Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 69: Kasungwana Kakawovwira Mwanalume Wankhongono

Nkhani Nambara 69: Kasungwana Kakawovwira Mwanalume Wankhongono

Kasi ukumanya ivyo kasungwana aka kakuyowoya? Kakuphalira mwanakazi uyu za Elisha, nchimi ya Yehova, na vinthu vyakuziziswa ivyo Yehova wakumovwira kucita. Mwanakazi uyu wakumumanya yayi Yehova cifukwa ni Muisrayeli cara. Ipo tiye tiwone cifukwa ico kasungwana aka kakusangikira mu nyumba ya mwanakazi uyu.

Mwanakazi uyu ni Musiriya. Mfumu wake ni Namani, mulara wa ŵasilikari ŵaku Siriya. Ŵasilikari ŵaku Siriya ŵakakora kasungwana ka Ciisrayeli aka ku nkhondo, ndipo ŵakiza nako kwa muwoli wa Namani kuti kaŵe muteŵeti wake.

Muwoli wa Nanami na mteŵetikazi wake

Namani wakaŵa na nthenda yiheni ya vyoni. Nthenda iyi yingapangiska munofu wa munthu kunyeka. Kasungwana aka kakaphalira muwoli wa Namani kuti: ‘Usange Sekuru wane wangaluta kwa nchimi ya Yehova ku Israyeli, mbwenu yamumucizga vyoni vyake.’ Nyengo yikati yajumphapo mfumu wa mwanakazi yula wakaphalirika mazgu agha.

Namani wakakhumba comene kuti wacire; ntheura wakaghanaghana za kuluta ku Israyeli. Wakati wafika ku Israyeli, wakaluta ku nyumba ya Elisha. Elisha wakatuma muteŵeti wake kuti waphalire Namani kuti wakageze kankhondi na kaŵiri mu Mronga wa Yorodani. Ici cikakwiyiska comene Namani, ndipo wakati: ‘Mironga ya kukaya njiwemi kuluska mironga yose ya mu Israyeli!’ Wati wayowoya mazgu agha, Namani wakazgoka na kuwelera.

Kweni yumoza wa ŵateŵeti ŵake wakamuphalira kuti: ‘Sekuru wane, usange Elisha wamuphaliraninge kuti mucite cinthu cinyake cakusuzga, mwatenge mucitenge. Sono kasi mwalekeraci kukageza waka nga ni umo wayowoyera?’ Namani wakapulikira muteŵeti wake ndipo wakaluta na kubira mu Mronga wa Yorodani kankhondi na kaŵiri. Wati wacita ntheura, thupi lake likaŵa liwemi na la nkhongono!

Namani wakakondwa comene. Wakawelera kwa Elisha na kumuphalira kuti: ‘Sono namanya kuti Ciuta wa Ŵaisrayeli ndiyo yekha Ciuta waunenesko pa caru cose capasi. Ntheura, naŵeya, pokelani cawanangwa ici.’ Kweni Elisha wakazgora kuti: ‘Yayi, nipokenge cara.’ Elisha wakamanya kuti mbuheni kupoka cawanangwa, cifukwa ni Yehova uyo wakacizga Namani. Kweni Gehazi, muteŵeti wa Elisha, wakakhumba kuti cawanangwa cira ciŵe cake.

Antheura ici ndico Gehazi wakacita. Namani wati waluta, Gehazi wakacimbira pamanyuma pake na kumulondezga. ‘Elisha wanituma kuti nimuphalirani kuti mumupeko cawanangwa cicoko waka cifukwa ca ŵalendo awo ŵiza kuzakamucezgera,’ Gehazi wakayowoya mwantheura. Uwu ukaŵa utesi wa zanimuwone. Kweni Namani wakamanya yayi kuti mbutesi; wakapeleka vinyake mwa vinthu ivyo wakaŵa navyo kwa Gehazi.

Gehazi wati wawelera ku nyumba, Elisha wakamanya ivyo wacita. Yehova wakamuphalira. Mwantheura wakati: ‘Cifukwa cakuti wacita cinthu ciheni ici, vyoni vya Namani vizenge kwa iwe.’ Ndipo nyengo yeneiyo vikiza nadi!

Kasi tingatorapo sambiro wuli pa cakucitika ici? Cakwamba, tikwenera kuŵa nga nkhasungwana kara ako kakayowoya za Yehova. Kucita ntheura kungatipa vinthu viwemi vinandi. Caciŵiri, tikwenera cara kuŵa ŵakujikuzga nga ni umo Namani wakaŵira pakwamba, kweni tikwenera kupulikira ŵateŵeti ŵa Ciuta. Ndipo Cacitatu, tikwenera yayi kuyowoya utesi nga ni umo Gehazi wakacitira. Kasi tingasambira vinandi yayi usange tikuŵazga Baibolo?

2 Mathemba 5:1-27.



Mafumbo

  • Pa cithuzithuzi apa, kasi kasungwana kakumuphaliraci mwanakazi uyu?
  • Kasi mwanakazi uyu ni njani, ndipo kasungwana aka kakucitaci mu nyumba ya mwanakazi uyu?
  • Kasi Elisha wakamutuma vici muteŵeti wake kuti wakaphalire Namani, ndipo cifukwa wuli Namani wakakwiya?
  • Nchivici ico cikacitika apo Namani wakapulikira ŵateŵeti ŵake?
  • Cifukwa wuli Elisha wakakana kupokera cawanangwa kufuma kwa Namani, kweni kasi Gehazi wakacitaci?
  • Kasi nchivici ico cikacitikira Gehazi, ndipo tingasambirapo vici?

Mafumbo ghanyake

  • Ŵazgani 2 Mathemba 5:1-27.

    Kasi ciyelezgero ico kasungwana ka Ciisrayeli kakalongora cingakhozga wuli ŵana mazuŵa ghano? (2 Mathe. 5:3; Sal. 8:2; 148:12, 13)

    Cifukwa wuli nchiwemi kukumbukira ciyelezgero ca Namani para tikupika ulongozgi wa m’Malemba? (2 Mathe. 5:15; Heb. 12:5, 6; Yak. 4:6)

    Para tikuyaniska ivyo wakacita Elisha na ivyo wakacita Gehazi, kasi tikusambirapo vici? (2 Mathe. 5:9, 10, 14-16, 20; Mat. 10:8; Mil. 5:1-5)

Manyani Vinandi

Yehova Wakovwirenge Kuti Uleke Kopa

Kasi ntchivichi chingakovwira kuti uleke kopa kuphalira ŵanyako vya Yehova?