Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 13: Abrahamu—Bwezi la Ciuta

Nkhani Nambara 13: Abrahamu—Bwezi la Ciuta

Ghanyake mwa malo agho ŵanthu ŵakaluta pamanyuma pa Cigumula ghakaŵa Uri. Ukaŵa msumba wakuzirwa uwo ukaŵa na nyumba ziwemi. Kweni ŵanthu ŵakasopanga ŵaciuta ŵautesi. Umu ndimoso ŵakacitilanga na ku Babele wuwo. Ŵanthu ŵa ku Uri na ku Babele ŵakaŵa nga ni Nowa na mwana wake Shemu yayi, awo ŵakalutilira kuteŵetera Yehova.

Paumaliro pake, vilimika 350 pamanyuma pa cigumula, Nowa, munthu wakugomezgeka wakafwa. Pakajumpha vilimika viŵiri pera ndipo munthu uyo ukumuwona pa cithuzithuzi apa wakababika. Wakaŵa munthu wapadera comene kwa Ciuta. Zina lake likaŵa Abrahamu. Wakakhalanga na mbumba yake mu msumba wa Uri.

Abrahamu wakulaŵiska nyenyezi

Zuŵa linyake Yehova wakaphalira Abrahamu kuti: ‘Leka Uri na ŵabali ŵako, ndipo ulute ku caru ico nikulongorenge.’ Kasi Abrahamu wakapulikira Ciuta na kuleka umoyo uwemi wa mu Uri? Enya, wakapulikira. Cikaŵa cifukwa cakuti Abrahamu wakapulikiranga Ciuta nyengo zose lekani wakamanyikwa kuŵa bwezi la Ciuta.

Ŵanyake ŵa mbumba ya Abrahamu ŵakaluta nayo lumoza apo wakaleka Uri. Wiske wake, Tera, wakaluta nayo. Loti, mwana wa mukuru wake, nayo wakaluta. Muwoli wake, Sara, nayoso wakaluta. Mukuluta kwa nyengo ŵakafika pa malo ghanyake zina lake Harani, apo Tera wakafwira. Ŵakaŵa kutali comene na Uri.

Pakati pajumpha nyengo yicoko waka Abrahamu na mbumba yake ŵakanyamuka mu Harani na kuluta ku caru ca Kenani. Ku Kenani Yehova wakati: ‘Ici ndico caru ndipenge ŵana ŵako.’ Abrahamu wakakhala mu Kenani na kugona mu mahema.

Ciuta wakayamba kovwira Abrahamu mwakuti wakaŵa na mberere zinandi na viŵeto vinyake na ŵateŵeti ŵanandi. Kweni iye na Sara ŵakaŵavya mwana wawo na wawo.

Peneapo Abrahamu wakaŵa na vilimika 99, Yehova wakati: ‘Nkhulayizga kuti uŵenge wiske wa mitundu yinandi ya ŵanthu.’ Kweni kasi ici cikatenge cicitikenge wuli, pakuti Abrahamu na Sara ŵakacekura comene kwakuti ŵangaŵa yayi na mwana?

Genesis 11:27-32; 12:1-7; 17:1-8, 15-17; 18:9-19.



Mafumbo

  • Kasi ni ŵanthu wuli awo ŵakakhalanga mu msumba wa Uri?
  • Kasi munthu uyo wali pa cithuzithuzi apa ninjani, wakababika pawuli, ndipo wakakhalanga nkhu?
  • Kasi Ciuta wakaphalira Abrahamu kuti wacite vici?
  • Nchifukwa wuli Abrahamu wakacemekanga bwezi la Ciuta?
  • Kasi mbanjani awo ŵakaluta na Abrahamu kufuma mu Uri?
  • Kasi Ciuta wakaphalira vici Abrahamu wati wafika mu caru ca Kenani?
  • Ni layizgano wuli ilo Ciuta wakaphalira Abrahamu apo wakaŵa na vilimika 99?

Mafumbo ghanyake

  • Ŵazgani Genesis 11:27-32.

    Kasi Abrahamu na Loti pakaŵa pauvici? (Gen. 11:27)

    Nangauli Tera wakuyowoyeka kuti ndiyo wakaluta na mbumba yake ku Kenani, kweni ni mwauli umo tikumanyira kuti wakaŵa Abrahamu uyo wakapangiska ulendo uwu kuti uŵepo, ndipo nchifukwa wuli wakacita nthena? (Gen. 11:31; Mil. 7:2-4)

  • Ŵazgani Genesis 12:1-7.

    Ni mwauli umo Yehova wakapelekera cimanyisko cakusazgikira ca phangano ilo wakapanga na Abrahamu apo iyo wakafika mu caru ca Kenani? (Gen. 12:7)

  • Ŵazgani Genesis 17:1-8, 15-17.

    Ni zina wuli liphya ilo Abramu wakapokera apo wakaŵa na vilimika 99, ndipo cifukwa wuli? (Gen. 17:5)

    Ni vitumbiko wuli ivyo Yehova wakalayizga Sara? (Gen. 17:15, 16)

  • Ŵazgani Genesis 18:9-19.

    Mwakuyana na lemba la Genesis 18:19, ni udindo wuli uwo dada waliyose wali nawo? (Dute. 6:6, 7; Efe. 6:4)

    Nchivici ico Sara wakacita ico cikulongora kuti tingamubisira kanthu yayi Yehova? (Gen. 18:12, 15; Sal. 44:21)