Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 50: Ŵanakazi Ŵaŵiri Ŵacikanga

Nkhani Nambara 50: Ŵanakazi Ŵaŵiri Ŵacikanga

Para Ŵaisrayeli ŵakaŵanga mu suzgo, ŵakalombanga wovwiri kwa Yehova. Yehova wakaŵazgoranga mwakuŵapa ŵalongozgi ŵacikanga kuti ŵaŵawovwire. Mu Baibolo ŵalongozgi aŵa ŵakucemeka kuti ŵeruzgi. Yoswa wakaŵa mweruzgi wakwamba, ndipo ŵeruzgi ŵanyake awo ŵakaŵako pamanyuma pa iyo ni Oteniyeli, Ehudi na Shamagara. Kweni ŵaŵiri mwa ŵanthu awo ŵakovwira Ŵaisrayeli ŵakaŵa ŵanakazi ndipo mazina ghawo ni Debora na Yayeli.

Debora wakuyowoya na Baraki

Debora wakaŵa nchimi yanakazi. Yehova wakamuphalira vinthu ivyo vikeneranga kucitika kunthazi, ndipo iyo wakaphaliranga ŵanthu ivyo Yehova wakayowoyanga. Debora wakaŵaso mweruzgi. Wakakhalanga musi mwa khuni la mukama, ndipo ŵanthu ŵakizanga kwa iyo kuti waŵawovwire masuzgo ghawo.

Jabini ndiyo yikaŵa fumu ya caru ca Kenani pa nyengo iyo. Wakaŵa na magareta gha nkhondo 900. Ŵasilikari ŵake ŵakaŵa ŵankhongono comene mwakuti Ŵaisrayeli ŵanandi ŵakacicizgika kuŵa ŵateŵeti ŵa Jabini. Mulongozgi wa ŵasilikari ŵa Jabini wakaŵa Sisera.

Zuŵa linyake Debora wakacema mweruzgi munyake zina lake Baraki, wakamuphalira kuti: ‘Yehova wayowoya kuti: “Utore ŵanalume 10,000 ulute nawo ku Phiri la Tabo. Nizenge na Sisera kwenekura kuti wakakumane nawe. Nimupelekenge mu mawoko ghako pamoza na ŵasilikari ŵake.” ’

Baraki wakaphalira Debora kuti: ‘Nilutenge usange iwe nawe ulutenge.’ Debora wakaluta, wakaphalira Baraki kuti: ‘Wamuluska cifukwa ca nkhongono zako yayi, kweni cifukwa cakuti Yehova wapelekenge Sisera mu mawoko gha mwanakazi.’ Ici ndico cikacitika nadi.

Baraki wakakhira mu Phiri la Tabo kuti wakumane na ŵasilikari ŵa Sisera. Mwamabuci Yehova wakiziska maji ghanandi, ndipo ŵasilikari ŵanandi ŵakabira. Kweni Sisera wakakhira pa gareta lake na kucimbira.

Baraki, Yayeli, na Sisera

Sisera wakacimbira mupaka ku hema la Yayeli. Yayeli wakamucemera mukati mwa hema lake na kumupa mkaka. Mkaka ukapangiska Sisera kugona tulo. Yayeli wakatora cikhomo ca hema na kumukhoma naco mu mutu munthu muheni yura. Baraki wati wiza, Yayeli wakamulongora Sisera wakufwa! Ntheura ungawona kuti ivyo Debora wakayowoya vikacitika nadi.

Paumaliro, Fumu Jabini nayo yikakomeka, ndipo Ŵaisrayeli ŵakaŵaso pa mtende kwa nyengo yicoko waka.

Ŵeruzgi 2:14-22; 4:1-24; 5:1-31.



Mafumbo

  • Kasi ŵeruzgi ŵakaŵa anjani, ndipo ghanyake mwa mazina ghawo ni nga?
  • Ni udindo wuli wapadera uwo Debora wakaŵa nawo, ndipo ukasazgapo vici?
  • Apo Ŵaisrayeli ŵakawofyeka na Fumu Jabini na mulongozgi wake wa nkhondo, Sisera, ni uthenga wuli wakufuma kwa Yehova uwo Debora wakaphalira Mweruzgi Baraki, ndipo Debora wakati ninjani uyo wamuthereska nadi ŵalwani?
  • Kasi Yayeli wakacita vici ico cikalongora kuti ni mwanakazi wacikanga?
  • Nchivici cikacitika apo Fumu Jabini yikati yakomeka?

Mafumbo ghanyake

  • Ŵazgani Ŵeruzgi 2:14-22.

    Nchivici ico Ŵaisrayeli ŵakacita kuti ŵakwiyiske Yehova, ndipo ise tikusambirapo vici? (Ŵeru. 2:20; Zinth. 3:1, 2; Ezek. 18:21-23)

  • Ŵazgani Ŵeruzgi 4:1-24.

    Ni masambiro wuli ghakukhwaskana na cipulikano na cikanga agho ŵanakazi Ŵacikhristu ŵangasambirako kwa Debora na Yayeli? (Ŵeru. 4:4, 8, 9, 14, 21, 22; Zinth. 31:30; 1 Kor. 16:13)

  • Ŵazgani Ŵeruzgi 5:1-31.

    Ni mwauli umo sumu iyo Baraki na Debora ŵakimba apo ŵakathereska ŵalwani, tingayizgora lurombo lwakuyowoya za nkhondo ya Haramagedoni iyo yikwiza? (Ŵeru. 5:3, 31; 1 Mid. 16:8-10; Civ 7:9, 10; 16:16; 19:19-21)