Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 46: Viliŵa vya Yeriko

Nkhani Nambara 46: Viliŵa vya Yeriko

Nchivici ico cikacitiska viliŵa vya Yeriko kuti viwe? Kukuwoneka nga ni para munthu munyake wakaponyapo bomba. Kweni pa nyengo yira kukaŵavya mabomba; ndiposo kukaŵavya nanga ni futi. Ni munthondwe unyake wa Yehova! Tiye tiwone umo ici cikacitikira.

Viliŵa vya Yeriko vikuwa

Tegherezga ivyo Yehova wakaphalira Yoswa: ‘Iwe na ŵanalume ŵankhondo mwende kuzingilira msumba wose. Mucite ntheura kamoza pa zuŵa kwa mazuŵa ghankhondi na limoza. Muyeghenge likasa la phangano peneapo mukuzingilira. Ŵasofi ŵankhondi na ŵaŵiri ŵendenge panthazi pa likasa la phangano na kulizga mbata zawo.

‘Pa zuŵa la cinkhondi na ciŵiri mukwenera kuzingilira msumba kankhondi na kaŵiri. Pamanyuma pake ŵasofi ŵazakalizge mbata nyengo yitali, ndipo waliyose wazakacemerezge comene. Ndipo viliŵa vya msumba vizamuwa pasi!’

Yoswa na ŵanthu wose ŵakacita nga ni umo Yehova wakayowoyera. Waliyose wakaŵa waka cete peneapo ŵakazingiliranga msumba. Palije uyo wakayowoyanga. Mbata zekha ndizo zikapulikikwa na musketusketu wa malundi. Ŵarwani ŵa ŵanthu ŵa Ciuta mu Yeriko ŵakwenera kuti ŵakaŵa na wofi. Kasi waciwona cingwe ico cikulendera pa windo? Kasi ni windo la nyumba ya njani? Rahabi wakacita ico mphaci zikamuphalira kuti wacite. Iyo na mbumba yake yose ŵakaŵa mukati kuwona ivyo vikacitikanga.

Yoswa

Paumaliro, pa zuŵa lacinkhondi na ciŵiri, ŵati ŵazingilira msumba kankhondi na kaŵiri, ŵasofi ŵakalizga mbata, ŵanalume ŵankhondo ŵakacemerezga, ndipo viliŵa vikawa. Yoswa wakati: ‘Komani waliyose mu msumba ndipo wuwochani. Wochani cilicose kupatulako siliva, golide, mkuŵa na cisulo. Vinthu ivi mukavipeleke kwa uyo wakusunga ndarama za cihema ca Yehova.’

Ku mphaci ziŵiri zira, Yoswa wakati: ‘Njirani mu nyumba ya Rahabi, mufumiskani iye na mbumba yake.’ Rahabi na mbumba yake ŵakapona, nga ni umo mphaci zikamulayizgira.

Joshua 6:1-25.



Mafumbo

  • Kasi Yehova wakaŵaphalira vici ŵanalume ŵankhondo na ŵasofi kuti ŵacite kwa mazuŵa ghankhondi na limoza?
  • Kasi ŵanalume ŵakeneranga kucita vici pa zuŵa lacinkhondi na ciŵiri?
  • Nga ni umo mukuwonera pa cithuzithuzi, nchivici cikucitikira viliŵa vya Yeriko?
  • Nchifukwa wuli cingwe ciswesi cikulendera pa windo?
  • Kasi Yoswa wakaphalira ŵanalume ŵankhondo kuti ŵacite vici na ŵanthu ndiposo msumba, kweni nchivici cikeneranga kucitikira siliva, golide, mkuŵa na cisulo?
  • Kasi mphaci ziŵiri zikaphalirika kucitaci?

Mafumbo ghanyake

  • Ŵazgani Joshua 6:1-25.

    Ni mwauli umo kwenda na kuzingilira Yeriko uko Ŵaisrayeli ŵakacita pa zuŵa lacinkhondi na ciŵiri kukuyanira na mulimo wa kupharazga wa Ŵakaboni ŵa Yehova mu mazuŵa gha ku umaliro agha? (Josh. 6:15, 16; Yes. 60:22; Mat. 24:14; 1 Kor. 9:16)

    Ni mwauli umo ucimi uwo wuli pa Joshua 6:26 ukafiskikira vilimika 500 vyati vyajumphapo, ndipo kufiskika uku kukutisambizga vici za mazgu gha Yehova? (1 Mathe. 16:34; Yes. 55:11)

Manyani Vinandi

NKHANI MU VITHUZITHUZI

Rahabi Wakapulikira Ivyo Wakaphalirika

Banja limoza pera ndilo likapona apo viliŵa vya Yeriko vikawa.