Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 25: Mbumba Yikasamukira ku Egupto

Nkhani Nambara 25: Mbumba Yikasamukira ku Egupto

Yosefe wakatondeka kujikora. Wakaphalira ŵateŵeti ŵake wose kuti ŵafume mu cipinda. Wati wakhala yekha na ŵabali ŵake, Yosefe wakamba kulira. Ŵakuru ŵake ŵakwenera kuti ŵakazizwa comene, cifukwa ŵakamanya yayi cifukwa ico wakaliliranga. Paumaliro pake wakati: ‘Ndine Yosefe. Kasi ŵadada ŵacali ŵamoyo?’

Ŵakuru ŵake ŵakazizwa comene mwakuti ŵakakhala waka cete. Ŵakaŵa na wofi. Kweni Yosefe wakati: ‘Conde sendelerani kufupi.’ Ŵati ŵasendelera, wakaŵaphalira kuti: ‘Ndine munung’una winu Yosefe, uyo mukamuguliska ku Egupto.’

Yosefe wakalutilira kuyowoya nawo mwacitemwa wakati: ‘Mungadandawulanga yayi mu mtima cifukwa cakuti mukaniguliska. Wakaŵa Ciuta uyo wakanituma kuti nize kuno ku Egupto kuti niponoske ŵanthu. Faro waniŵika kuŵa fumu ya caru cose. Sono lutani mwaluŵiro mukaphalire ŵadada vinthu vyose ivi. Mukaŵaphalireso kuti ŵize kuno.’

Yosefe wakavumbatira na kufyofyontha ŵabali ŵake wose. Faro wati wapulika kuti ŵabali ŵa Yosefe ŵiza, wakayowoya na Yosefe kuti: ‘Phalira ŵabali ŵako kuti ŵatore ngolo ŵakatore ŵawiskewo na mbumba yawo yose ndipo ŵize nawo kuno. Nizamuŵapa malo ghawemi kuluska malo ghose gha mu Egupto.’

Iwo ŵakacita mwakuyana na mazgu gha Faro. Ungawona pa cithuzithuzi apa Yosefe wakukumana na ŵadada ŵake ŵati ŵiza ku Egupto na mbumba yawo yose.

Mbumba ya Yakobe yikakura comene. Wose pamoza ŵakaŵa 70 apo ŵakasamukira ku Egupto, kusazgapo Yakobe, ŵana ŵake na ŵazukuru ŵake. Kweni pakaŵaso ŵawoli na ŵateŵeti ŵanandi. Wose ŵakakhala mu Egupto. Ŵakacemekanga Ŵaisrayeli cifukwa Ciuta wakasintha zina la Yakobe kuŵa Israyeli. Ŵaisrayeli ŵakaŵa ŵanthu ŵapadera comene kwa Ciuta nga ni umo tiwonelenge kunthazi uku.

Genesis 45:1-28; 46:1-27.

Yosefe na mbumba yake


Mafumbo

  • Nchivici cikacitika apo Yosefe wakajivumbura?
  • Nchivici ico Yosefe wakalongosora mwacitemwa ku ŵabali ŵake?
  • Kasi Faro wakayowoyaci apo wakapulika kuti ŵabali ŵa Yosefe ŵiza?
  • Kasi mbumba ya Yakobe yikaŵa yikuru wuli apo yikasamukiranga ku Egupto?
  • Kasi mbumba ya Yakobe yikacemekanga vici, ndipo cifukwa wuli?

Mafumbo ghanyake

  • Ŵazgani Genesis 45:1-28.

    Ni mwauli umo nkhani ya mu Baibolo ya Yosefe yikulongolera kuti Yehova wangasintha ulwani wa ŵateŵeti ŵake na kuzgoka cinthu ciwemi? (Gen. 45:5-8; Yes. 8:10; Fil. 1:12-14)

  • Ŵazgani Genesis 46:1-27.

    Kasi Yehova wakamusimikizgira wuli Yakobe apo wakalutanga ku Egupto? (Gen. 46:1-4)