Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 7: Mwanalume Wacikanga

Nkhani Nambara 7: Mwanalume Wacikanga
Enoki

Peneapo ŵanthu ŵakayamba kwandana pa caru, ŵanandi ŵa iwo ŵakacitanga vinthu viheni nga ni Kayini. Kweni mwanalume yumoza wakaŵa wakupambana na ŵanyake. Mwanalume uyu wakaŵa Enoki. Enoki wakaŵa mwanalume wacikanga. Ŵanthu wose ŵakacitanga vinthu viheni comene, kweni Enoki wakalutilira kuteŵetera Ciuta.

Kasi ukumanya cifukwa ico ŵanthu mu nyengo yira ŵakacitilanga vinthu viheni vinandi? Aghanaghanira, ninjani uyo wakapangiska Adamu na Heva kuti ŵaleke kupulikira Ciuta na kurya cipasi ico Ciuta wakati ŵaleke kurya? Wakaŵa mungelo muheni. Baibolo likumucema kuti Satana. Ndipo wakuyezgayezga kuti waliyose waŵe muheni.

Unkhungu na kukoma

Zuŵa linyake Yehova Ciuta wakatuma Enoki kuti waphalire ŵanthu uthenga unyake uwo ŵakakhumbanga cara kuwupulika. Uthenga uwu ukaŵa wakuti: ‘Ciuta zuŵa linyake wazamuparanya ŵanthu wose ŵaheni.’ Ŵanthu ŵakwenera kuti ŵakakwiya comene ŵakati ŵapulika ici. Ŵakwenera kuti ŵakayezgayezga kuti ŵamukome Enoki. Mwantheura Enoki wakeneranga kuŵa na cikanga cikuru kuti waphalire ŵanthu ivyo Ciuta wakakhumbanga kucita.

Ciuta wakakhumba yayi kuti Enoki wakhale nyengo yitali pakati pa ŵanthu ŵaheni aŵa. Enoki wakakhala na umoyo vilimika 365 pera. Nchifukwa wuli tikuyowoya kuti “vilimika 365 pera”? Cifukwa nchakuti ŵanthu mu nyengo yila ŵakaŵa na nkhongono comene kuluska sono ndipo ŵakakhalanga nyengo yitali. Mwana musepuka wa Enoki, Metusela, wakakhala vilimika 969!

Ŵanthu ŵakucita viheni

Pamanyuma pakuti Enoki wafwa, ŵanthu ŵakahenipilahenipira. Baibolo likuyowoya kuti ‘cilicose ico ŵakaghanaghananga cikaŵa ciheni pera nyengo zose,’ ndiposo kuti ‘caru cikazura na nkhaza.’

Kasi ukumanya cifukwa cimoza ico pa caru pakaŵira masuzgo ghanandi mu nyengo yira? Cikaŵa cifukwa cakuti Satana wakaŵa na nthowa yiphya yakupusikira ŵanthu kuti ŵacite vinthu viheni. Tisambirenge za ici mu nkhani yakulondezgapo.

Genesis 5:21-24, 27; 6:5; Ŵahebere 11:5; Yuda 14, 15.



Mafumbo

  • Kasi Enoki wakaŵa wakupambana wuli na ŵanyake?
  • Nchifukwa wuli ŵanthu ŵa mu nyengo ya Enoki ŵakacitanga vinthu viheni vinandi?
  • Ni vinthu wuli viheni ivyo ŵakacitanga? (Wonani cithuzithuzi.)
  • Nchifukwa wuli Enoki wakeneranga kuŵa wacikanga?
  • Kasi kale ŵanthu ŵakakhalanga ŵamoyo kwa utali wuli, ndipo Enoki wakakhala wamoyo vilimika vilinga?
  • Nchivici cikacitika apo Enoki wakati wafwa?

Mafumbo ghanyake

  • Ŵazgani Genesis 5:21-24, 27

    Kasi Enoki wakaŵa paubwezi wa mtundu wuli na Yehova? (Gen. 5:24)

    Mwakuyana na Baibolo, kasi ni munthu nju uyo wakakhala wamoyo vilimika vinandi comene, ndipo wakafwa na vilimika vilinga? (Gen. 5:27)

  • Ŵazgani Genesis 6:5.

    Ni mwauli umo vinthu vikahenipira pano pasi apo Enoki wakati wafwa, ndipo lero mukhaliro wuli mbu? (2 Tim. 3:13)

  • Ŵazgani Ŵahebere 11:5.

    Kasi ni ukhaliro wuli wa Enoki uwo ‘ukakondweska Ciuta,’ ndipo nchivici ico cikacitika pamanyuma pake? (Gen. 5:22)

  • Ŵazgani Yuda 14, 15.

    Ni mwauli umo Ŵakhristu lero ŵangalondezgera cikanga ca Enoki para ŵakucenjezga ŵanthu za nkhondo iyo yikwiza ya Haramagedoni? (2 Tim. 4:2; Heb. 13:6)