Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 12: Ŵanthu Ŵakazenga Gongwe Likuru

Nkhani Nambara 12: Ŵanthu Ŵakazenga Gongwe Likuru

Vilimika vinandi vikajumphapo. Ŵana ŵa Nowa ŵakaŵa na ŵana ŵanandi. Ŵana ŵawo ŵakakura ndipo nawoso ŵakaŵa na ŵana ŵanandi. Mwambura kucedwa ŵanthu ŵakandana pa caru.

Yumoza wa ŵanthu aŵa wakaŵa muzukuru civu wa Nowa, zina lake Nimurodi. Wakaŵa munthu muheni uyo wakakomanga nyama na ŵanthu wuwo. Ndiposo, Nimurodi wakajiŵika yekha fumu kuwusa pacanya pa ŵanthu ŵanyake. Ciuta wakamutemwa yayi Nimurodi.

Ŵanthu wose pa nyengo yira ŵakayowoyanga ciyowoyero cimoza. Nimurodi wakakhumbanga kuti ŵanthu wose ŵakhalenge pamoza mwakuti waŵawusenge. Kasi ukumanya ico wakacita? Wakaphalira ŵanthu kuti ŵazenge msumba na gongwe likuru mukati mwake. Wona pa cithuzithuzi apa ŵakuwumba njerwa.

Yehova Ciuta wakakondwa cara na kuzenga uku. Ciuta wakakhumba kuti ŵanthu ŵabalalike na kukhala pa caru cose. Kweni ŵanthu ŵakati: ‘Izani kuno! Tiyeni tijizengere msumba na gongwe litali mupaka ku mtambo. Mwantheura timanyikwenge!’ Ŵanthu ŵakakhumbanga kuti ŵapike nchindi, m’malo mwa Ciuta.

Mwantheura Ciuta wakaŵalekeska ŵanthu kuzenga gongwe. Kasi ukumanya umo wakacitira ici? Wakaŵapangiska kuyowoya viyowoyero vyakupambanapambana, m’malo mwa ciyowoyero cimoza. Ŵanthu ŵakaleka kupulikana yumoza na munyake. Ici ndico cifukwa cake msumba wawo ukacemeka Babele, panji Babulone, kung’anamura “Nthimbanizgo.”

Ŵanthu ŵakayamba kuwukamo mu Babele. Ŵanthu awo ŵakayowoyanga ciyowoyero cimoza ŵakaluta na kukakhala pamoza.

Genesis 10:1, 8-10; 11:1-9.

Ŵanthu ŵakuzgenga gongwe likuru


Mafumbo

  • Kasi Nimurodi wakaŵa njani, ni mwauli umo Ciuta wakamuwonera?
  • Mwakuyana na cithuzithuzi ici, nchifukwa wuli ŵanthu ŵakawumbanga njerwa?
  • Cifukwa wuli Yehova wakakondwa yayi na nchito ya kuzenga iyi?
  • Ni mwauli umo Ciuta wakalekeskera ŵanthu kuzenga gongwe?
  • Kasi zina la msumba uwu likaŵa vici, ndipo zina ili likung’anamuraci?
  • Nchivici cikacitikira ŵanthu apo Ciuta wakatimbanizga ciyowoyero cawo?

Mafumbo ghanyake

  • Ŵazgani Genesis 10:1, 8-10.

    Kasi ni nkharo wuli iyo Nimurodi wakalongora, ndipo tikusambirapo vici lero? (Zinth. 3:31)

  • Ŵazgani Genesis 11:1-9.

    Kasi ni cilato wuli ico ŵakaŵa naco pakuzenga gongwe, nchifukwa wuli nchito yawo yikatondeka? (Gen. 11:4; Zinth. 16:18; Yoh. 5:44)