Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 28: Umo Mozesi Wakaponera Apo Wakaŵa Bonda

Nkhani Nambara 28: Umo Mozesi Wakaponera Apo Wakaŵa Bonda

Wona bonda uyo wakulira, ndipo wavumbatira munwe wa mwanakazi. Bonda uyu ni Mozesi. Kasi wamumanya mwanakazi wakutowa uyu? Ni mwana mwanakazi wa Faro.

Mwana mwanakazi wa Faro wasanga Mozesi

Anyina ŵa Mozesi ŵakabisa mwana wawo kwa myezi yitatu cifukwa ŵakakhumbanga yayi kuti wakomeke na Ŵaegupto. Kweni ŵakamanya kuti Mozesi ŵamusangenge, sono ici ndico ŵakacita kuti ŵamuthaske.

Ŵakatora citete na kucimata kuti maji ghaleke kunjira. Ŵakaŵika Mozesi mukati, na kuŵika citete mukati mu utheka utali mumphepete mwa Mronga wa Nile (Nayilo). Miriyamu, mudumbu wa Mozesi, wakaphalirika kuti wimilirenge pafupi kuti wawone ico cicitikenge.

Mwana mwanakazi wa Faro wakiza ku Mronga wa Nile kuzakageza. Wakawona citete cili mukati mu utheka. Wakaphalira yumoza wa ŵateŵeti ŵake kuti: ‘Luta ukanitolere citete cira.’ Mwana wa Faro wakati wajura citete, wakawona mwana wakutowa comene. Mozesi wakaliranga, ndipo mwana wa Faro wakamucitira citima. Wakakhumba yayi kuti wakomeke.

Miriyamu wakiza pafupi. Ungamuwona pa cithuzithuzi apa. Miriyamu wakafumba mwana mwanakazi wa Faro kuti: ‘Kasi ningaluta kuti nkhamucemelani mwanakazi Muisrayeli kuti wazakamulelerani mwana?’

Mwana wa Faro wakati, ‘Enya luta.’

Miriyamu wakaluta mwaluŵiro kukaphalira anyina. Anyina ŵa Mozesi ŵakati ŵiza, mwana wa Faro wakati: ‘Tora mwana uyu ukanilelere, ndipo nizamukupa malipiro ghako.’

Ntheura anyina Mozesi ŵakalera ŵekha mwana wawo na wawo. Mozesi wakati wakura, ŵakiza nayo kwa mwana wa Faro uyo wakamusunganga nga ni mwana wake. Umu ndimo vikacitikira kuti Mozesi wakulire mu nyumba ya Faro.

Exodus 2:1-10.



Mafumbo

  • Kasi bonda uyo wali pa cithuzithuzi apa ninjani, ndipo wavumbatira munwe wa njani?
  • Nchivici ico anyina Mozesi ŵakacita kuti ŵamuthaske?
  • Kasi kasungwana ako kali pa cithuzithuzi apa nkhanjani, ndipo kakacitaci?
  • Apo mwana mwanakazi wa Faro wakati wawona bonda, kasi Miriyamu wakasacizgaci?
  • Kasi mwana mwanakazi wa Faro wakaphalira vici anyina Mozesi?

Mafumbo ghanyake

  • Ŵazgani Exodus 2:1-10.

    Ni mwaŵi wuli wakusambizga uwo anyina Mozesi ŵakaŵa nawo, kasi kacitiro aka kakupeleka ciyelezgero wuli ku ŵapapi lero? (Ex. 2:9, 10; Dute. 6:6-9; Zinth. 22:6; Efe. 6:4; 2 Tim. 3:15)

Manyani Vinandi

Mozesi Wakakulira ku Eguputo

Kasi umo Mozesi wakakhaliranga ku Eguputo tikusambirako vichi? Kopelani nkhani iyi na kusambira pamoza na ŵana.