Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 51: Rute na Naomi

Nkhani Nambara 51: Rute na Naomi

Mu Baibolo usangengemo buku lakucemeka Ruth (Rute). Lili na nkhani yakukhwaskana na mbumba iyo yikaŵako peneapo Ŵaisrayeli ŵakawusikanga na ŵeruzgi. Rute wakaŵa mwanakazi muwukirano wa caru ca Moabu; wakaŵa yumoza wa Ŵaisrayeli cara. Kweni Rute wati wasambira za Ciuta waunenesko, Yehova, wakamba kumutemwa comene. Naomi wakaŵa mwanakazi mucekuru uyo wakawovwira Rute kumanya Yehova.

Naomi wakaŵa mwanakazi wa Ciisrayeli. Iyo na mfumu wake pamoza na ŵana ŵake ŵanalume ŵaŵiri ŵakasamukira ku caru ca Moabu apo mu Israyeli mukaŵa njara. Zuŵa linyake mfumu wa Naomi wakafwa. Khalekhale, ŵana ŵa Naomi ŵakatora ŵanakazi ŵa ku Moabu mazina ghawo Rute na Oripa. Kweni pati pajumpha vilimika 10, ŵana ŵa Naomi ŵakafwa. Mwee, naco nchitima ico Naomi na ŵakamwana ŵake ŵakaŵa naco! Kasi nchivici ico Naomi wakacita?

Zuŵa linyake Naomi wakaghanaghana za kuwelera kukwake. Rute na Oripa ŵakakhumba kuti ŵakhalenge na iyo, mwantheura nawoso ŵakamba kuluta. Kweni ŵati ŵayendapo mtunda ucoko waka, Naomi ŵakaphalira ŵakamwana ŵake kuti: ‘Welerani ku nyumba ya ŵamama ŵinu.’

Naomi wakaŵafyofyontha na kulayirana nawo. Iwo ŵakamba kulira cifukwa ŵakamutemwa comene Naomi. Ŵakati: ‘Yayi! Tilutenge namwe ku ŵanthu ŵinu.’ Naomi wakazgora kuti: ‘Mukwenera kuwelera mwaŵana ŵane. Mwamukhala makora kukwinu.’ Oripa wakamba kuwelera kuluta kukaya kwake. Kweni Rute wakalutilira kukana.

Naomi wakati kwa iyo: ‘Oripa waluta. Mulondezga munyako.’ Kweni Rute wakazgora kuti: ‘Lekani kunikoserezga kuti nimusidani! Nizomerezgani kuti nilute namwe. Uko mukuya ndiko nilutenge, uko mwamukhala ndiko namukhala. Ŵanthu ŵinu ŵamuŵa ŵanthu ŵane, ndipo Ciuta winu wamuŵa Ciuta wane. Uko mwamufwira nane namufwira kuko na kusungikaso kuko.’ Rute wati wayowoya ntheura, Naomi wakaleka kumukoserezga kuti wawelere kukaya kwake.

Paumaliro ŵanakazi ŵaŵiri aŵa ŵakafika ku Israyeli. Ku Israyeli ŵakasanga malo na kukhala. Wati wafika waka Rute wakayamba kugwira nchito mu minda, cifukwa yikaŵa nyengo ya kuvuna balere. Mwanalume munyake zina lake Boazi, wakamuzomerezga kuvulura balere uyo wakakhalira mu munda wake. Kasi mama wa Boazi ukumumanya? Wakaŵa Rahabi wa mu msumba wa Yeriko.

Zuŵa linyake Boazi wakaphalira Rute kuti: ‘Napulika vyose vyakukhwaskana na iwe, na lusungu ulo ukulongora kwa Naomi. Nkhumanya umo ukasidira ŵawuso na ŵanyoko na caru cako na kwiza kuzakakhala na ŵanthu awo ukuŵamanya yayi. Mphanyi Yehova waŵa nawe!’

Rute wakazgora kuti: ‘Mwanicitira lusungu comene. Mwanisanguruska na mazgu ghinu ghawemi agho mwayowoya kwa ine.’ Boazi wakamutemwa comene Rute, ndipo kwambura kutora nyengo ŵakatorana. Mwee, naco nchimwemwe ico Naomi wakaŵa naco cifukwa ca ici! Kweni Rute na Boazi ŵati ŵababa mwana wawo wakwamba, zina lake Obedi, apo ndipo Naomi wakakondwa comene. Mukuluta kwa nyengo, Obedi wakaŵa sekuru wa Davide, mweneuyo tisambirenge vinandi vya iye kunthazi.

Rute na Naomi

Ruth cipaturo 1 mupaka 4.



Mafumbo

  • Nchivici cikacitika kuti Naomi wasangike mu caru ca Moabu?
  • Kasi Rute na Oripa ŵakaŵa njani?
  • Kasi Rute na Oripa ŵakacita wuli apo Naomi wakaŵaphalira kuti ŵawelere kukwawo?
  • Kasi Boazi wakaŵa njani, ndipo wakawovwira wuli Rute na Naomi?
  • Kasi zina la mwana wa Boazi na Rute likaŵa njani, ndipo nchifukwa wuli tikwenera kumukumbukiranga?

Mafumbo ghanyake

  • Ŵazgani Ruth 1:1-17.

    Ni mazgu wuli agho Rute wakayowoya ghakulongora citemwa cake cikuru? (Ruth 1:16, 17)

    Ni mwauli umo kacitiro ka Rute kakuyanira na “mberere zinyake” kulazga ku ŵakuphakazgika na mzimu utuŵa lero? (Yoh. 10:16; Zek. 8:23)

  • Ŵazgani Ruth 2:1-23.

    Ni mwauli umo Rute wakupelekera ciyelezgero ciwemi ku ŵasungwana lero? (Ruth 2:17, 18; Zinth. 23:22; 31:15)

  • Ŵazgani Ruth 3:5-13.

    Kasi Boazi wakawona wuli kukhumbisiska kwa Rute kuti watorane nayo, m’malo mwa kutengwa ku munyamata?

    Kawonero ka vinthu ka Rute kakutisambizga vici pa nkhani ya citemwa canadi? (Ruth 3:10; 1 Kor. 13:4, 5)

  • Ŵazgani Ruth 4:7-17.

    Ni mwauli umo ŵanalume Ŵacikhristu lero ŵangacitira vinthu nga ni Boazi? (Ruth 4:9, 10; 1 Tim. 3:1, 12, 13; 5:8)