Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 22: Yosefe Wakaŵikika mu Jere

Nkhani Nambara 22: Yosefe Wakaŵikika mu Jere

Yosefe wakaŵa na vilimika 17 pera apo wakatoleka kuluta ku Eguputo. Ku Eguputo wakaguliskika kwa mwanalume munyake zina lake Potifara. Potifara wakagwiranga nchito kwa Faro, fumu ya Eguputo.

Yosefe wali mu jere

Yosefe wakateŵeteranga mwakulimbikira comene kwa bwana wake, Potifara. Yosefe wakati wakura, Potifara wakamuŵika kuŵa mulaŵiliri wa nyumba yake yose. Ipo nchifukwa wuli pera Yosefe wakaŵikika mu jere? Nchifukwa ca muwoli wa Potifara.

Yosefe wakaŵa wakutowa comene, ndipo muwoli wa Potifara wakakhumba kuti wagone nayo. Kweni Yosefe wakamanya kuti kucita ntheura ukaŵa uheni, ndipo wakakana. Muwoli wa Potifara wakakwiya comene. Mfumu wake wakati wiza, wakamuphalira utesi kuti: ‘Yosefe wakhumbanga kugona nane!’ Potifara wakagomezga muwoli wake, ndipo wakamukwiyira comene Yosefe. Wakamuŵika mu jere.

Mulara wakusunga jere nakalinga wakawona kuti Yosefe ni munthu muwemi. Mwantheura wakamuŵika kuti wawonelerenge ŵakayidi ŵanyake wose. Nyengo yati yalutapo, Faro wakakwiyira wakupelekera nkhombo na wakumuphikira wake, ndipo wakaŵaŵika mu jere. Usiku unyake wose ŵakalota maloto ghapadera, kweni ŵakamanya yayi ico maloto ghawo ghakang’anamuranga. Namulenji Yosefe wakati: ‘Niphalirani maloto ghinu.’ Ŵati ŵamuphalira, na wovwiri wa Ciuta, Yosefe wakalongosora ng’anamuro la maloto ghawo.

Kwa uyo wakupelekera nkhombo, Yosefe wakati: ‘Pandajumphe mazuŵa ghatatu uwukengemo mu jere, ndipo wamuŵaso wakupelekera nkhombo wa Faro.’ Yosefe wakasazgirapo kuti: ‘Para wafuma, ukamuphalire Faro za ine, ndipo ukanovwire kuti nifumemo muno.’ Kweni kwa wakuphika, Yosefe wakati: ‘Pandajumphe mazuŵa ghatatu Faro wazamudumura mutu wako.’

Mukati mu mazuŵa ghatatu vinthu vikacitika nga ni umo Yosefe wakayowoyera. Faro wakadumura mutu wa wakuphika. Wakupelekera nkhombo wakafuma mu jere na kwambaso kuteŵetera fumu. Kweni wakaluwa vyose vyakukhwaskana na Yosefe! Wakamuphalira yayi Faro za iye, ndipo Yosefe wakalutilira kukhala mu jere.

Genesis 39:1-23; 40:1-23.



Mafumbo

  • Kasi Yosefe wakaŵa na vilimika vilinga apo wakatolekera ku Egupto, nchivici cikacitika wati wafika?
  • Ni mwauli umo Yosefe wakaŵikikira mu jere?
  • Ni udindo wuli uwo Yosefe wakapika mu jere?
  • Apo wakaŵa mu jere, nchivici ico Yosefe wakacitira wakupelekera nkhombo na wakuphika wa Faro?
  • Nchivici cikacitika apo wakupelekera nkhombo wati wafumiskika mu jere?

Mafumbo ghanyake

  • Ŵazgani Genesis 39:1-23.

    Pakuti pa nyengo ya Yosefe kukaŵavya dango lakulembeka la Ciuta lakukanizga uleŵi, nchivici cikamupangiska kuti wacimbire muwoli wa Potifara? (Gen. 2:24; 20:3; 39:9)

  • Ŵazgani Genesis 40:1-23.

    Longosorani mwakudumura maloto gha wakupelekera nkhombo na ng’anamuro lake ilo Yehova wakapeleka kwa Yosefe. (Gen. 40:9-13)

    Kasi wakuphika wakalota vici, ndipo ng’anamuro lake likaŵa vici? (Gen. 40:16-19)

    Ni mwauli umo gulu la muzga wamagomezgeko na wa vinjeru lalondezgera kacitiro ka vinthu ka Yosefe? (Gen. 40:8; Sal. 36:9; Yoh. 17:17; Mil. 17:2, 3)

    Ni mwauli umo lemba la Genesis 40:20 likovwilira Ŵakhristu umo ŵakwenera kuwonera vikondwelero vya mazuŵa ghakubabikira? (Muph. 7:1; Mrk. 6:21-28)

Manyani Vinandi

Kadi la mu Baibolo la Potifara

Chita dawunilodi kadi ili kuti umanye vinandi vya Potifara, uyo wakaŵa bwana wa Yosefe ku Eguputo.