Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 39: Ndodo ya Aroni Yikazota Maluŵa

Nkhani Nambara 39: Ndodo ya Aroni Yikazota Maluŵa

Wona maluŵa na vipasi vyakuphya ivyo vili ku ndodo iyi. Iyi ni ndodo ya Aroni. Maluŵa agha ghakazota ndiposo vipasi vikapambika ku ndodo ya Aroni mu usiku umoza! Tiye tiwone cifukwa cake.

Mozesi wakupa Aroni ndodo yakuzota maluŵa

Ŵaisrayeli ŵakendendekanga mu mapopa kwa nyengo yitali. Ŵanthu ŵanyake ŵakaghanaghana kuti Mozesi wakeneranga yayi kuŵa mulongozgi, panji Aroni kuŵa musofi mukuru. Yumoza wa ŵanthu aŵa ni Kora, kusazgapo Datani, Abiramu na ŵalongozgi ŵa ŵanthu ŵakukwana 250. Wose ŵakiza na kuphalira Mozesi kuti: ‘Nchifukwa wuli ukujikwezga wekha pacanya pa ise tose?’

Mozesi wakaphalira Kora na ŵalondezgi ŵake kuti: ‘Mutore mbale zakusunkhizgiramo na kuŵikamo vyakusunkhizga. Mwize ku cihema ca Yehova namacero mulenji. Tizamuwona uyo Yehova wazamusankha.’

Namulenji Kora na ŵalondezgi ŵake 250 ŵakiza ku cihema cakusopelamo. Ŵanthu ŵanyake ŵanandi ŵakiza kuzakakhozgera ŵanalume ŵacigaluka aŵa. Yehova wakakwiya comene. Mozesi wakati: ‘Fumaniko ku mahema gha ŵanthu ŵaheni aŵa. Mungakhwaskanga kanthu kawo cara.’ Ŵanthu ŵakapulikira, ndipo ŵakafumako ku mahema gha Kora, Datani na Abiramu.

Mozesi wakati: ‘Na ici mumanyenge uyo Yehova wamusankha. Caru cijulikenge na kumira ŵanalume ŵaheni aŵa.’

Mozesi wati wamara waka kuyowoya, caru cikajulika. Hema na vinthu vyose vya Kora, kusazgapo Datani na Abiramu na ŵanthu ŵanyake awo ŵakaŵa nawo ŵakanjira pasi, ndipo caru cikaŵabenekelera. Ŵanthu ŵati ŵapulika kulira kwa awo ŵanjira pasi, ŵakacemerezga: ‘Cimbirani! Naseso caru cingatimira!’

Kora na ŵalondezgi ŵake 250 ŵakaŵa ŵacali pafupi na cihema cakusopelamo. Yehova wakatuma moto na kocha wose. Pamanyuma pake Yehova wakaphalira Eliyazara mwana wa Aroni kuti watore mbale zakusunkhizgiramo za ŵanalume 250 ŵara ŵakafwa na kupanga cibenekelero ca jochero. Cibenekelero ca jochero ici cikaŵa cenjezgo ku Ŵaisrayeli kuti paŵavye munthu munyake, kweni kupaturapo Aroni na ŵana ŵake ndiwo ŵakwenera kuteŵetera nga ni ŵasofi ŵa Yehova.

Yehova wakakhumba kulongora pakweru kuti Aroni na ŵana ŵake ndiwo wakasankha kuŵa ŵasofi. Mwantheura wakaphalira Mozesi kuti: ‘Phalira mulongozgi wa fuko lililose la Israyeli kuti wize na ndodo yake. Ku fuko la Levi, uphalire Aroni kuti wize na ndodo yake. Uŵike ndodo zose mu cihema cakusopelamo panthazi pa likasa la phangano. Ndodo ya munthu uyo nasankha kuŵa musofi yizotenge maluŵa.’

Namacero ghake mulenji Mozesi wati wanjira mu cihema, ndodo ya Aroni yikaŵa na maluŵa na vipasi vyakuphya! Kasi wamanya sono cifukwa ico Yehova wakacitira kuti ndodo ya Aroni yizote maluŵa?

Maŵazgo 16:1-49; 17:1-11; 26:10.



Mafumbo

  • Mbanjani ŵakagalukira Mozesi na Aroni, ndipo ŵakayowoyaci kwa Mozesi?
  • Kasi Mozesi wakaphalira vici Kora na ŵanthu awo ŵakakolerana nayo ŵakukwana 250?
  • Kasi Mozesi wakaŵaphalira vici ŵanthu, ndipo nchivici cikacitika wakati wamara waka kuyowoya?
  • Nchivici cikacitikira Kora na awo ŵakakolerana nayo ŵakukwana 250?
  • Nchivici ico Eliyazara, mwana wa Aroni, wakacita na mbale zakusunkhizgiramo za ŵanalume ŵara, ndipo cifukwa wuli?
  • Nchifukwa wuli Yehova wakapangiska ndodo ya Aroni kuzota maluŵa? (Wonani cithuzithuzi.)

Mafumbo ghanyake

  • Ŵazgani Maŵazgo 16:1-49.

    Nchivici ico Kora na ŵabwezi ŵake ŵakacita, ndipo nchifukwa wuli kacitiro kawo kakaŵa kakugarukira Yehova? (Maŵa. 16:9, 10, 18; Lev. 10:1, 2; Zinth. 11:2)

    Nkhawonero wuli kaheni ka vinthu ako Kora na ŵanthu ŵakukwana 250 awo ŵakaŵa “ŵakaronga ŵa ciwuru” ŵakaŵa nako? (Maŵa. 16:1-3; Zinth. 15:33; Yes. 49:7)

  • Ŵazgani Maŵazgo 17:1-11 na 26:10.

    Kasi kuzota maluŵa uko ndodo ya Aroni yikacita kukalongoraci, ndipo nchifukwa wuli Yehova wakalangura kuti yiŵikike mu cihema? (Maŵa. 17:5, 8, 10)

    Ni sambiro wuli lakuzirwa ilo tingasambirapo pa cimanyikwiro ca ndodo ya Aroni? (Maŵa. 17:10; Mil. 20:28; Fil. 2:14; Heb. 13:17)

Manyani Vinandi

Kadi la Aroni

Chifukwa wuli wakanjira yayi mu Charu cha Layizgano?