Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 8: Vinkhara pa Caru

Nkhani Nambara 8: Vinkhara pa Caru

Usange munthu munyake wakwenda, kwiza kunthazi kwako ndipo ni mutali mwakuti wangagota kucanya kwa nyumba yakwako, kasi ungaghanaghana vici? Munthu uyu nchinkhara! Pa nyengo yinyake pakaŵa nadi vinkhara pa caru. Baibolo likulongora kuti ŵadada ŵawo ŵakaŵa ŵangelo ŵa kucanya. Kweni kasi ici cikacitika wuli?

Vinkhara vyakofya

Kumbukira kuti mungelo muheni, Satana, wakasuzganga comene. Iyo wakayezgayezga nanga nkhupangiska ŵangelo ŵa Ciuta kuti ŵaŵe ŵaheni. Mukuluta kwa nyengo, ŵangelo ŵanyake ŵakayamba kupulikira Satana. Ŵakaleka kucita nchito iyo Ciuta wakaŵapa kucanya. Ŵakiza pa caru na kuvwara mathupi gha taŵanthu. Kasi ukumanya cifukwa cake?

Baibolo likuyowoya kuti cikaŵa cifukwa cakuti ŵana ŵa Ciuta aŵa ŵakawona ŵanakazi ŵakutowa pa caru ndipo ŵakakhumbanga kukhala nawo. Mwantheura ŵakiza pa caru na kutora ŵanakazi aŵa. Baibolo likuyowoya kuti ici cikaŵa ciheni, cifukwa Ciuta wakalenga ŵangelo kuti ŵakhalenge kucanya.

Peneapo ŵangelo aŵa na ŵawoli ŵawo ŵakababa ŵana, ŵana aŵa ŵakaŵa ŵakupambana na ŵanthu wose. Pakwamba ŵakwenera kuti ŵakawonekanga ŵakupambana cara. Kweni ŵakakura kuŵa ŵakuru comene ndiposo ŵankhongono comene mupaka ŵakaŵa vinkhara.

Vinkhara ivi vikaŵa viheni. Ndipo cifukwa cakuti vikaŵa vikuru comene na vyankhongono, vikapwetekanga ŵanthu. Vikacicizganga waliyose kuti waŵe muheni nga ndivyo.

Enoki wakafwa, kweni pa nyengo iyo pakaŵa munthu yumoza pa caru uyo wakaŵa muwemi. Zina la munthu uyo likaŵa Nowa. Nyengo zose wakacitanga ivyo Ciuta wakamutuma kuti wacite.

Zuŵa linyake Ciuta wakaphalira Nowa kuti nyengo yakwana yakuti Iye waparanye ŵanthu wose ŵaheni. Kweni Ciuta wakenelanga kuthaska Nowa, mbumba yake na nyama zinandi. Tiye tiwone umo Ciuta wakacitira ici.

Genesis 6:1-8; Yuda 6.



Mafumbo

  • Nchivici cikacitika apo ŵangelo ŵanyake ŵa Ciuta ŵakapulikira Satana?
  • Nchifukwa wuli ŵangelo ŵanyake ŵakaleka nchito yawo kucanya na kwiza pano pa caru?
  • Nchifukwa wuli cikaŵa ciheni kuti ŵangelo ŵize pano pasi na kuvwara mathupi gha ŵanthu?
  • Kasi ŵana ŵa ŵangelo ŵakaŵa ŵakupambana wuli na ŵanthu wose?
  • Nga ni umo mukuwonera pa cithuzithuzi, ni vici ivyo ŵana ŵa ŵangelo ŵakacitanga apo ŵakazgoka vinkhara?
  • Enoki wakati wafwa, kasi ni njani uyo wakaŵa pano pasi, nchifukwa wuli Ciuta wakamutemwa munthu uyu?

Mafumbo ghanyake

  • Ŵazgani Genesis 6:1-8

    Ni mwauli umo lemba la Genesis 6:6 likuvumbulira kuti nkharo yithu yikumukhwaska Yehova? (Sal. 78:40, 41; Zinth. 27:11)

  • Ŵazgani Yuda 6.

    Ni cenjezgo wuli ilo tikutorapo kufuma ku ŵangelo awo ‘ŵakasida malo ghawo’ mu nyengo ya Nowa? (1 Kor. 3:5-9; 2 Pet. 2:4, 9, 10)