Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 1: Ciuta Wakamba Kulenga Vinthu

Nkhani Nambara 1: Ciuta Wakamba Kulenga Vinthu

Vinthu vyose viwemi ivyo tili navyo vikufuma kwa Ciuta. Wali kulenga dazi kuti litipenge ungweru nyengo ya muhanya, ndiposo mwezi na nyenyezi kuti vitipenge ungweru nyengo ya usiku. Ndipo Ciuta wali kulenga caru capasi kuti tikhalengemo.

Kweni zuŵa, mwezi, nyenyezi na caru ndivyo Ciuta wakayamba kulenga cara. Kasi mukumanya ico cikayamba kulengeka? Ciuta wakayamba kulenga ŵanthu ŵakuyana na iye. Ŵanthu aŵa tingaŵawona yayi, nga ni umo tikulekera kuwona Ciuta. Mu Baibolo ŵanthu aŵa ŵakucemeka ŵangelo. Ciuta wakalenga ŵangelo kuti ŵakhalenge na iyo kucanya.

Mungelo wakwamba uyo Ciuta wakalenga wakaŵa wapadera comene. Wakaŵa Mwana wakwamba wa Ciuta, ndipo wakagwira nchito lumoza na Ŵadada ŵake. Wakawovwira Ciuta pa kulenga vinthu vyose. Wakawovwira Ciuta kulenga dazi, mwezi, nyenyezi ndiposo caru cithu.

Kasi caru cikaŵa wuli pa nyengo iyo? Pakwamba pakaŵavya uyo wakatenge wakhalenge pa caru. Pakaŵavya cinthu cilicose kweni pakaŵa waka nyanja yikuru pa caru cose. Kweni Ciuta wakakhumbanga kuti ŵanthu ŵakhalenge pa caru. Mwantheura wakayamba kunozga vinthu kuti ise tikhalemo. Kasi wakacitaci?

Cakwamba, caru cikakhumbikwilanga ungweru. Mwantheura Ciuta wakapanga ungweru kufuma ku dazi kuti liŵalenge pa caru. Wakawupanga mwakuti paŵe usiku na muhanya. Pamanyuma pake Ciuta wakapanga mtunda.

Pakwamba, pa caru pakaŵavya cilicose. Caru cikawonekanga nga ni cithuzithuzi ico mukuwona apa. Pakaŵavya maluŵa, makuni panji vinyama. Mukaŵavya somba yiliyose mu nyanja. Ciuta wakaŵa na nchito yikuru yakuti wacite, kuti wapange caru kuŵa malo ghawemi ghakuti ŵanthu ŵakhalengemo pamoza na vinyama.

Yeremiya 10:12; Ŵakolose 1:15-17; Genesis 1:1-10.

Caru cambura kanthu


Mafumbo

  • Kasi vinthu viwemi vyose vili kufuma nkhu, kasi mungayowoya ciyelezgero cimoza?
  • Nchinthu wuli cakwamba ico Ciuta wakalenga?
  • Nchifukwa wuli mungelo wakwamba wakaŵa wapadera?
  • Longosorani umo caru cikaŵira pakwamba. (Wonani cithuzithuzi.)
  • Ni mwauli umo Ciuta wakacitira kuti caru ciŵe malo ghawemi ghakuti vinyama na ŵanthu ŵakhalengemo?

Mafumbo ghanyake

  • Ŵazgani Yeremiya 10:12.

    Ni mikhaliro wuli ya Ciuta iyo yikumanyikwa kwizira mu ivyo wali kulenga? (Yes. 40:26; Rom. 11:33)

  • Ŵazgani Ŵakolose 1:15-17.

    Kasi Yesu wakacitangaci apo vinthu vikalengekanga, ndipo ni mwauli umo tikwenera kumuwonera? (Ŵakolose 1:15-17)

  • Ŵazgani Genesis 1:1-10.

    Kasi caru cili kufuma nkhu? (Gen. 1:1)

    Nchivici cikacitika pa zuŵa lakwamba la kulenga? (Gen. 1:3-5)

    Longosorani ico cikacitika pa zuŵa laciŵiri la kulenga. (Gen. 1:7, 8)