# Nkhani Nambara 18: Yakobe Wakaluta ku Harani

Nkhani Nambara 18: Yakobe Wakaluta ku Harani

Kasi ukuŵamanya ŵanthu aŵa, awo Yakobe wakuyowoya nawo? Yakobe wakakumana nawo pa cisimi pamanyuma pakuti wayenda mazuŵa ghanandi. Ŵakaliskanga mberere zawo. Yakobe wakafumba: ‘Kasi kukwinu ni nkhu?’

Ŵakazgora kuti, ‘ku Harani.’

Yakobe wakafumbaso kuti, ‘Kasi mukumumanya Labani?’

‘Enya,’ iwo ŵakazgora. ‘Uyo Rakelo mwana wake wakwiza uko na mberere.’ Kasi wamuwona Rakelo pa cithuzithuzi apa?

Yakobe wakati wawona Rakelo na mberere za sibweni wake Labani, wakaluta na kugadabura libwe ilo likaŵa pa cisimi mwakuti mberere zimwe maji. Yakobe wakamufyofyontha Rakelo na kumuphalira zina lake na uko wafuma. Rakelo wakakondwa comene, wakaluta kunyumba kukaphalira ŵawiske a Labani.

Labani wakakondwa comene kukhala na Yakobe. Ndipo Labani wakakondwa comene apo Yakobe wakamulomba kuti watore Rakelo. Kweni wakaphalira Yakobe kuti wagwire nchito vilimika vinkhondi na viŵiri kuti watore Rakelo. Yakobe wakagwira nchito iyi cifukwa wakamutemwa comene Rakelo. Kweni kasi ukumanya ico cikacitika nyengo ya ukwati yikati yakwana?

Labani wakapeleka mwana wake mulara, Leya, kwa Yakobe mu malo mwa Rakelo. Yakobe wakati wazomera kugwiraso nchito vilimika vinyake vinkhondi na viŵiri, Labani wakamupaso Rakelo kuti waŵe muwoli wake. Pa nyengo yira Ciuta wakazomerezganga ŵanalume kuŵa na ŵawoli ŵanandi. Kweni sono, nga ni umo Baibolo likuyowoyera, mwanalume wakwenera kuŵa na muwoli yumoza pera.

Genesis 29:1-30.

## Mafumbo

• Kasi msungwana uyo wali pa cithuzithuzi apa ninjani, kasi Yakobe wakamucitiraci?
• Kasi Yakobe wakanweka kucitaci kuti watorane na Rakelo?
• Kasi Labani wakacitaci apo nyengo yakuti Yakobe watorane na Rakelo yikakwana?
• Kasi Yakobe wakazomera kucitaci kuti watore Rakelo kuŵa muwoli wake?

## Mafumbo ghanyake

• Ŵazgani Genesis 29:1-30.

Nangauli Labani wakamupusika, ni mwauli umo Yakobe wakalongolera kuti ngwakuzika, ndipo tingatorapo sambiro wuli apa? (Gen. 25:27; 29:26-28; Mat. 5:37)

Ni mwauli umo ciyelezgero ca Yakobe cikulongolera mphambano ya citemwa canadi na ca kuyegheka waka mtima? (Gen. 29:18, 20, 30; Sum. 8:6)

Kasi mbanakazi mbani ŵanayi awo ŵakazgoka mbumba ya Yakobe ndipo pamanyuma pake ŵakamubabira ŵana? (Gen. 29:23, 24, 28, 29)