Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

NKhani Nambara 43: Yoswa Wakaŵikika Kuŵa Mulongozgi

NKhani Nambara 43: Yoswa Wakaŵikika Kuŵa Mulongozgi

Mozesi wakakhumba kunjira mu caru ca Kenani na Ŵaisrayeli. Antheura wakalomba kuti: ‘A Yehova, nizomerezgani niyambuke Mronga wa Yorodani kuti nkhawone caru ciwemi.’ Yehova wakati: ‘Yayi! Ungazunurangaso ici cara!’ Kasi ukumanya cifukwa ico Yehova wakayowoyera nthena?

Cikaŵa cifukwa ca ivyo Mozesi wakacita apo wakatimba jarawe na ndodo. Kumbuka kuti iyo na Aroni ŵakamucindika yayi Yehova. Iwo ŵakaŵaphalira yayi ŵanthu kuti ni Yehova uyo wakafumiska maji mu jarawe. Pa cifukwa ici Yehova wakati waŵazomerezgenge yayi kuti ŵanjire mu caru ca Kenani.

Myezi yicoko waka Aroni wati wafwa, Yehova wakaphalira Mozesi kuti: ‘Tola Yoswa, umwimike pamaso pa Eliyazara musofi na pamaso pa ŵanthu wose. Phalira wumba wose kuti Yoswa ndiyo mulongozgi muphya.’ Mozesi wakacita mwakuyana na umo Yehova wakayowoyera, nga ni umo ukuwonera pa cithuzithuzi apa.

Mozesi wakupharazga kuti Yoswa ni mulongozgi

Yehova wakaphalira Yoswa kuti: ‘Khwima mtima, leka kopa. Unjizgenge Ŵaisrayeli mu caru ca Kenani ico nili kuŵalayizga, ndipo ine niŵenge nawe.’

Yehova wakaphalira Mozesi kuti wakwere pacanya pa Phiri la Nebo ilo lili mu caru ca Moabu. Pacanya pa phiri ili Mozesi wakalaŵiska kusirya kwa Mronga wa Yorodani na kuwona caru cakutowa ca Kenani. Yehova wakati: ‘Ici ni caru ico nkhalayizga kupeleka ku ŵana ŵa Abrahamu, Yisake na Yakobe. Nakuzomerezga kuti uciwone, kweni nikuzomerezgenge yayi kuti unjire mu caru ici.’

Mozesi wakafwira pacanya pa Phiri la Nebo. Wakaŵa na vilimika 120. Wakaŵa wacali na nkhongono zake, ndipo maso ghake ghakaŵa ghacali kulaŵiska makora. Ŵanthu ŵakaŵa na citima comene cifukwa Mozesi wakapotera. Kweni ŵakakondwa kuŵa na Yoswa mulongozgi muphya.

Maŵazgo 27:12-23; Duteronome 3:23-29; 31:1-8, 14-23; 32:45-52; 34:1-12.



Mafumbo

  • Pa cithuzithuzi apa, kasi ŵanalume awo ŵali na Mozesi mbanjani?
  • Kasi Yehova wakamuphalira vici Yoswa?
  • Nchifukwa wuli Mozesi wakakwera pacanya pa Phiri la Nebo, ndipo Yehova wakamuphaliraci?
  • Kasi Mozesi wakaŵa na vilimika vilinga apo wakafwira?
  • Nchifukwa wuli ŵanthu ŵakaŵa na citima, kweni nchivici cikaŵakondweska?

Mafumbo ghanyake

  • Ŵazgani Maŵazgo 27:12-23.

    Ni udindo wuli ukuru uwo Yehova wakapeleka kwa Yoswa, ni mwauli umo Yehova wakulongozgera ŵanthu ŵake lero? (Maŵa. 27:15-19; Mil. 20:28; Heb. 13:7)

  • Ŵazgani Duteronome 3:23-29.

    Nchifukwa wuli Yehova wakakana kuti Mozesi na Aroni ŵanjire mu caru ca layizgano, ndipo tikusambirapo vici? (Dute. 3:25-27; Maŵa. 20:12, 13)

  • Ŵazgani Duteronome 31:1-8, 14-23.

    Ni mwauli umo mazgu agho Mozesi wakayowoya apo wakalayilananga na Ŵaisrayeli ghakulongolera kuti wakazomera mwakujiyuyura cilango cakufuma kwa Yehova? (Dute. 31:6-8, 23)

  • Ŵazgani Duteronome 32:45-52.

    Ni mwauli umo Mazgu gha Ciuta ghakwenera kukhwaskira umoyo withu? (Dute. 32:47; Lev. 18:5; Heb. 4:12)

  • Ŵazgani Duteronome 34:1-12.

    Nangauli Mozesi wakamuwona nadi Yehova maso na maso yayi, kasi lemba la Duteronome 34:10 likuvumbura vici za ubwezi uwo wakaŵa nawo na Yehova? (Ex. 33:11, 20; Maŵa. 12:8)