Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 48: Ŵagibiyoni Ŵavinjeru

Nkhani Nambara 48: Ŵagibiyoni Ŵavinjeru

Misumba yinandi ya mu Kenani yikanozgeka kurwa nkhondo na Ŵaisrayeli. Iyo yikaghanaghananga kuti yingatonda. Kweni ŵanthu ŵa mu msumba wapafupi, wa Gibiyoni, ŵakaghanaghana nthena yayi. Ŵakagomezga kuti Ciuta wakavwiranga Ŵaisrayeli, ndipo ŵakakhumba yayi kurwa nkhondo na Ciuta. Kasi ukumanya ico Ŵagibiyoni ŵakacita?

Ŵakacita uryarya kuti ŵawoneke nga ni para ŵakakhalanga ku caru cakutali. Ŵanalume ŵanyake ŵakavwara vyakuvwara vya vigamba na skapato zakuparuka. Ŵakanyamura mathumba ghakuparuka na cingwa cakomira pa mbunda zawo. Ŵakaluta kwa Yoswa na kumuphalira kuti: ‘Tafumira ku caru ca kutali, cifukwa tikapulika za Ciuta winu mukuru, Yehova. Tikapulika vyose ivyo wakamucitirani mu Egupto. Ndico cifukwa cake ŵalongozgi ŵithu ŵakatiphalira kuti titore vyakurya vya pa ulendo tize na kuphalira imwe kuti: “Ndise ŵateŵeti ŵinu. Mucite nase phangano kuti murwenge nase nkhondo yayi.” Namweso mungawona kuti vyakuvwara vithu vyaparuka na cingwa cithu cawomira cifukwa ca ulendo utali.’

Yoswa na ŵalongozgi ŵanyake ŵakagomezga ivyo Ŵagibiyoni ŵakayowoya. Antheura ŵakacita phangano kuti ŵatimbanenge nawo cara. Kweni pati pajumpha mazuŵa ghatatu ŵakamanya kuti Ŵagibiyoni ŵakakhalanga pafupi.

‘Nchifukwa wuli mukayowoya kuti mwafuma ku caru ca kutali?’ Yoswa wakafumba ntheura.

Ŵagibiyoni ŵakazgora: ‘Tikacita ntheura cifukwa tikapulika kuti Ciuta winu Yehova wakalayizga kumupani caru cose ca Kenani. Mwantheura tikaŵa na wofi kuti mutikomenge.’ Ŵaisrayeli ŵakasunga phangano lawo, ŵakaŵakoma yayi Ŵagibiyoni. M’malo mwake ŵakaŵazgora kuŵa ŵateŵeti ŵawo.

Fumu ya caru ca Yerusalemu yikakwiya comene cifukwa cakuti Ŵagibiyoni ŵakacita phangano la mtende na Ŵaisrayeli. Yikaphalira mafumu ghanyake ghanayi kuti: ‘Kwelerani kuno munovwire kutimbana na Gibiyoni.’ Ici ndico mafumu ghankhondi agha ghakacita. Kasi Ŵagibiyoni ŵakacita cinthu ca mahara kucita phangano la mtende na Ŵaisrayeli, ico cikapangiska kuti mafumu ghankhondi agha ghize kutimbana nawo? Tiwonenge.

Joshua 9:1-27; 10:1-5.

Yoswa na Ŵagibiyoni


Mafumbo

  • Ni mwauli umo ŵanthu ŵa ku Gibiyoni ŵakaŵira ŵakupambana na Ŵakenani awo ŵakakhalanga mu misumba yapafupi?
  • Nga ni umo cithuzithuzi cikulongolera, kasi Ŵagibiyoni ŵakucitaci, ndipo cifukwa wuli?
  • Ni phangano wuli ilo Yoswa na ŵalongozgi ŵa Israyeli ŵakacita na Ŵagibiyoni, kweni nchivici ico ŵakamanya pati pajumpha mazuŵa ghatatu?
  • Nchivici cikacitika apo mafumu gha mu misumba yinyake ghakapulika kuti Ŵagibiyoni ŵacita phangano la mtende na Ŵaisrayeli?

Mafumbo ghanyake

  • Ŵazgani Joshua 9:1-27.

    Pakuti Yehova wakaphalira mtundu wa Israyeli kuti ‘uparanye wose awo ŵakakhalanga mu caru,’ ni mikhaliro wuli yinyake ya Ciuta iyo tikusambira cifukwa ca kuleka kukoma Ŵagibiyoni? (Josh. 9:22, 24; Mat. 9:13; Mil. 10:34, 35; 2 Pet. 3:9)

    Mwakulondezga phangano ilo wakacita na Ŵagibiyoni, kasi nkhacitiro wuli kawemi ako Yoswa wakacita kuti Ŵakhristu ŵasambireko lero? (Josh. 9:18, 19; Mat. 5:37; Efe. 4:25)

  • Ŵazgani Joshua 10:1-5.

    Ni mwauli umo mzinda ukuru lero ukulondezgera Ŵagibiyoni, ndipo nchivici cikuŵacitikira? (Josh. 10:4; Zek. 8:23; Mat. 25:35-40; Civ 12:17)