Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 70: Yona na Cisomba Cikuru

Nkhani Nambara 70: Yona na Cisomba Cikuru

Wona munthu uyo wali mu maji. Wali mu suzgo yikuru, asi nthena? Cisomba ici cili pafupi kumumira! Kasi munthu uyu ukumumanya? Zina lake ni Yona. Tiye tiwone umo wakaŵira mu suzgo iyi.

Yona wakaŵa nchimi ya Yehova. Pati pajumpha nyengo yicoko waka nchimi Elisha yati yafwa, Yehova wakaphalira Yona kuti: ‘Luta ku msumba ukuru wa Nineve. Uheni uwo ŵanthu ŵakucita mu msumba uwu ngukuru comene, ndipo nkhukhumba kuti iwe ukaŵaphalire za ici.’

Yona na cisomba cikuru

Kweni Yona wakakhumba yayi kuluta. Ntheura wakakwera boti ilo likalutanga kunyake. Yehova wakondwa yayi na kucimbira uko Yona wakacita. Ntheura Wakapangiska cimphepo cikuru kuputa. Cikaŵa cikuru comene mwakuti boti likakhumba kubira. Awo ŵakendeskanga boti ŵakaŵa na wofi comene, ndipo ŵakalomba wovwiri ku ŵaciuta ŵawo.

Paumaliro Yona wakaŵaphalira kuti: ‘Nkhusopa Yehova, Ciuta uyo wakalenga kucanya na caru capasi. Ndipo nkhucimbira kucita ico Yehova wakanituma kuti nicite.’ Awo ŵakendeskanga boti ŵakafumba kuti: ‘Kasi ticite nawe vici kuti mphepo yileke?’

‘Niponyani mu nyanja, ndipo nyanja yiŵenge bata,’ Yona wakayowoya mwantheura. Awo ŵakendeskanga boti ŵakakhumba yayi kucita ntheura, kweni ŵati ŵawona kuti mphepo yikukulirakulira, ŵakamuponya Yona mu nyanja. Penepapo, mphepo yikaleka kuputa, ndipo nyanja yikaŵaso bata.

Apo Yona wakabira mu maji, cisomba cikuru cikamumira. Kweni wakafwa yayi. Wakakhala mu nthumbo ya cisomba kwa mazuŵa ghatatu. Yona wakaŵa na citima comene cifukwa cakuti wakakana kupulikira Yehova kuluta ku Nineve. Sono, kasi ukumanya ico ŵakacita?

Yona wakalomba wovwiri kwa Yehova. Yehova wakapangiska cisomba cira kuwukura Yona pa mtunda. Pamanyuma pake Yona wakaluta ku Nineve. Kasi ici cikutisambizga yayi kuti nchakuzirwa comene kucita cilicose ico Yehova wayowoya?

Yona cipaturo 1 mupaka 4.



Mafumbo

  • Kasi Yona wakaŵa njani, ndipo Yehova wakamuphalira kuti waciteci?
  • Cifukwa cakuti wakakhumba yayi kuluta uko Yehova wakamutuma, kasi Yona wakacita wuli?
  • Kuti nyanja yiŵe bata, kasi Yona wakaŵaphaliraci awo ŵakendeskanga boti?
  • Nga ni umo mukuwonera pa cithuzithuzi apa, kasi nchivici cikacitika apo Yona wakati wabira mu maji?
  • Kasi wakakhala mu nthumbo ya cisomba kwa utali wuli, ndipo wakacitangamo vici?
  • Cisomba cikati camuwukura pa mtunda, kasi Yona wakaluta nkhu, ndipo tikusambirapo vici?

Mafumbo ghanyake

  • Ŵazgani Yona 1:1-17.

    Kasi Yona wakayiwona wuli nchito iyo wakapika ya kupharazgira ŵanthu ŵa ku Nineve? (Yona 1:2, 3; Zinth. 3:7; Muph. 8:12)

  • Ŵazgani Yona 2:1, 2, 10.

    Ivyo vikamucitikira Yona vikutisimikizgira wuli kuti Yehova wakuzgora malumbo ghithu? (Sal. 22:24; 34:6; 1 Yoh. 5:14)

  • Ŵazgani Yona 3:1-10.

    Kasi fundo yakuti Yehova wakalutilira kugwiliskira nchito Yona nangauli pakwamba wakatondeka kukwaniska uteŵeti wake yikutikhozga wuli? (Sal. 103:14; 1 Pet. 5:10)

    Kasi ukhaliro uwo Yona wakawona ku Nineve ukutisambizga vici para tingeruzgirathu ŵanthu ŵa mu cigaŵa cithu? (Yona 3:6-9; Muph. 11:6; Mil. 13:48)