Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 19: Yakobe Wakaŵa na Mbumba Yikuru

Nkhani Nambara 19: Yakobe Wakaŵa na Mbumba Yikuru
Yakobe na ŵana ŵake

Wona mbumba yikuru iyi. Aŵa ni ŵana 12 ŵa Yakobe. Wakaŵaso na ŵana ŵanakazi. Kasi ukughamanya mazina gha ŵana aŵa? Tiye tisambire ghanyake mwa mazina ghawo.

Leya wakababa Rubeni, Simiyoni, Levi na Yuda. Rakelo wakati wawona kuti wakubaba cara, wakaŵa na citima cikuru. Antheura wakapeleka Biliha, muteŵeti wake, kwa Yakobe, ndipo Biliha wakababa ŵana ŵaŵiri, Dani na Nafutali. Leya nayo wakapeleka Zipa muteŵeti wake kwa Yakobe, ndipo Zipa wakababa Gadi na Aseri. Paumaliro pake Leya wakababaso ŵana ŵaŵiri, Isakara na Zebuloni.

Mukuluta kwa nyengo Rakelo wakababa mwana. Wakamuthya Yosefe. Kunthazi uku tisambirenge vinandi vyakukhwaskana na Yosefe, cifukwa wakaŵa munthu wakuzirwa comene. Aŵa ndiwo ŵana ŵanalume 11 awo Yakobe wakababa apo wakakhalanga na Labani wiske wa Rakelo.

Yakobe wakaŵaso na ŵana ŵanakazi, kweni Baibolo likutiphalira zina la mwana yumoza pera. Zina lake likaŵa Dina.

Nyengo yikakwana yakuti Yakobe wamuleke Labani na kuwelera ku Kenani. Wakawunganya mbumba yake, mberere na ng’ombe, na kuyamba ulendo utali.

Pakati pajumpha nyengo yicoko waka Yakobe na mbumba yake ŵakati ŵawelera ku Kenani, Rakelo wakababa mwana munyake. Ici cikacitika mukati mu ulendo. Rakelo wakasuzgika comene, ndipo wakafwa wakati wababa mwana. Kweni mwana uyo wakababa wakaŵa makora. Yakobe wakamuthya Benjamini.

Tikwenera kukumbukanga mazina gha ŵana 12 ŵa Yakobe cifukwa mtundu wose wa Israyeli ukafumira mwa iwo. Ndipo mazina gha mafuko 12 gha Israyeli ghakafuma ku ŵana 10 ŵa Yakobe na ŵana ŵaŵiri ŵa Yosefe. Yisake wakakhala vilimika vinandi pamanyuma pa kubabika kwa ŵana aŵa, ndipo wakwenera kuti wakakondwa comene kuŵa na ŵazukuru ŵanandi. Kweni tiye tiwone ico cikacitikira muzukuru wake mwanakazi Dina.

Genesis 29:32-35; 30:1-26; 35:16-19; 37:35.



Mafumbo

  • Kasi mazina gha ŵana ŵanalume ŵankhondi na yumoza ŵa Yakobe awo wakababa kwa muwoli wake wakwamba, Leya, ŵakaŵa njani?
  • Zunulani mazina gha ŵana ŵanalume ŵaŵiri ŵa Zipa, muteŵeti wa Leya uyo wakamupeleka kwa Yakobe.
  • Kasi mazina gha ŵana ŵanalume ŵa Biliha, muteŵeti wa Rakelo uyo wakamupeleka kwa Yakobe, ŵakaŵa njani?
  • Zunulani mazina gha ŵana ŵaŵiri ŵa Rakelo, kweni kasi cikacitika nchivici apo mwana mwanalume waciŵiri wakababika?
  • Nga ni umo mukuwonera pa cithuzithuzi, kasi Yakobe wakaŵa na ŵana ŵanalume ŵalinga, ndipo nchivici cikafuma mwa iwo?

Mafumbo ghanyake

  • Ŵazgani Genesis 29:32-35; 30:1-26; na 35:16-19.

    Nga ni umo vyalongolekera na ŵana ŵanalume 12 ŵa Yakobe, ni mwauli umo ŵanyamata Ŵacihebere kale ŵakathyikiranga mazina?

  • Ŵazgani Genesis 37:35.

    Nangauli ni Dina pera uyo wakuzunulika mu Baibolo, tikumanya wuli kuti Yakobe wakaŵa na ŵana ŵasungwana ŵanandi? (Gen. 37:34, 35)