Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 67: Yehoshafati Wakagomezga Yehova

Nkhani Nambara 67: Yehoshafati Wakagomezga Yehova

Kasi ŵanalume aŵa ukuŵamanya, ndiposo ivyo ŵakucita? Ŵakuluta ku nkhondo, ndipo ŵanalume awo ŵali panthazi ŵakwimba sumu. Kweni ungafumba kuti: ‘Nchifukwa wuli awo ŵakwimba sumu ŵalije virwero vya nkhondo?’ Tiye tiwone cifukwa cake.

Ŵaisrayeli ŵakuluta ku nkhondo

Yehoshafati wakaŵa fumu ya ufumu wa mafuko ghaŵiri gha Israyeli. Wakaŵako pa nyengo yakuyana waka na Yezebeli na Ahabu, Fumu ya ufumu wa kumpoto wa mafuko 10. Kweni Yehoshafati wakaŵa fumu yiwemi, nga ni umo wakaŵira Asa, awiske. Pa cifukwa ici, ufumu wa kumwera wa mafuko ghaŵiri ukasangwa na umoyo uwemi kwa vilimika vinandi.

Kweni pakacitika cinthu cinyake ico cikapangiska ŵanthu kucita wofi. Mathenga ghakaphalira Yehoshafati kuti: ‘Kukwiza ŵasilikari ŵanandi kufumira ku vyaru vya Moabu, Amoni na Phiri la Seiri kuti ŵatimbane namwe.’ Ŵaisrayeli ŵanandi ŵakawungana mu Yerusalemu kuti ŵalombe wovwiri kwa Yehova. Ŵakaluta ku tempele uko Yehoshafati wakalomba kuti: ‘Mbaya mwe Yehova Ciuta withu, tikumanya yayi ico tingacita. Tilije nkhongono za kutimbirana na ŵasilikari ŵanandi aŵa. Tikuthemba wovwiri winu.’

Yehova wakapulika, ndipo wakatuma yumoza wa ŵateŵeti ŵake kuphalira ŵanthu kuti: ‘Nkhondo njinu cara, nja Ciuta. Mwamukhumbikwira kurwa nkhondo yayi. Mwimilire waka cete na kuwona ciponosko ca Yehova.’

Antheura namulenji Yehoshafati wakaphalira ŵanthu kuti: ‘Gomezgani mwa Yehova!’ Wakaŵika ŵanthu awo ŵakayimbanga sumu panthazi pa ŵasilikari, ndipo peneapo ŵakendanga ŵakimbangaso sumu zakulumba Yehova. Kasi ukumanya ico cikacitika ŵakati ŵafika kufupi ku nkhondo? Yehova wakapangiska ŵalwani ŵawo kutimbana ŵekhaŵekha. Ndipo Ŵaisrayeli ŵati ŵafika, ŵakasanga kuti ŵalwani wose ŵafwa!

Kasi Yehoshafati wakacita cinthu camahara yayi kugomezga mwa Yehova? Ise nase tiŵenge ŵamahara usange timukugomezga.

1 Mathemba 22:41-53; 2 Midauko 20:1-30.


Mafumbo

  • Kasi Yehoshafati wakaŵa njani, ndipo wakaŵapo pa nyengo wuli?
  • Cifukwa wuli Ŵaisrayeli ŵanandi ŵakaŵa na wofi, ndipo ŵakacitaci?
  • Kasi Yehova wakazgora wuli lurombo lwa Yehoshafati?
  • Kasi Yehova wakapangiska vici apo ŵakaŵa ŵandambe kutimbana?
  • Umo Yehoshafati wakacitira vinthu, kasi tingasambirapo vici?

Mafumbo ghanyake

  • Ŵazgani 2 Midauko 20:1-30.

    Kasi Yehoshafati wakalongora kuti ŵateŵeti ŵakugomezgeka ŵa Ciuta ŵakwenera kucitaci para wali mu masuzgo? (2 Mid. 20:12; Sal. 25:15; 62:1)

    Cifukwa cakuti Yehova nyengo zose wali na nthowa iyo wakugwiliskira nchito pa kudumbiskana na ŵanthu ŵake, kasi ni nthowa wuli iyo wagwiliskira nchito mazuŵa ghano? (2 Mid. 20:14, 15; Mat. 24:45-47; Yoh. 15:15)

    Apo Ciuta wazamwamba “nkhondo ya zuŵa likuru la Ciuta, Mwenenkhongono Zose,” kasi vinthu vizamuŵa vyakuyana wuli na ivyo vikamucitikira Yehoshafati? (2 Mid. 20:15, 17; 32:8; Civ 16:14, 16)

    Mwakulondezga Ŵalevi, kasi ŵapayiniya na ŵamishonale ŵakovwira wuli nchito ya kupharazga pa caru cose mazuŵa ghano? (2 Mid. 20:19; Rom. 10:13-15; 2 Tim. 4:2)