Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 52: Gidiyoni na Ŵanalume Ŵake 300

Nkhani Nambara 52: Gidiyoni na Ŵanalume Ŵake 300

Kasi ukuwona ico cikucitika apa? Wose aŵa mbanalume ŵankhondo ŵa Israyeli. Ŵanalume awo ŵajikama ŵakumwa maji. Gidiyoni ni uyo wimilira pafupi nawo. Wakuwona umo ŵakumwera maji.

Woneseska comene umo ŵanalume aŵa ŵakumwera maji. Ŵanyake ŵajikama ŵakumwa na mlomo. Kweni yumoza wakumwera m’mawoko mwakuti wawonenge ico cikucitika. Ici nchakukhumbikwa, cifukwa Yehova wakaphalira Gidiyoni kuti wasankhe ŵanalume ŵekha awo ŵakuwona ico cikucitika para ŵakumwa maji. Ŵanyake wose, Ciuta wakati ŵakwenera kuwelera ku nyumba. Tiye tiwone cifukwa cake.

Ŵaisrayeli ŵakaŵaso mu suzgo. Cifukwa nchakuti ŵakakana kupulikira Yehova. Ŵanthu ŵa ku Midiyani ŵakaŵawusanga na kuŵasuzga. Ŵaisrayeli ŵakalilira Yehova kuti waŵawovwire, ndipo Yehova wakapulika kulira kwawo.

Yehova wakaphalira Gidiyoni kuti watore ŵasilikari, mwantheura Gidiyoni wakuwunganya pamoza ŵanalume ŵankhondo 32,000. Kweni ŵasilikari awo ŵakiza kwimikana na Ŵaisrayeli ŵakaŵapo 135,000. Ndipouli, Yehova wakaphalira Gidiyoni kuti: ‘Ŵanthu awo uli nawo mbanandi comene.’ Nchifukwa wuli Yehova wakayowoya nthena?

Cifukwa nchakuti usange Ŵaisrayeli ŵatondenge nkhondo, nthena ŵakayamba kughanaghana kuti ŵakatonda cifukwa ca nkhongono zawo. Mphanyi ŵakayamba kughanaghana kuti ŵakakhumbikwiranga wovwiri wa Yehova yayi. Antheura Yehova wakaphalira Gidiyoni kuti: ‘Phalira ŵanalume wose awo ŵali na wofi kuti ŵawelere ku nyumba.’ Gidiyoni wati wacita ici, ŵanalume ŵankhondo 22,000 wakawelera kunyumba. Ici cikung’anamura kuti ŵakhalako 10,000 pera kuti ŵatimbane na ŵasilikari 135,000.

Gidiyoni wakuyezga ŵanalume ŵake

Kweni, tegherezga! Yehova wakati: ‘Ucali na ŵanalume ŵanandi.’ Wakaphalira Gidiyoni kuti walute na ŵanthu kukamwa maji mu mronga uwu na kuwezga waliyose uyo wakumwa maji na mlomo uku wajikama. Yehova wakalayizga kuti: ‘Nipelekenge ŵarwani mu mawoko ghako na ŵanthu 300 awo ŵakawonanga ico cikacitikanga apo ŵakamwanga maji.’

Nyengo ya nkhondo yikakwana. Gidiyoni wakagaŵa ŵanalume ŵake 300 mu magulu ghatatu. Waliyose wakamupa mbata, ciŵiya na toci mukati. Pakati pa usiku, wose ŵakawungana kuzingilira msasa wa ŵarwani ŵawo. Wose pamoza ŵakalizga mbata zawo na kuswa viŵiya vyawo, na kucemerezga: ‘Lupanga lwa Yehova na lwa Gidiyoni!’ Ŵarwani ŵawo ŵati ŵawuka, ŵakatimbanizgika ndiposo ŵakaŵa na wofi. Wose ŵakamba kucimbira, ndipo Ŵaisrayeli ŵakatonda nkhondo.

Ŵeruzgi vipaturo 6 mupaka 8.



Mafumbo

  • Ni mwauli ndiposo nchifukwa wuli Ŵaisrayeli ŵakaŵa mu suzgo?
  • Nchifukwa wuli Yehova wakaphalira Gidiyoni kuti wakaŵa na ŵanalume ŵa nkhondo ŵanandi comene?
  • Kasi Gidiyoni wakaŵa na ŵanalume ŵalinga pamanyuma pa kuphalira ŵanalume ŵawofi kuti ŵawelere ku nyumba?
  • Nga ni umo mukuwonera pa cithuzithuzi, longosorani umo Yehova wakacitira kuti ciŵelengero ca ŵasilikari ŵa Gidiyoni cicepe kufika pa ŵanalume 300.
  • Ni pulani wuli iyo Gidiyoni wakacita na ŵanalume ŵake 300, ndipo Ŵaisrayeli ŵakaluska wuli nkhondo?

Mafumbo ghanyake

  • Ŵazgani Ŵeruzgi 6:36-40.

    Ni mwauli umo Gidiyoni wakacitira khumbo la Yehova?

    Ni mwauli umo lero tikumanyira khumbo la Yehova? (Zinth. 2:3-6; Mat. 7:7-11; 2 Tim. 3:16, 17)

  • Ŵazgani Ŵeruzgi 7:1-25.

    Ni sambiro wuli ilo tingatorapo pa nkhani ya ŵanalume 300 awo ŵakawonanga ico cikacitikanga, mwakupambana na awo ŵakalekanga kuwona? (Ŵeru. 7:3, 6; Rom. 13:11, 12; Efe. 5:15-17)

    Nga ni umo ŵanalume 300 ŵakasambizgika mwakulaŵiska Gidiyoni, ni mwauli umo ise tikusambilira mwakulaŵiska Gidiyoni Mukuru, Yesu Khristu? (Ŵeru. 7:17; Mat. 11:29, 30; 28:19, 20; 1 Pet. 2:21)

    Ni mwauli umo lemba la Ŵeruzgi 7:21 likutovwilira kuti tikhorwenge na mulimo wuliwose uwo taphalirika kucita mu gulu la Yehova? (1 Kor. 4:2; 12:14-18; Yak. 4:10)

  • Ŵazgani Ŵeruzgi 8:1-3.

    Pa nkhani ya kumazga mphindano pa mbali panji mudumbu, kasi tingasambirapo vici pa umo Gidiyoni wakamazgira mphindano na Ŵaefurayimu? (Zinth. 15:1; Mat. 5:23, 24; Luka 9:48)