Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 27: Fumu Yiheni Yikawusa Egupto

Nkhani Nambara 27: Fumu Yiheni Yikawusa Egupto

Ŵanalume awo ŵali pa cithuzithuzi apa ŵakucicizga ŵanthu kugwira nchito. Wona mwanalume uyo wakuthyapula na luswazu yumoza wa awo ŵakugwira nchito! Ŵanthu awo ŵakugwira nchito mba fuko la Yakobe, ndipo ŵakucemeka Ŵaisrayeli. Awo ŵakuŵacicizga kugwira nchito Mbaegupto. Ŵaisrayeli mbazga ŵa Ŵaegupto. Kasi ici cikacitika wuli?

Ŵaegupto ŵakuyuzga Ŵaisrayeli

Mbumba ya Yakobe yikakhala mwamtende mu Egupto kwa vilimika vinandi. Yosefe, uyo wakaŵa waciŵiri kwa Faro mu Egupto, wakaŵapweleleranga. Kweni Yosefe wakafwa. Faro muphya, uyo wakatemwanga yayi Ŵaisrayeli, wakayamba kuwusa mu Egupto.

Ntheura Faro muheni uyu, wakapanga Ŵaisrayeli kuŵa ŵazga. Ŵakaŵika ŵanalume ŵakuŵalaŵilira awo ŵakaŵa ŵaheni ndiposo ŵankhaza. Ŵakacicizganga Ŵaisrayeli kugwira nchito ya kuzengera Faro misumba. Kweni Ŵaisrayeli ŵakalutilira kwandana. Nyengo yikati yajumphapo Ŵaegupto ŵakayamba kopa kuti Ŵaisrayeli ŵaŵenge ŵanandi ndiposo ŵankhongono comene.

Ŵaegupto ŵakuyuzga Ŵaisrayeli

Kasi ukumanya ico Faro wakacita? Wakaphalira ŵanakazi awo ŵakawovwiranga ŵanakazi Ŵaciisrayeli pa kubaba ŵana kuti: ‘Mukomenge mwana mwanalume waliyose uyo wababika.’ Kweni ŵanakazi ŵara ŵakaŵa ŵawemi, ŵakakoma yayi ŵana ŵanalume.

Pa cifukwa ici, Faro wakaphalira ŵanthu ŵake wose kuti: ‘Kolani na kukoma ŵana ŵanalume wose Ŵaciisrayeli. Ŵana ŵanakazi ŵekha ndiwo muŵaleke ŵamoyo.’ Kasi ici cikaŵa cinthu ciheni yayi kutuma ŵanthu kuti ŵacite? Tiye tiwone umo mwana mwanalume yumoza wakaponera.

Exodus 1:6-22.



Mafumbo

  • Pa cithuzithuzi apa, ni njani uyo wali na luswazu, ndipo wakuthyapula njani?
  • Yosefe wati wafwa, nchivici cikacitikira Ŵaisrayeli?
  • Nchifukwa wuli Ŵaeguputo ŵakacita wofi na Ŵaisrayeli?
  • Ni dango wuli ilo Faro wakapeleka ku ŵanakazi awo ŵakovwilanga ŵanakazi Ŵaciisrayeli pakubaba ŵana?

Mafumbo ghanyake

  • Ŵazgani Exodus 1:6-22.

    Ni mwauli umo Yehova wakayambira kufiska phangano lake kwa Abrahamu? (Ex. 1:7; Gen. 12:2; Mil. 7:17)

    Ni mwauli umo ŵanakazi Ŵacihebere awo ŵakovwilanga ŵanyawo pa kubaba ŵana ŵakazirwiskira umoyo? (Ex. 1:17; Gen. 9:6)

    Ni mwauli umo Yehova wakatumbikira ŵanakazi awo ŵakawovwiranga ŵanyawo pa kubaba cifukwa ca kugomezgeka kwawo? (Ex. 1:20, 21; Zinth. 19:17)

    Ni mwauli umo Satana wakati watimbanizgire cilato ca Yehova cakukhwaskana na Mphapu ya Abrahamu iyo yikalayizgika? (Ex. 1:22; Mat. 2:16)