Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 61: Davide Wakaŵikika Kuŵa Fumu

Nkhani Nambara 61: Davide Wakaŵikika Kuŵa Fumu

Sauli wakayezgaso kuti wakore Davide. Wakatora ŵasilikari ŵake 3,000 na kuluta kukamupenja. Davide wakati wamanya, wakatuma mphaci kukawona ku msasa uko Sauli na ŵanalume ŵake ŵakagona. Davide wakafumba ŵaŵiri ŵa ŵanalume ŵake kuti: ‘Ninjani uyo walutenge nane ku msasa wa Sauli?’

Davide wakucema Fumu Sauli

‘Nilutenge namwe,’ Abishayi wakazgora. Abishayi wakaŵa mwana wa Zeruya, mudumbu wa Davide. Peneapo Sauli na ŵanalume ŵake ŵakaŵa mu tulo, Davide wakakhwaŵa na kunjira mwacisisi mu msasa wa Sauli. Ŵakatora mkondo na nkhombo ya maji ya Sauli, ivyo vikaŵa ku mutu wake. Palije munthu uyo wakawona panji kupulika pakuti wose ŵakaŵa mu tulo twakufwa nato.

Wona Davide na Abishayi. Ŵacimbira, ndipo ŵali pacanya pa phiri. Davide wakucemerezga kwa mulara wa ŵasilikari kuti: ‘Abinara, nchifukwa uli ukuleka kuvikilira sekuru wako, fumu? Wona! Kasi mkondo na nkhombo yake ya maji vili nkhu?’

Sauli wakawuka. Wakamanya mazgu gha Davide, ntheura wakafumba kuti: ‘Kasi ndiwe Davide?’ Kasi ukumuwona Sauli na Abinara pasi apa?

Davide wakazgora Sauli kuti: ‘Enya, fumu sekuru wane.’ Davide wakafumba kuti: ‘Kasi nchifukwa wuli mukukhumba kunikora? Kasi nanangaci? Mkondo winu uwu fumu. Tumani munthu wazakatore.’

Fumu Sauli na Abinara

Sauli wakazomera kuti: ‘Nananga. Nacita ucindere.’ Davide wakaluta, ndipo Sauli nayo wakawelera kukwake. Davide wakayowoya yekha mu mtima kuti: ‘Zuŵa linyake Sauli wanikomenge. Nkhwenera kucimbilira ku caru ca Ŵafilisiti.’ Ici ndico wakacita nadi. Davide wakapusika Ŵafilisiti na kuŵapangiska kugomezga kuti sono wali ku cigaŵa cawo.

Nyengo yati yalutapo Ŵafilisiti ŵakiza kuzakarwa nkhondo na Israyeli. Sauli na Yonatani wose ŵaŵiri ŵakakomeka ku nkhondo iyi. Ici cikapangiska Davide kuŵa na citima cikuru, ndipo wakalemba sumu yiwemi, iyo wakayimba kuti: ‘Nili na citima comene cifukwa ca iwe munyane Yonatani. Ukaŵa wakutemweka comene kwa ine!’

Pamanyuma pake Davide wakawelera ku msumba wa Heburoni. Pakaŵa nkhondo pakati pa ŵanthu awo ŵakasankha Ishibosheti kuti waŵe fumu na awo ŵakakhumba Davide kuti waŵe fumu. Kweni pa umaliro ŵanalume ŵa Davide ŵakatonda. Davide wakaŵa na vilimika 30 apo wakaŵikika kuŵa fumu. Wakawusa mu Heburoni vilimika vinkhondi na viŵiri. Ŵanyake mwa ŵana awo ŵakababikira mu Heburoni ŵakaŵa Amunoni, Abisalomu na Adoniya.

Nyengo yikakwana yakuti Davide na ŵanalume ŵake ŵapoke msumba wakutowa wa Yerusalemu. Yoabu, mwana munyake wa Zeruya, mudumbu wa Davide, wakalongozga nkhondo iyi. Mwantheura nga ni njombe yake, Davide wakaŵika Yoabu kuŵa mulara wa ŵasilikari ŵake. Davide wakayamba kuwusa mu msumba wa Yerusalemu.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Midauko 11:1-9



Mafumbo

  • Kasi Davide na Abishayi ŵakacitaci apo Sauli wakaŵa mu tulo mu msasa?
  • Kasi Davide wakamufumba vici Sauli?
  • Wakati wamuleka Sauli, kasi Davide wakaluta nkhu?
  • Nchivici cikapangiska Davide kuŵa na citima ndiposo kuti walembe sumu yiwemi comene?
  • Kasi Davide wakaŵa na vilimika vilinga apo wakaŵikika kuŵa fumu mu Heburoni, ndipo mazina gha ŵana ŵake ŵanyake ni ngani?
  • Ni nkhu pamanyuma pake uko Davide wakawusanga nga ni fumu?

Mafumbo ghanyake

  • Ŵazgani 1 Samuel 26:1-25.

    Kasi mazgu gha Davide agho ghali pa 1 Samuel 26:11, ghakulongoraci kuyana na umo Ciuta wakwendeskera vinthu? (Sal. 37:7; Rom. 13:2)

    Para tikukhumba kulongora lusungu ku munthu kweni iyo wakuwonga yayi ivyo tikumucitira, ni mwauli umo mazgu gha Davide agho ghakusangika pa 1 Samuel 26:23 ghakutovwilira kuti tileke kugongowa? (1 Mathe. 8:32; Sal. 18:20)

  • Ŵazgani 2 Samuel 1:26.

    Kasi Ŵakhristu ‘ŵangafwilirapo wuli mu kutemwana kwawo’ nga ni umo Davide na Yonatani ŵakacitira? (1 Pet. 4:8; Kol. 3:14; 1 Yoh. 4:12)

  • Ŵazgani 2 Samuel 5:1-10.

    Kasi Davide wakaŵa fumu kwa vilimika vilinga, ndipo nyengo ya kuwusa kwake yikagaŵika wuli? (2 Sam. 5:4, 5)

    Ninjani uyo wakapangiska Davide kukulirakulira, ndipo ise tikusambirapo vici? (2 Sam. 5:10; 1 Sam. 16:13; 1 Kor. 1:31; Fil. 4:13)

Manyani Vinandi

SAMBIZGANI ŴANA ŴINU?

Davide Wakawopanga Yayi

Ŵazga nkhani yakukondweska iyi mu Baibolo kuti umanye ico cikawovwira Davide kuti waleke kopa.

KASI MU BAIBOLO MULI UTHENGA WULI?

Ŵaisrayeli Ŵakukhumba Themba

Ŵaisrayeli ŵati ŵapempha themba, Yehova wakasankha Sauli kuti waŵe themba lawo. Chifukwa wuli Yehova wakamuleka Sauli na kusora Davide?