Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 55: Musepuka Mucoko Wakateŵeteranga Ciuta

Nkhani Nambara 55: Musepuka Mucoko Wakateŵeteranga Ciuta

Kasi musepuka uyu ngwakutowa yayi? Zina lake ni Samuyeli. Munthu uyo waŵika woko lake pa mutu wa Samuyeli ni Eli, musofi mukuru wa Ŵaisrayeli. Awo ŵiza nayo kwa Eli ni Elikana, awiske ŵake, na Hana, anyina ŵake.

Samuyeli wakukumana na musofi mukuru Eli

Samuyeli wali na vilimika pafupifupi vinayi panji vinkhondi pera. Kweni wakhalenge pa cihema ca Yehova na Eli pamoza na ŵasofi ŵanyake. Nchifukwa wuli Elikana na Hana ŵakapeleka mwana mucoko nthena kuti wateŵetere Yehova pa cihema cake? Tiye tiwone.

Vilimika vicoko waka kumanyuma, Hana wakaŵa na citima cikuru. Cikaŵa cifukwa cakuti wakaŵavya mwana, ndipo wakakhumbisiska comene kuti waŵe na mwana. Mwantheura zuŵa linyake apo Hana wakaluta ku cihema ca Yehova, wakalomba kuti: ‘A Yehova, lekani kuniruwa! Usange munganipa mwana mwanalume, mbwenu nimupelekenge kwa imwe kuti wamuteŵeteraninge umoyo wake wose.’

Yehova wakazgora lurombo lwa Hana, ndipo pati pajumpha myezi yicoko waka wakababa Samuyeli. Hana wakamutemwa comene mwana wake, wakayamba kumusambizga za Yehova wacali mwana mucoko comene. Wakaphalira mfumu wake kuti: ‘Para Samuyeli waleka waka konkha, nilutenge nayo ku cihema kuti wakateŵeterenge Yehova.’

Ici ndico tikuwona Hana na Elikana ŵakucita pa cithuzithuzi apa. Ndipo cifukwa cakuti Samuyeli wakasambizgika makora na ŵapapi ŵake, wakakondwa kuti wateŵetere Yehova pa cihema cake. Cilimika cilicose Hana na Elikana ŵakizanga kuzakasopa pa cihema capadera ici, na kuzakawona mwana wawo. Cilimika na cilimika Hana wakizanga na munjilira wupya uwo wakasoneranga Samuyeli.

Samuyeli wakalutilira kuteŵetera pa cihema ca Yehova kwa vilimika vinandi, ndipo Yehova na ŵanthu ŵakamutemwa. Kweni ŵana ŵa Eli, Hofini na Finihasi, ŵakaŵa ŵawemi yayi. Ŵakacita vinthu viheni vinandi, ŵakapangiskaso ŵanji kuleka kupulikira Yehova. Eli wakenelanga kuŵalekeska usofi, kweni wakaŵaleka waka.

Vinthu viheni ivyo vikacitikanga pa cihema vikapangiska Samuyeli kuleka kuteŵetera Yehova cara. Cifukwa cakuti mbanthu ŵacoko waka awo ŵakatemwa Yehova na mtima wose, pakajumpha nyengo yitali kufuma apo Yehova wakayowoya na ŵanthu. Samuyeli wati wakulako, cikacitika ni ici:

Samuyeli wakagona mu cihema peneapo wakapulika munthu munyake wakumucema. Iyo wakazgora kuti: ‘Ndine pano.’ Wakawuka na kucimbilira kwa Eli na kuyowoya kuti: ‘Ndine pano, pakuti mwanicema.’

Kweni Eli wakazgora kuti: ‘Nindakucemepo ine; luta kagone.’ Ntheura Samuyeli wakalutaso kukagona.

Wakupulikaso kucema kaciŵiri: ‘Samuyeli!’ Samuyeli wakawuka na kucimbiliraso kwa Eli. Iyo wakati: ‘Ndine pano, pakuti mwanicema.’ Kweni Eli wakazgora kuti: ‘Nindakucemepo mwana wane. Luta, kagoneso.’ Samuyeli wakalutaso kukagona.

‘Samuyeli!,’ lizgu likacemaso kacitatu. Samuyeli wakacimbilira kwa Eli. ‘Ndine, nafika, cifukwa mukwenera kuti mwanicema nadi sono,’ iyo wakayowoya ntheura. Sono Eli wakamanya kuti wakwenera kuŵa Yehova uyo wakamucemanga. Mwantheura wakaphalira Samuyeli kuti: ‘Luta, ukagone, ndipo usange wakukucemaso, uti: “Yowoyani Yehova, pakuti muteŵeti winu wakupulika.” ’

Ici ndico Samuyeli wakayowoya kwa Yehova wati wamucemaso. Yehova wakaphalira Samuyeli kuti walangenge Eli na ŵana ŵake. Mukuluta kwa nyengo Hofini na Finihasi ŵakakomeka ku nkhondo na Ŵafilisiti, ndipo Eli wati wapulika za ico cikacitika wakawa cagada, singo yake yikaphyoka ndipo nayo wakafwa. Mwantheura mazgu gha Yehova ghakafiskika.

Samuyeli wakakura, ndipo wakaŵa mweruzgi waumaliro wa Ŵaisrayeli. Wati wacekura, ŵanthu ŵakamulomba kuti: ‘Tiyimikirani fumu kuti yitiwusenge.’ Samuyeli wakakhumba yayi kucita ici, cifukwa Yehova ndiyo wakaŵa fumu yawo. Kweni Yehova wakamuphalira kuti wapulikire ivyo ŵanthu ŵakayowoya.

1 Samuel 1:1-28; 2:11-36; 4:16-18; 8:4-9.



Mafumbo

  • Kasi zina la musepuka mucoko uyo wali pa cithuzithuzi apa ninjani, ndipo ŵanyake awo mbanjani?
  • Kasi Hana wakalomba vici zuŵa linyake apo wakiza pa cihema ca Yehova, ndipo Yehova wakazgora wuli lurombo lwake?
  • Kasi Samuyeli wakaŵa na vilimika vilinga apo wakayamba kuteŵetera Yehova pa cihema, ndipo anyina ŵakamucitiranga vici cilimika cilicose?
  • Kasi ŵana ŵa Eli mazina ghawo ghakaŵa njani, ndipo ŵakaŵa na nkharo wuli?
  • Ni mwauli umo Yehova wakacemera Samuyeli, ndipo ni uthenga wuli uwo Wakamuphalira?
  • Kasi Samuyeli wakati wakura wakaŵa njani, ndipo nchivici cikacitika apo wakacekura?

Mafumbo ghanyake

  • Ŵazgani 1 Samuel 1:1-28.

    Nkhacitiro wuli kawemi ako Elikana wakupeleka ku mitu ya mbumba pa nkhani ya kusopa? (1 Sam. 1:3, 21; Mat. 6:33; Fil. 1:10)

    Ni sambiro wuli ilo tikutorapo pa kacitiro ka Hana pakulimbana na suzgo ilo likutihangayiska? (1 Sam. 1:10, 11; Sal. 55:22; Rom. 12:12)

  • Ŵazgani 1 Samuel 2:11-36.

    Ni mwauli umo Eli wakacindikira comene ŵana ŵake kuluska Yehova, ndipo ni cenjezgo wuli ilo tikutorapo? (1 Sam. 2:22-24, 27, 29; Dute. 21:18-21; Mat. 10:36, 37)

  • Ŵazgani 1 Samuel 4:16-18.

    Ni mauthenga ghanayi ngani gha soka agho ghakiza kufuma ku nkhondo, ndipo Eli wakacita wuli na mauthenga agha?

  • Ŵazgani 1 Samuel 8:4-9.

    Ni mwauli umo Ŵaisrayeli ŵakamukwiyiskira comene Yehova, ndipo tingakhozgera wuli mwakugomezgeka Ufumu wake lero? (1 Sam. 8:5, 7; Yoh. 17:16; Yak. 4:4)

Manyani Vinandi

Samuyeli Wakalutilira Kucita Viwemi

Kasi ungamuyezga wuli Samuyeli na kulutilira kucita viwemi nangauli ŵanthu ŵanyake ŵangacita viheni?

Samuyeli “Wakalutilira Kukura Pamaso pa Yehova”

Chifukwa wuli ivyo vikachitika pa wanichi wa Samuyeli vikaŵa vyachilendo? Ntchivichi chikamovwira kuti waŵe na chipulikano chakukhora apo wakaŵa pa chihema?