    Kasi Mazgu gha Ciuta ghakulongosora wuli za mtende uwo uzamuŵapo pakati pa vinyama na ŵanthu mu caru ciphya? (Sal. 148:10, 13; Yes. 65:25; Ezek. 34:25)

    Kasi mazgu gha Yesaya ghakufiskika wuli pa ŵanthu ŵa Yehova mazuŵa ghano? (Rom. 12:2; Efe. 4:23, 24)

    Kasi ni njani uyo wakwenera kuwongeka cifukwa ca kusintha kwa makhaliro ghithu sono ndiposo mu caru ciphya? (Yes. 48:17, 18; Gal. 5:22, 23; Fil. 4:7)

  • Ŵazgani Civumbuzi 21:3, 4.

    Kasi Malemba ghakulongora wuli kuti Ciuta wakukhala na ŵanthu pa caru capasi mwakuyelezgera waka? (Lev. 26:11, 12; 2 Mid. 6:18; Yes. 66:1; Civ 21:2, 3, 22-24)

    Ni masozi na vyakuŵinya wuli ivyo vizamuŵakoso yayi? (Luka 8:49-52; Rom. 8:21, 22; Civ 21:4)