Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 9: Nowa Wakazenga Cingalaŵa

Nkhani Nambara 9: Nowa Wakazenga Cingalaŵa
Ŵanthu ŵakumuseka Nowa

Nowa wakaŵa na mwanakazi na ŵana ŵanalume ŵatatu. Mazina gha ŵana ŵake ghakaŵa Shemu, Hamu, na Yafeti. Waliyose wa ŵana aŵa wakaŵa na mwanakazi. Mwantheura mu mbumba ya Nowa mukaŵa ŵanthu ŵankhondi na ŵatatu.

Pa nyengo iyi Ciuta wakaphalira Nowa kucita cinthu cacilendo. Wakamuphalira kuti wazenge cingalaŵa cikuru. Cingalaŵa ici cikaŵa cikuru nga ni sitima, kweni cikawonekanga nga ni bokosi likuru ndiposo litali. Ciuta wakati: ‘Ciŵe cakudikanya katatu, ndipo uŵike vipinda mukati mwake.’ Vipinda vikaŵa vyakuti wakhalemo Nowa na mbumba yake, na nyama, na kuŵikamo vyakurya.

Ciuta wakaphaliraso Nowa kuti wajare cingalaŵa palipose apo pakaŵa mwanya mwakuti maji ghaleke kunjira. Ciuta wakati: ‘Nditumenge cigumula ca maji na kuparanya caru. Waliyose uyo wali kuwaro kwa cingalaŵa wafwenge.’

Nowa na ŵana ŵake ŵakapulikira Yehova ndipo ŵakayamba kuzenga. Kweni ŵanthu ŵanyake ŵakaŵasekanga waka. Ŵakalutilira kuŵa ŵaheni. Palije uyo wakagomezga apo Nowa wakaŵaphaliranga ivyo Ciuta wakati wacitenge.

Mbumba ya Nowa yikuŵika vinyama na cakurya mu cingalaŵa

Kuzenga cingalaŵa kukatora nyengo yitali cifukwa cikaŵa cikuru comene. Paumaliro pake, pamanyuma pa vilimika vinandi, cingalaŵa cikamara kuzengeka. Ciuta wakaphalira Nowa kuti wanjizge nyama mu cingalaŵa. Ciuta wakati nyama zinyake wazinjizge ziŵiriziŵiri, zanalume na zanakazi. Kweni mitundu yinyake ya nyama, Ciuta wakaphalira Nowa kuti wazinjizge zinkhondi na ziŵiri. Ciuta wakaphaliraso Nowa kuti wanjizge mitundu yose ya viyuni. Nowa wakacita mwakuyana na umo Ciuta wakayowoyera.

Pamanyuma pake, Nowa na mbumba yake nawo ŵakanjira mu cingalaŵa. Ndipo Ciuta wakajara cijaro ca cingalaŵa. Nowa na mbumba yake ŵakalindilira mukati mu cingalaŵa. Aghanaghanira kuti muli mukati mu cingalaŵa, mukulindilira lumoza na iwo. Kasi cigumula cikaŵako nadi nga ni umo Ciuta wakayowoyera?

Genesis 6:9-22; 7:1-9.



Mafumbo

  • Kasi ŵanthu ŵakaŵa ŵalinga mu mbumba ya Nowa? Zunurani mazina gha ŵana ŵatatu ŵa Nowa.
  • Nchinthu wuli cacilendo ico Ciuta wakaphalira Nowa kuti wacite, ndipo cifukwa wuli?
  • Kasi ŵanthu ŵa mu nyengo ya Nowa ŵakacita wuli apo wakaŵaphalira za cingalaŵa?
  • Kasi Ciuta wakaphalira Nowa kuti wacite vici na nyama?
  • Ciuta wakati wajara cijaro ca cingalaŵa, kasi Nowa na mbumba yake ŵakeneranga kucitaci?

Mafumbo ghanyake

  • Ŵazgani Genesis 6:9-22.

    Nchivici cikapangiska Nowa kuŵa musopi wapadera wa Ciuta waunenesko? (Gen. 6:9, 22)

    Kasi Yehova wakuwona wuli ciwawa, ndipo fundo iyi yingatovwilira wuli pakusankha vyakusanguluska? (Gen. 6:11, 12; Sal. 11:5)

    Ni mwauli umo tingalondezgera Nowa para tapokera ulongozgi mu gulu la Yehova? (Gen. 6:22; 1 Yoh. 5:3)

  • Ŵazgani Genesis 7:1-9

    Ni mwauli umo tikukhuŵilizgikira lero na fundo yakuti Yehova wakawona Nowa, munthu uyo wakaŵa wambura kufikapo, kuŵa murunji? (Gen. 7:1; Zinth. 10:16; Yes. 26:7)