Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 59: Cifukwa Ico Davide Wakenera Kucimbira

Nkhani Nambara 59: Cifukwa Ico Davide Wakenera Kucimbira

Pamanyuma pakuti Davide wakoma Goliyati, Abinara, mulongozgi wa nkhondo wa Israyeli, wakiza nayo kwa Sauli. Sauli wakakondwa comene na Davide. Wakamuŵika kuŵa mulongozgi wa nkhondo na kumutora kuti wakakhalenge pa nyumba ya fumu.

Nyengo yati yajumphapo, ŵasilikari ŵakati ŵawerako kukatimbana na Ŵafilisiti, ŵanakazi ŵakimba kuti: ‘Sauli wakoma vikwi, kweni Davide wakoma vikwi makhumi ghanandi.’ Ici cikapangiska Sauli kucita sanji, cifukwa Davide wakalumbika comene kuluska iyo. Kweni Yonatani, mwana wa Sauli, wakacita sanji yayi. Wakamutemwa comene Davide, ndipo Davide nayo wakamutemwa comene Yonatani. Antheura ŵanthu ŵaŵiri aŵa ŵakapangana kuti ŵaŵenge paubwezi nyengo zose.

Fumu Sauli yikuponya mkondo

Davide wakamanya comene kulizga zeze ndipo Sauli wakatemwanga sumu izo Davide wakimbanga. Kweni zuŵa linyake sanji za Sauli zikamucitiska kucita cinthu ciheni. Peneapo Davide wakalizganga zeze, Sauli wakatora mkondo na kumuponya nawo, wakati: ‘Ninyekezgerenge Davide ku cimati!’ Kweni Davide wakaŵeka, ndipo mkondo ukagwaza padera. Mukuluta kwa nyengo Sauli wakawindaso Davide na mkondo wake. Mwantheura Davide wakamanya kuti wakwenera kucenjera comene.

Kasi ukukumbuka phangano ilo Sauli wakacita? Wakayowoya kuti wapelekenge mwana wake mwanakazi kwa mwanalume uyo wakomenge Goliyati kuti waŵe muwoli wake. Sauli wakaphalira Davide kuti wangatora Mikala mwana wake, kweni wakwenera dankha kukoma Ŵafilisiti 100. Aghanaghanira waka za nkhani iyi! Mwambura kukayika Sauli wakaghanaghana kuti Ŵafilisiti ŵakomenge Davide. Kweni ŵakatondeka kumukoma, ndipo cifukwa ca ici Sauli wakapeleka mwana wake kwa Davide kuti waŵe muwoli wake.

Zuŵa linyake Sauli wakaphalira Yonatani na ŵateŵeti ŵake wose kuti wakukhumba kukoma Davide. Kweni Yonatani wakaphalira awiske kuti: ‘Mungamukomanga yayi Davide. Walije kumucitirani ciheni cilicose. Kweni cilicose ico wacita caŵa cakovwira comene kwa imwe. Wakaŵika umoyo wake pangozi apo wakakoma Goliyati, ndipo imwe mukati mwawona ici mukakondwa comene.’

Davide wakuŵeka mkondo

Sauli wakapulikira mwana wake, wakalayizga kuti wamukomenge yayi Davide. Davide wakizaso, ndipo wakayambaso kuteŵetera mu nyumba ya Sauli nga mphakwamba. Ndipouli, zuŵa linyake peneapo Davide wakayimbanga sumu, Sauli wakamuponyaso na mkondo wake. Davide wakaŵeka, mkondo ukagwaza cimati. Aka kakaŵa kacitatu! Davide wakamanya kuti wakwenera kucimbira!

Usiku wenewuwo Davide wakaluta ku nyumba kwake. Kweni Sauli wakatuma ŵanalume ŵanyake kuti ŵakamukome. Mikala wakamanya ivyo ŵawiske ŵakakhumbanga kucita. Antheura wakaphalira mfumu wake kuti: ‘Usange mukuleka kucimbira usiku wuno, namacero mufwenge.’ Usiku wenewura Mikala wakawovwira Davide kucimbira mwakufumira pa windo. Davide wakeneranga kubisama mu malo ghakupambanapambana kwa vilimika vinkhondi na viŵiri kuti Sauli waleke kumusanga.

1 Samuel 18:1-30; 19:1-18.



Mafumbo

  • Nchifukwa wuli Sauli wakacitira sanji Davide, ni mphambano wuli iyo yikaŵapo pakati pa Sauli na Yonatani?
  • Nchivici cikacitika zuŵa linyake apo Davide wakimbiranga sumu Sauli?
  • Kasi Sauli wakaphalira Davide kuti wacite vici pambere wandatore Mikala kuŵa muwoli wake, ndipo nchifukwa wuli Sauli wakayowoya nthena?
  • Apo Davide wakimbiranga sumu Sauli, nchivici cikacitika kacitatu nga ni umo cikulongolera cithuzithuzi?
  • Kasi Mikala wakaponoska wuli Davide, ndipo Davide wakeneranga kucitaci kwa vilimika vinkhondi na viŵiri?

Mafumbo ghanyake

  • Ŵazgani 1 Samuel 18:1-30.

    Ni mwauli umo citemwa ca dyaka apa nidyakepo ca Yonatani na Davide cikayimiranga citemwa capakati pa “mberere zinyake” na “kamskambo kacoko”? (1 Sam. 18:1; Yoh. 10:16; Luka 12:32; Zek. 8:23)

    Pakuti Yonatani ndiyo wakeneranga kuŵa fumu kunjira mu malo gha Sauli, ni mwauli umo lemba la 1 Samuel 18:4 likulongolera kujilambika kwa Yonatani kwa uyo wakasankhika kuŵa fumu?

    Kasi ivyo wakacita Sauli vikulongora wuli kuti sanji yingapangiska munthu kucita kwananga kukuru, ndipo ise tikutorapo sambiro wuli? (1 Sam. 18:7-9, 25; Yak. 3:14-16)

  • Ŵazgani 1 Samuel 19:1-17.

    Kasi Yonatani wakaŵika wuli umoyo wake pangozi wakati wakumana na Sauli? (1 Sam. 19:1, 4-6; Zinth. 16:14)