Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 75: Ŵasepuka Ŵanayi Awo Ŵakaŵa mu Babulone

Nkhani Nambara 75: Ŵasepuka Ŵanayi Awo Ŵakaŵa mu Babulone

Fumu Nebukadinezara yikatora Ŵaisrayeli wose ŵa masambiro ghapacanya kuluta nawo ku Babulone. Pamanyuma pake fumu yikasankhamo ŵasepuka ŵakutowa comene na ŵamahara. Ŵanayi mwa ŵasepuka aŵa ni awo ukuŵawona apa. Yumoza wa iwo ni Daniyele, ndipo ŵanyake ŵatatu awo Ŵababulone ŵakaŵathya Shadiraki, Meshaki na Abedinego.

Nebukadinezara wakakhumba kusambizga ŵasepuka aŵa kuti ŵateŵeterenge mu nyumba yake. Pamanyuma pa vilimika vitatu wakakhumbanga kusanga awo ŵakaŵa ŵamahara comene kuti ŵamovwirenge kumazga masuzgo. Fumu yikakhumba kuti ŵasepuka aŵa ŵaŵe ŵankhongono na ŵambura kulwaralwara peneapo ŵakasambizgikanga. Ntheura yikatuma ŵateŵeti ŵake kuti ŵaŵapenge vyakurya na vinyo ivyo iye na mbumba yake ŵakaryanga na kumwa.

Daniyeli, Shadiraki, Meshaki, na Abedinego ŵakuyowoya ivyo ŵakugomezga

Awona Daniyele muwukirano. Kasi ukumanya ivyo wakuyowoya kwa Ashipenazi, muteŵeti mulara wa Nebukadinezara? Daniyele wakumuphalira kuti wakukhumba yayi kurya vyakurya vyakunona vya fumu. Kweni Ashipenazi wakasuzgika comene mu mtima. Iye wakati: ‘Fumu yasankha ivyo mukwenera kurya na kumwa. Ndipo usange mukuwoneka ŵakughanda kuluska ŵasepuka ŵanyake, mbwenu yinikomenge.’

Cifukwa ca ici Daniyele wakuluta kwa muteŵeti uyo Ashipenazi wakamwimika kuti walaŵilirenge iye na mabwezi ghake ghatatu. ‘Tiyezgani kwa mazuŵa 10,’ iye wakayowoya ntheura. ‘Tipani mphangwe na maji. Pamanyuma pake mupime kawonekero kithu na ka awo ŵakurya vyakurya vya fumu, na kuwona awo ŵakuwoneka makora.’

Muteŵeti uyo wakalaŵiliranga Daniyele na ŵanyake wakazomerezga fundo iyi. Ndipo mazuŵa 10 ghakati ghamara, Daniyele na mabwezi ghake ghatatu ŵakawoneka makora kuluska ŵanyawo wose. Mwantheura wakaŵazomerezga kulutirizga kurya mphangwe m’malo mwa ivyo fumu yikapelekanga.

Paumaliro pa vilimika vitatu ŵasepuka wose ŵakatolekera kwa Nebukadinezara. Wati wayowoya nawo, Nebukadinezara wakawona kuti Daniyele na mabwezi ghake ghatatu ŵakaŵa na mahara comene kuluska ŵanyawo wose. Ntheura wakaŵasunga kuti ŵamovwirenge pa nyumba yake. Ndipo palipose apo fumu yikafumbanga Daniyele, Shadiraki, Meshaki na Abedinego mafumbo panji kuŵaphalira suzgo yikuru, iwo ŵakamanya comene kuluska ŵasofi ŵake wose na ŵanalume ŵamahara.

Daniel 1:1-21.



Mafumbo

  • Kasi ŵasepuka ŵanayi awo ŵali pa cithuzithuzi mbanjani, ndipo cifukwa wuli ŵakusangika ku Babulone?
  • Kasi Nebukadinezara wakukhumba kucita nawo vici ŵasepuka ŵanayi aŵa, ndipo wakaŵatuma vici ŵateŵeti ŵake?
  • Kasi Daniyele wakapemphaci pakukhwaskana na cakurya na vyakumwa vya iyo na ŵanyake ŵatatu?
  • Ŵati ŵarya mphangwe kwa mazuŵa 10, kasi Daniyele na ŵanyake ŵatatu ŵakawonekanga wuli pakuyelezgera na ŵanyamata ŵanyawo?
  • Kasi Daniyele na ŵanyake ŵatatu ŵakasangika wuli mu nyumba ya fumu, ni mwauli umo ŵakaŵira ŵapadera kuluska ŵasofi na ŵanalume ŵamahara?

Mafumbo ghanyake

  • Ŵazgani Daniel 1:1-21.

    Usange tikukhumba kuti titonde viyezgo na kulopwa mu cipulikano, kasi tikwenera kuyezgayezga kucita vici? (Dan. 1:8; Gen. 39:7, 10; Gal. 6:9)

    Kasi ŵawukirano ŵangayezgeka wuli kuti ŵacite vinthu ivyo ŵanji wakuviwona kuŵa vyakusanguluska? (Dan. 1:8; Zinth. 20:1; 2 Kor. 6:17-7:1)

    Kasi nkhani ya Ŵahebere ŵanayi iyo yikusangika mu Baibolo yikutovwira wuli za kugwiliskira nchito mahara gha caru? (Dan. 1:20; Yes. 54:13; 1 Kor. 3:18-20)