Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 37: Cihema Cakusopelamo

Nkhani Nambara 37: Cihema Cakusopelamo

Kasi ukuyimanya nyumba iyi? Ici cikaŵa cihema capadera cakusopelamo Yehova. Cikacemekangaso cihema cakukumanamo. Ŵanthu ŵakamara kuzenga cihema ici pakati pajumpha cilimika cimoza ŵati ŵafuma mu Egupto. Kasi ukumumanya uyo wakaŵatuma kuti ŵazenge cihema?

Cihema

Wakaŵa Yehova. Yehova wakaphalira Mozesi apo wakaŵa pacanya pa Phiri la Sinayi umo wakeneranga kuzengera cihema. Wakati cizengeke mwakuti cingayegheka mu vigaŵavigaŵa. Mu nthowa iyi vigaŵa vya cihema vikaŵa vyakuti vingayegheka kuluta navyo pa malo ghanyake. Sono para Ŵaisrayeli ŵakasamukiranga pa malo ghanyake mu mapopa, ŵakayeghanga cihema.

Usange ungawona mukati mu cipinda cicoko ico cili kuumaliro kwa cihema, ungawona bokosi. Bokosi ili likucemeka likasa la phangano. Likaŵa na ŵangelo ŵaŵiri panji ŵakerubi ŵa golide, yumoza uku munyake uku. Ciuta wakalembaso Malango ghanyake 10 pa malibwe ghaŵiri ghakupapatala, cifukwa Mozesi wakaswa malibwe ghakwamba. Malibwe agha ghakasungikanga mu likasa la phangano. Ndiposo, ciŵiya cakuzura na mana cikasungikangaso mwenemumo. Kasi mana ukughakumbuka?

Yehova wakasankha Aroni, mukuru wa Mozesi, kuŵa musofi mukuru. Wakalongozganga ŵanthu pakusopa Yehova. Ŵana ŵake nawoso ŵakaŵa ŵasofi.

Wona cipinda cikuru ca cihema. Nchikuru kuluska kaŵiri cipinda cicoko. Kasi ukuliwona bokosi ilo mukati mwake mukufuma josi? Ili ni jochero apo ŵasofi ŵakawochelangapo sembe ya vyakununkhira. Muliso cakuŵikapo nyali ico cili na nyali zinkhondi na ziŵiri. Cinthu cacitatu ico cili mu cipinda ici ni thebulo. Pa thebulo ili ŵakasungangapo vingwa 12.

Pa luŵaza lwa cihema pali ciŵiya, panji beseni likuru, lakuzura na maji. Nchito yake yikaŵa yakuti ŵasofi ŵagezelengemo mu mawoko na malundi. Paliso jochero likuru. Pa jochero ili ŵakawochelangapo sembe za nyama izo zikapelekekanga kwa Yehova. Cihema cikaŵanga mukati mu msasa, ndipo Ŵaisrayeli ŵakakhalanga mu mahema mwakuzingilizga cihema cakusopelamo.

Exodus 25:8-40; 26:1-37; 27:1-8; 28:1; 30:1-10, 17-21; 34:1, 2; Ŵahebere 9:1-5.



Mafumbo

  • Kasi cithuzithuzi ico cili apa nchivici, ndipo nchito yake yikaŵa vici?
  • Nchifukwa wuli Yehova wakaphalira Mozesi kuti wapange cihema cakuti ciyeyekenge mwambura kusuzga?
  • Kasi bokosi ilo liri mu cipinda cicoko ico cili kuumaliro wa cihema likucemeka vici, ndipo mukati mwake muli vici?
  • Kasi Yehova wakasankha njani kuŵa musofi mukuru, ndipo nchito yake yikaŵa vici?
  • Zunurani vinthu vitatu ivyo vikaŵa mu cipinda cikuru ca mu cihema.
  • Ni vinthu wuli viŵiri ivyo vili mu luŵaza lwa cihema, ndipo nchito yake yikaŵa vici?

Mafumbo ghanyake

  • Ŵazgani Exodus 25:8-40; 26:1-37; 27:1-8; na 28:1.

    Kasi ŵakerubi awo ŵakaŵa pa “likasa la ukaboni” ŵakimilanga vici? (Ex. 25:20, 22; Maŵa. 7:89; 2 Mathe. 19:15)

  • Ŵazgani Exodus 30:1-10, 17-21; 34:1, 2; na Ŵahebere 9:1-5.

    Nchifukwa wuli Yehova wakazirwiska comene dango lakuti ŵasofi awo ŵakateŵeteranga pa cihema ŵakeneranga kugeza, ndipo fundo iyi yikwenera kutikhwaska wuli lero? (Ex. 30:18-21; 40:30, 31; Heb. 10:22)

    Ni mwauli umo mpositole Paulosi wakalongolera kuti cihema na phangano la Dango vikaŵa vyaleka kugwira nchito pa nyengo iyo wakaŵalemberanga kalata Ŵakhristu Ŵacihebere? (Heb. 9:1, 9; 10:1)