Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 40: Mozesi Wakatimba Jarawe

Nkhani Nambara 40: Mozesi Wakatimba Jarawe

Vilimika 39 vikajumpha! Ŵaisrayeli ŵakaŵa ŵacali mu mapopa. Kweni mu vilimika vyose ivi Yehova wakapweleleranga ŵanthu ŵake. Wakaŵapanga mana. Namuhanya wakaŵalongozganga na mzati wa bingo, usiku na mzati wa moto. Vyakuvwara vyawo vikaparuka yayi ndiposo malundi ghawo ghakatupa cara.

Ukaŵa mwezi wakwamba wa cilimika ca nambara 40 kufuma apo ŵakafumira mu Egupto. Ŵaisrayeli ŵakafikaso pa Kadeshi. Apa mpha malo agho Mozesi wakatuma mphaci 12 kuluta ku caru ca Kenani, pafupifupi vilimika 40 vikajumphapo. Miriyamu, mudumbu wa Mozesi, wakafwira pa Kadeshi. Ndipo nga ni umo vikaŵira pakwamba, pa Kadeshi pakaŵaso suzgo.

Ŵanthu ŵakaŵavya maji ghakumwa. Ntheura ŵakadandaulira Mozesi kuti: ‘Cikatenge ciŵenge makora usange tifwenge. Kasi ukatifumiskiraci mu caru ca Egupto na kutinjizga mu malo ghaheni agha mwenemumo mulije cakurya cilicose ico cikumera? Mulije mphuzi, nkhuyu, mpheska na zobala. Mulije nanga ni maji ghakumwa.’

Mozesi wakutimba pa libwe

Mozesi na Aroni ŵati ŵaluta ku cihema cakusopelamo kukalomba, Yehova wakaphalira Mozesi kuti: ‘Wunganya ŵanthu pamoza. Ndipo uyowoye ku jarawe pamaso pawo. Jarawe lifumiskenge maji ghakukwanira ŵanthu wose na viŵeto vyawo.’

Mozesi wakawunganya ŵanthu, wakati: ‘Pulikani, imwe mwa ŵanthu ŵambura cipulikano mwa Ciuta! Kasi ine na Aroni timufumyirani maji mu jarawe ili?’ Mozesi wakatimba jarawe kaŵiri na ndodo, ndipo maji ghanandi ghakafuma mu jarawe. Pakaŵa maji ghanandi ghakukwanira ghakuti ŵanthu wose ŵamwe na viŵeto wuwo.

Kweni Yehova wakakwiyira Mozesi na Aroni. Kasi ukumanya cifukwa cake? Cikaŵa cifukwa cakuti Mozesi na Aroni ŵakayowoya kuti ŵafumiskenge maji mu jarawe. Kweni wakaŵa Yehova uyo wakafumiska maji. Cifukwa cakuti Mozesi na Aroni ŵakayowoya unenesko yayi, Yehova wakati waŵalangenge. Iyo wakati: ‘Munjizgenge yayi ŵanthu ŵane mu caru ca Kenani.’

Ŵaisrayeli ŵakafumapo pa Kadeshi. Pakati pajumpha nyengo yicoko waka, ŵakafika pa Phiri la Horu. Aroni wakafwira pacanya pa Phiri la Horu. Wakafwa wali na vilimika 123. Ŵaisrayeli ŵakaŵa na citima comene, ndipo ŵanthu ŵakalilira Aroni kwa mazuŵa 30. Mwana wake, Eliyazara, wakaŵa musofi mukuru wakulondezgapo wa mtundu wa Israyeli.

Maŵazgo 20:1-13, 22-29; Duteronome 29:5.



Mafumbo

  • Ni mwauli umo Yehova wakapwelelera Ŵaisrayeli apo ŵakaŵa mu mapopa?
  • Kasi Ŵaisrayeli ŵakadandawura vici apo ŵakaŵa pa Kadeshi?
  • Ni mwauli umo Yehova wakapelekera maji ku ŵanthu na viŵeto?
  • Ninjani uyo wakujilongora pa cithuzithuzi apa, ndipo nchifukwa wuli wakucita nthena?
  • Nchifukwa wuli Yehova wakakwiyira Mozesi na Aroni, ndipo ŵakapika cilango wuli?
  • Nchivici cikacitika pa Phiri la Horu, ndipo ninjani uyo sono wakaŵa musofi mukuru wa Israyeli?

Mafumbo ghanyake

  • Ŵazgani Maŵazgo 20:1-13, 22-29 na Duteronome 29:5.

    Kasi tikusambirapo vici pa umo Yehova wakapwelelera Ŵaisrayeli mu mapopa? (Dute. 29:5; Mat. 6:31; Heb. 13:5; Yak. 1:17)

    Ni mwauli umo Yehova wakawonera kutondeka kwa Mozesi na Aroni kuti ŵamucindike pamaso pa Ŵaisrayeli? (Maŵa. 20:12; 1 Kor. 10:12; Civ 4:11)

    Ni sambiro wuli ilo tikutorapo pa umo Mozesi wakacitira na cilango ico wakapokera kwa Yehova? (Maŵa. 12:3; 20:12, 27, 28; Dute. 32:4; Heb. 12:7-11)