Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 49: Dazi Likayimilira

Nkhani Nambara 49: Dazi Likayimilira

Awona Yoswa. Wakuyowoya kuti: ‘Dazi, yimilira!’ Ndipo dazi likayimilira nadi. Likayimilira pakati pa mtambo zuŵa lose. Yehova ndiyo wakapangiska kuti ici cicitike! Tiye tiwone cifukwa ico Yoswa wakakhumbira dazi kuti lilutilire kuŵala.

Dazi

Mafumu ghaheni ghankhondi gha caru ca Kenani ghakati ghayamba kutimbana na Ŵagibiyoni, Ŵagibiyoni ŵakatuma munthu kuti walute kukalomba wovwiri kwa Yoswa. ‘Zani kuno mwaluŵiro!’ Iyo wayowoya ntheura. ‘Tiponoskani! Mafumu ghose agho ghakukhala mu mapiri ghiza kuti ghatimbane na ŵateŵeti ŵinu.’

Nyengo yeneyiyo Yoswa na ŵanalume wose ŵankhondo ŵakaluta. Ŵakenda usiku wose. Ŵati ŵafika ku Gibiyoni, ŵasilikari ŵa mafumu ghankhondi ŵara ŵakacita wofi na kwamba kucimbira. Yehova wakakhizgira malibwe ghakuru kufuma kucanya, ndipo ŵasilikari ŵanandi ŵakafwa na malibwe kuluska awo ŵakakomeka na ŵanalume ŵankhondo ŵa Yoswa.

Yoswa

Yoswa wakawona kuti kwakhala pacoko waka kuti dazi linjire. Ŵasilikari ŵanandi ŵa mafumu ghaheni ghankhondi ghala nthena ŵakacimbira usange kufipenge. Ndico cifukwa cake Yoswa wakalomba kwa Yehova ndipo wakati: ‘Dazi, yimilira!’ Dazi lati lalutilira kuŵala, Ŵaisrayeli ŵakamalizga kuthereska ŵarwani ŵawo.

Mu Kenani mukaŵa mucali mafumu ghaheni ghanandi agho ghakatinkhanga ŵanthu ŵa Ciuta. Kukamutolera vilimika pafupifupi vinkhondi na cimoza kuti Yoswa na ŵasilikari ŵake ŵamalizge kuthereska mafumu 31 gha mu caru ca Kenani. Ici cati cacitika, Yoswa wakawoneseska kuti caru ca Kenani cagaŵika ku mafuko agho ghakaŵa ghacali kukhumba malo.

Vilimika vinandi vikajumphapo, Yoswa wakafwa na vilimika 110. Apo iyo na mabwezi ghake ŵakaŵa ŵamoyo, ŵanthu ŵakapulikiranga Yehova. Kweni ŵanthu ŵawemi aŵa ŵakati ŵafwa, ŵanthu ŵakamba kucita vinthu viheni na kunjira mu suzgo. Pa nyengo iyi ndipo ŵakakhumba comene wovwiri wa Ciuta.

Joshua 10:6-15; 12:7-24; 14:1-5; Ŵeruzgi 2:8-13.



Mafumbo

  • Pa cithuzithuzi apa, kasi Yoswa wakuyowoya vici, ndipo cifukwa wuli?
  • Ni mwauli umo Yehova wakawovwilira Yoswa na ŵanalume ŵake ŵankhondo?
  • Ni mafumu ghalinga agho Yoswa wakathereska, ndipo kukamutolera nyengo yitali wuli?
  • Nchifukwa wuli Yoswa wakagaŵa caru ca Kenani?
  • Kasi Yoswa wakafwa na vilimika vilinga, ndipo nchivici cikacitikira ŵanthu apo iyo wakati wafwa?

Mafumbo ghanyake

  • Ŵazgani Joshua 10:6-15.

    Pakuti tamanya kuti Yehova wakacitiska zuŵa na mwezi kuyima cifukwa ca Ŵaisrayeli, kasi tili na cigomezgo wuli lero? (Josh. 10:8, 10, 12, 13; Sal. 18:3; Zinth. 18:10)

  • Ŵazgani Joshua 12:7-24.

    Kasi ninjani uyo wakathereska nadi mafumu 31 gha ku Kenani, ndipo nkhani iyi njakuzirwa wuli kwa ise lero? (Josh. 12:7; 24:11-13; Dute. 31:8; Luka 21:9, 25-28)

  • Ŵazgani Joshua 14:1-5.

    Ni mwauli umo caru cikagaŵikira ku mafuko gha Israyeli, ndipo kacitiro aka kakulongora vici pa nkhani ya kuzakakhala mu paradiso? (Josh. 14:2; Yes. 65:21; Ezek. 47:21-23; 1 Kor. 14:33)

  • Ŵazgani Ŵeruzgi 2:8-13.

    Nga ni umo wakacitira Yoswa mu Israyeli, kasi mbanjani awo ŵakukanirathu kusopa kwautesi? (Ŵeru. 2:8, 10, 11; Mat. 24:45-47; 2 Tes. 2:3-6; Tito 1:7-9; Civ 1:1; 2:1, 2)