Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 15: Muwoli wa Loti Wakalaŵiska Kumanyuma

Nkhani Nambara 15: Muwoli wa Loti Wakalaŵiska Kumanyuma

Loti na mbumba yake ŵakakhalanga lumoza na Abrahamu mu caru ca Kenani. Zuŵa linyake Abrahamu wakaphalira Loti kuti: ‘Palije malo ghakukwana gha viŵeto vithu. Conde, tiye tipatukane. Usange ulutenge kunyake, ine nilutenge kunyake.’

Loti wakalaŵiska caru. Wakawona cigaŵa ciwemi ico cikaŵa na maji na utheka unandi wa viŵeto vyake. Ici cikaŵa Cigaŵa ca Yorodani. Mwantheura Loti wakasamira kwenekura na mbumba yake na viŵeto vyake. Paumaliro pake ŵakakhala mu msumba wa Sodomu.

Ŵanthu ŵa mu Sodomu ŵakaŵa ŵaheni comene. Ici cikamukwiyiska Loti cifukwa wakaŵa munthu muwemi. Ciuta nayo wakakwiya. Nyengo yikati yajumphapo, Ciuta wakatuma ŵangelo ŵaŵiri kukacenjezga Loti kuti waparanyenge msumba wa Sodomu na wa Gomora cifukwa ca uheni wawo.

Ŵangelo ŵakaphalira Loti kuti: ‘Yendeska! Tora muwoli wako na ŵana ŵako ndipo muwukemo muno!’ Loti na mbumba yake ŵakacedwanga kunyamuka, mwantheura ŵangelo ŵakaŵakora mawoko na kuŵafumiska mu msumba. Yumoza wa ŵangelo wakati: ‘Cimbirani kuti muponoske umoyo winu! Kulaŵiska kumanyuma cara. Cimbilirani ku mapiri, kuti muleke kukomeka.’

Loti na ŵana ŵake ŵanakazi ŵakapulikira ndipo ŵakacimbira kufumamo mu Sodomu. Ŵakayimilira yayi, ndipo ŵakalaŵiska kumanyuma cara. Kweni muwoli wa Loti wakapulikira yayi. Ŵakati ŵayendapo kamutunda kacoko waka kufuma mu Sodomu, wakayimilira na kulaŵiska kumanyuma. Ndipo muwoli wa Loti wakazgoka ciduli ca mucere. Kasi ukumuwona pa cithuzithuzi apa?

Tingatolapo sambiro liwemi pa cakucitika ici. Cikutilongora kuti Ciuta wakuponoska awo ŵakumupulikira, kweni awo ŵakuleka kumupulikira ŵafwenge.

Genesis 13:5-13; 18:20-33; 19:1-29; Luka 17:28-32; 2 Petros 2:6-8.

Loti wakufumamo mu Sodomu


Mafumbo

  • Nchifukwa wuli Abrahamu na Loti ŵakapatukana?
  • Nchifukwa wuli Loti wakasankha kukhala mu Sodomu?
  • Kasi ŵanthu ŵa mu Sodomu ŵakaŵa ŵa nkharo wuli?
  • Ni nchenjezgo wuli iyo ŵangelo ŵaŵiri ŵakapeleka kwa Loti?
  • Nchifukwa wuli muwoli wa Loti wakazgoka ciduli ca mucere?
  • Tikusambirapo vici pa nkhani ya muwoli wa Loti?

Mafumbo ghanyake

  • Ŵazgani Genesis 13:5-13.

    Pa nkhani ya kumazga mphindano pa ŵanthu, kasi tikusambirapo vici pa umo Abrahamu wakacitira? (Gen. 13:8, 9; Rom. 12:10; Fil. 2:3, 4)

  • Ŵazgani Genesis 18:20-33.

    Kasi kumanya umo Yehova wakacitira na Abrahamu kukutipa wuli nkhongono kuti Yehova na Yesu ŵazamweruzga ŵanthu mwaurunji? (Gen. 18:25, 26; Mat. 25:31-33)

  • Ŵazgani Genesis 19:1-29.

    Kasi lemba ili likulongora kuti Ciuta wakuwona wuli kugonana kwa ŵanalume pera panji ŵanakazi pera? (Gen. 19:5, 13; Lev. 20:13)

    Ni mphambano wuli iyo yilipo umo Abrahamu na Loti ŵakacitira na ulongozgi wa Ciuta, ndipo ise tikutorapo sambiro wuli? (Gen. 19:15, 16, 19, 20; 22:3)

  • Ŵazgani Luka 17:28-32.

    Kasi muwoli wa Loti wakawonanga wuli vinthu vyakuthupi, ndipo ni cenjezgo wuli ilo tikutorapo? (Luka 12:15; 17:31, 32; Mat. 6:19-21, 25)

  • Ŵazgani 2 Petros 2:6-8.

    Kuti tilondezge Loti, kasi ŵanthu awo ŵakuleka kusopa Ciuta tikwenera kuŵawona wuli? (Ezek. 9:4; 1 Yoh. 2:15-17)

Manyani Vinandi

Muwoli wa Loti Wakazgoka Chiduli cha Mchere

Ŵerenga nkhani iyi na kujoyina tumadontho. Kasi ukusambirako vichi kwa muwoli wa Loti?

Loti na Banja Lake—Nkhani mu Vithuzithuzi

Koperani nkhani iyi na kusambira kwa Loti na banja lake.