Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 14: Ciuta Wakayezga Cigomezgo ca Abrahamu

Nkhani Nambara 14: Ciuta Wakayezga Cigomezgo ca Abrahamu

Kasi ukuwona ico Abrahamu wakucita apa? Wali na cimayi, ndipo wakuwoneka nga wakukhumba kukoma mwana wake. Cifukwa wuli wakukhumba kucita ici? Cakwamba, tiye tiwone umo Abrahamu na Sara ŵakasangira mwana wawo.

Abrahamu wakupeleka sembe Yisake

Kumbukira kuti Ciuta wakaŵalayizga kuti ŵaŵenge na mwana. Kweni ici cikawoneka kuŵa cambura macitiko, cifukwa Abrahamu na Sara ŵakaŵa ŵacekuru comene. Ndipouli, Abrahamu wakagomezga kuti Ciuta wangacita ico cikuwoneka nga nchambura macitiko. Kasi cikacitika nchivici?

Cilimika cikajumphapo kufumira apo Ciuta wakapelekera layizgano lake. Pamanyuma pake, apo Abrahamu wakaŵa na vilimika 100 ndipo Sara vilimika 90, ŵakababa mwana mwanalume zina lake Yisake. Yehova wakafiska layizgano lake!

Kweni Yisake wakati wakura, Yehova wakayezga cigomezgo ca Abrahamu. Wakamucema wakati: ‘Abrahamu!’ Abrahamu wakathanika: ‘Ndine pano!’ Ciuta wakati: ‘Tora mwana wako, mwana wako yumoza pera Yisake, ndipo ulute ku phiri leneilo nikulongorenge. Kwenekura ukakome mwana wako na kumupeleka sembe.’

Mazgu agha ghakaŵa ghakucitiska citima kwa Abrahamu, cifukwa wakamutemwa comene mwana wake. Ndipo kumbukira kuti Ciuta wakalayizga kuti ŵana ŵa Abrahamu ŵazamukhala mu caru ca Kenani. Kweni kasi ici nthena cikacitika wuli usange Yisake wafwenge? Nangauli Abrahamu wakapulikiska cara, kweni wakapulikira Ciuta.

Wakati wafika ku phiri, Abrahamu wakakaka Yisake na kumugoneka pa jochero ilo wakazenga. Ndipo wakatora cimayi kuti wakome mwana wake. Kweni pa nyengo yeneyiyo mungelo wa Ciuta wakamucema wakati: ‘Abrahamu, Abrahamu!’ Abrahamu wakathanika: ‘Ndine pano!’

Ciuta wakati: ‘Leka kukoma mwana wako panji kucita kanthu kalikose pa iye. Sono namanya kuti uli na cigomezgo mwa ine, cifukwa ulije kuninora mwana wako, mwana wako yumoza pera.’

Mwee, nawo mbukuru wa cigomezgo ico Abrahamu wakaŵa naco mwa Ciuta! Wakagomezga kuti palije cinthu ico Yehova nthena wakatondeka kucita, nakutiso Yehova nthena wakawuska Yisake ku ŵakufwa. Kweni khumbo la Ciuta likaŵa lakuti Abrahamu wakome mwana wake cara. Antheura Ciuta wakapangiska mberere kukoleka mu civwati ico cikaŵa pafupi, ndipo wakaphalira Abrahamu kuti wapeleke sembe mberere iyo mu malo mwa mwana wake.

Genesis 21:1-7; 22:1-18.



Mafumbo

  • Kasi Ciuta wakamulayizga vici Abrahamu, ni mwauli umo Ciuta wakasungira layizgano lake?
  • Nga ni umo pakuwonekera pa cithuzithuzi, ni mwauli umo Ciuta wakayezgera cigomezgo ca Abrahamu?
  • Kasi Abrahamu wakacitaci nangauli wakamanya yayi cifukwa ico Ciuta wakamutumira kucita cinthu ici?
  • Nchivici cikacitika apo Abrahamu wakatora cimayi kuti wakome mwana wake?
  • Kasi cigomezgo ca Abrahamu mwa Yehova cikaŵa cikuru wuli?
  • Nchivici ico Ciuta wakapeleka kwa Abrahamu kuti wapeleke sembe, ndipo mwauli?

Mafumbo ghanyake

  • Ŵazgani Genesis 21:1-7.

    Nchifukwa wuli Abrahamu wakakotora mwana wake pa zuŵa la nambara eyiti? (Gen. 17:10-12; 21:4)

  • Ŵazgani Genesis 22:1-18.

    Ni mwauli umo Yisake wakapulikira awiske ŵake, Abrahamu, ndipo ni mwauli umo ici cikapelekera cithuzithuzi ca cinthu cakuzirwa ico cikenelanga kuzakacitika kunthazi? (Gen. 22:7-9; 1 Kor. 5:7; Fil. 2:8, 9)

Manyani Vinandi

YEZGANI CHIPULIKANO CHAWO

Abrahamu—“Wiske wa Wose Awo Ŵali na Chipulikano”

Kasi Abrahamu wakalongora wuli chipulikano? Kasi imwe mukukhumba kumuyezga Abrahamu munthowa wuli?