Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 36: Tholi la Golide

Nkhani Nambara 36: Tholi la Golide

A! A! Kasi ŵanthu ŵakucita vici apa? Ŵakusopa tholi! Cifukwa wuli ŵakucita nthena?

Mozesi wati wakhalako nyengo yitali ku phiri, ŵanthu ŵakati: ‘Tikumanya yayi ico camucitikira Mozesi. Tiyeni tipange ciuta kuti watilongozge.’

Mozesi wakutaya malibwe ghaŵiri

Aroni, mukulu wa Mozesi, wakati: ‘Mazgu agho mwayowoya ngawemi, vulani mphete za golide mu makutu ghinu, mwize nazo kwa ine.’ Ŵanthu ŵati ŵacita nthena, Aroni wakazisongonora na kupanga tholi la golide. Ŵanthu ŵakati: ‘Uyu ndiyo Ciuta withu uyo wakatifumiska mu Egupto!’ Ŵaisrayeli ŵakacita ciphikiro cikuru na kusopa tholi la golide.

Yehova wakakwiya comene cifukwa ca ici. Wakaphalira Mozesi kuti: ‘Khira luŵiro. Ŵanthu ŵakucita uheni ukuru comene. Ŵaluwa malango ghane ndipo ŵakusopa tholi la golide.’

Ŵanthu ŵakusopa tholi la golide

Mozesi wakakhira mwaluŵiroluŵiro mu phiri. Wati wafika pafupi, ici ndico wakuwona. Ŵanthu ŵakwimba na kuvina uku ŵakuzingilira tholi la golide! Mozesi wakakwiya comene mwakuti wakataya pasi malibwe ghaŵiri ghakupapatala apo pakaŵa malango, ndipo ghakasweka viduswa limbwalimbwa. Wakatora tholi la golide na kulisongonora. Pamanyuma pake wakalisira kuzgoka fuvu.

Ŵanthu ŵakacita cinthu ciheni comene. Mwantheura Mozesi wakaphalira ŵanalume ŵanyake kuti ŵatore malupanga ghawo. Mozesi wakati: ‘Ŵanthu ŵaheni awo ŵasopanga tholi la golide ŵakwenera kufwa.’ Ŵanalume awo ŵakaŵa na malupanga ŵakakoma ŵanthu 3,000! Kasi ici cikutiphalira yayi kuti tikwenera kuwoneseska kuti tikusopa Yehova pera, ŵaciuta ŵautesi cara?

Exodus 32:1-35.



Mafumbo

  • Kasi ŵanthu ŵakucitaci pa cithuzithuzi apa, ndipo cifukwa wuli?
  • Nchifukwa wuli Yehova wakakwiya, ndipo Mozesi wakacitaci apo wakati wawona ico ŵanthu ŵakacitanga?
  • Kasi Mozesi wakaphalira ŵanalume ŵanyake kuti ŵaciteci?
  • Tikusambiramo vici mu nkhani iyi?

Mafumbo ghanyake

  • Ŵazgani Exodus 32:1-35.

    Ni mwauli umo Yehova wakuwonera kusazga cisopo cautesi na caunenesko? (Ex. 32:4-6, 10; 1 Kor. 10:7, 11)

    Kasi Ŵakhristu ŵakwenera kucenjera na vici apo ŵakusankha vyakusanguluska, vya nga ni kwimba na kuvina? (Ex. 32:18, 19; Efe. 5:15, 16; 1 Yoh. 2:15-17)

    Kasi mtundu wa Levi ukalongora ciyelezgero ciwemi wuli pakucita urunji? (Ex. 32:25-28; Sal. 18:25)

Manyani Vinandi

Ŵaisrayeli Ŵakapanga Tholi la Golide

Ŵaisrayeli ŵakapanga tholi. Ŵakatenge tholi ili likwimira Chiuta, kweni kasi Chiuta wakakondwa navyo?