Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 3: Mwanalume na Mwanakazi Wakwamba

Nkhani Nambara 3: Mwanalume na Mwanakazi Wakwamba

Kasi nchivici ico cikupambana na vinthu vinyake pa cithuzithuzi ici? Ni ŵanthu awo ŵalipo. Iwo ni mwanalume na mwanakazi wakwamba. Kasi ninjani wakaŵalenga? Ni Ciuta. Kasi ukumumanya zina lake? Ni Yehova. Zina la mwanalume ni Adamu, ndipo la mwanakazi ni Heva.

Adamu na Heva mu munda wa Edeni

Umu ndimo Yehova Ciuta wakalengera Adamu. Wakatora dongo na kuwumba thupi laurunji la munthu mwanalume. Pamanyuma pake wakathutira mvuci mu mphuno za munthu, ndipo Adamu wakaŵa wamoyo.

Yehova Ciuta wakaŵa na nchito yakuti Adamu wacite. Wakaphalira Adamu kuthya mazina nyama zakupambanapambana. Adamu wakwenera kuti wakadaŵira nyama kwa nyengo yitali, mwantheura wakapeleka zina lakwenelera ku nyama yiliyose. Peneapo Adamu wakathyanga mazina gha nyama, wakayamba kuwona cinthu cinyake. Kasi ukucimanya cinthu ici?

Nyama zose zikaŵa ziŵiriziŵiri, yanalume na yanakazi. Pakaŵa zovu zanalume na zanakazi, na nkharamu zanalume na zanakazi. Kweni Adamu wakaŵavya mwanakazi. Ndico cifukwa cake Yehova wakapangiska Adamu kugona tulo twakufwa nato, ndipo wakatorako mbambo yake yimoza. Kufuma ku mbambo iyi, Yehova wakalenga mwanakazi uyo wakaŵa muwoli wake.

Mwee, naco nchimwemwe ico Adamu wakaŵa naco pa nyengo iyi! Ndipo aghanaghanira cimwemwe ico Heva wakwenera kuti wakaŵa naco apo wakaŵikika mu munda wakutowa uwu! Sono iwo ŵakeneranga kuŵa na ŵana na kukhala pamoza mwacimwemwe.

Yehova wakakhumbanga kuti Adamu na Heva ŵakhale na umoyo kwamuyirayira. Wakakhumbanga kuti ŵapange caru cose kuŵa cakutowa nga ni munda wa Edeni. Mwee, naco nchimwemwe ico Adamu na Heva ŵakaŵa naco peneapo ŵakaghanaghaniranga za mulimo uwu! Kasi iwe nthena ukakondwa kucitira lumoza nchito ya kupanga caru kuŵa munda wakutowa? Kweni cimwemwe ca Adamu na Heva cikaŵa ca nyengo yitali yayi. Tiye tiwone cifukwa cake.

Salmo 83:18; Genesis 1:26-31; 2:7-25.



Mafumbo

  • Kasi cithuzithuzi ca Nkhani Nambara 3 cikupambana wuli na cithuzithuzi ca Nkhani Nambara 2?
  • Kasi ninjani uyo wakalenga mwanalume wakwamba, ndipo zina lake wakaŵa njani?
  • Kasi ni nchito wuli iyo Ciuta wakapa Adamu?
  • Nchifukwa wuli Ciuta wakapangiska Adamu kugona tulo twakufwa nato?
  • Kasi Adamu na Heva ŵakeneranga kukhala ŵamoyo kwa utali wuli, ndipo Yehova wakakhumbanga kuti ŵagwire nchito wuli?

Mafumbo ghanyake

  • Ŵazgani Salmo 83:18.

    Kasi Ciuta zina lake ninjani, ndipo ni mazaza wuli agho wali nagho pa caru? (Yer. 16:21; Dan. 4:17)

  • Ŵazgani Genesis 1:26-31.

    Nchinthu wuli capadera ico Ciuta wakalenga pa zuŵa la nambara sikisi, ndipo cilengiwa ici cikaŵa cakupambana wuli na nyama? (Gen. 1:26)

    Kasi Yehova wakapeleka vici kwa munthu na nyama? (Gen. 1:30)

  • Ŵazgani Genesis 2:7-25.

    Kasi Adamu wakeneranga kucita vici pambere wandathye nyama mazina? (Gen. 2:19)

    Ni mwauli umo lemba la Genesis 2:24 likutovwilira kumanya umo Yehova wakuwonera nthengwa, kulekana na kupatana? (Mat. 19:4-6, 9)