Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 62: Suzgo mu Nyumba ya Davide

Nkhani Nambara 62: Suzgo mu Nyumba ya Davide

Davide wakati wayamba kuwusa mu Yerusalemu, Yehova wakawovwira ŵasilikari ŵake kutonda nkhondo zinandi. Yehova wakalayizga kupeleka caru ca Kenani ku Ŵaisrayeli. Na wovwiri wa Yehova, caru cose ico Yehova wakalayizga cikaŵa cawo.

Davide wakaŵa fumu yiwemi. Wakatemwa Yehova. Mwantheura, cimoza mwa vinthu vyakwambilira ivyo wakacita wati wapoka Yerusalemu cikaŵa kunyamura likasa la Yehova na kuluta nalo kwenekura. Wakakhumbanga kuzenga tempele kuti ndimo likasa likhalenge.

Davide wakati wacekura, wakapanga ubudi ukuru comene. Iye wakamanyanga kuti mbuheni kutora cinthu camwene. Kweni mise yinyake, apo wakaŵa pa mtenje wa nyumba yake, wakawona mwanakazi wakutowa comene. Zina lake wakaŵa Batisheba, ndipo mfumu wake wakaŵa Uriya, yumoza wa ŵasilikari ŵake.

Davide wakamudokera comene Batisheba mwakuti wakatuma munthu kukamucema na kwiza nayo ku nyumba yake. Mfumu wake wakaŵa ku nkhondo. Davide wakagona nayo ndipo pamanyuma pake wakawona kuti waŵenge na mwana. Davide wakasuzgika comene mu maghanoghano, ntheura wakaphalira Yoabu kuti waŵike Uriya panthazi ku nkhondo kuti wakomeke. Uriya wakati wafwa, Davide wakatora Batisheba.

Yehova wakakwiya comene na ivyo Davide wakacita. Ntheura wakatuma muteŵeti wake Natani kuti wakamuphalire kwananga kwake. Ungamuwona Natani pa cithuzithuzi apa wakuyowoya na Davide. Davide wakaŵa wacitima comene cifukwa ca ivyo wakacita, ntheura Yehova wakamukoma yayi. Kweni Yehova wakati: ‘Cifukwa ca vinthu viheni ivyo wacita, uŵenge na masuzgo ghanandi mu nyumba yako.’ Mwee, nayo ni suzgo iyo Davide wakaŵa nayo!

Natani wakumucenya Davide

Cakwamba, mwana wa Batisheba wakafwa. Pamanyuma pake Amunoni, mwana wakwamba wa Davide, wakacicizga Tamara, mudumbu wake, kuti wagone nayo. Abisalomu, mwana wa Davide, wakakwiya comene na ici mwakuti wakakoma Amunoni. Nyengo yikati yalutapo, Abisalomu wakakopa mitima ya ŵanthu ŵanandi ndipo wakajiŵika kuŵa fumu. Paumaliro, Davide wakatonda nkhondo pa kwimikana na Abisalomu, uyo wakakomeka. Enya, Davide wakaŵa mu masuzgo ghanandi.

Mukati mu vyose ivi, Batisheba wakababa mwana mwanalume zina lake Solomoni. Davide wakati wacekura na kurwara, Adoniya, mwana wake, wakakhumba kujivwarika ufumu. Penepapo Davide wakaphalira Zadoki, musofi, kuti wapungulire mafuta pa mutu wa Solomoni kulongora kuti Solomoni ndiyo wazamuŵa fumu. Pakati pajumpha nyengo yicoko waka Davide wakafwa na vilimika 70. Wakawusa vilimika 40, ndipo pamanyuma pake Solomoni ndiyo wakaŵa fumu ya Israyeli.

2 Samuel 11:1-27; 12:1-18; 1 Mathemba 1:1-48.



Mafumbo

  • Na wovwiri wa Yehova, nchivici cikacitikira caru ca Kenani?
  • Nchivici cikacitika zuŵa linyake apo Davide wakaŵa pa mtenje wa nyumba yake?
  • Nchifukwa wuli Yehova wakakwiya na ivyo Davide wakacita?
  • Pa cithuzithuzi apa, ninjani uyo Yehova wakatuma kuti wamuphalire Davide kwananga kwake, ndipo mwanalume uyu wakayowoya kuti nchivici cimucitikirenge Davide?
  • Ni suzgo wuli iyo Davide wakaŵa nayo?
  • Ninjani wakaŵa fumu apo Davide wakati wafwa?

Mafumbo ghanyake

  • Ŵazgani 2 Samuel 11:1-27.

    Kasi kuŵa wakutangwanika mu uteŵeti wa Yehova kukutivikilira wuli?

    Ni mwauli umo Davide wakanjilira mu kwananga, ndipo ŵateŵeti ŵa Yehova wakutorapo sambiro wuli lero? (2 Sam. 11:2; Mat. 5:27-29; 1 Kor. 10:12; Yak. 1:14, 15)

  • Ŵazgani 2 Samuel 12:1-18.

    Ni sambiro wuli ilo ŵalara ŵa mpingo na ŵapapi ŵakutorapo pa umo Natani wakapelekera ulongozgi kwa Davide? (2 Sam. 12:1-4; Zinth. 12:18; Mat. 13:34)

    Nchifukwa wuli Yehova wakamucitira lusungu Davide? (2 Sam. 12:13; Sal. 32:5; 2 Kor. 7:9, 10)