Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 4: Cifukwa Ico Ŵakatayira Cikaya Cawo

Nkhani Nambara 4: Cifukwa Ico Ŵakatayira Cikaya Cawo

Wona ico cikucitika sono. Adamu na Heva ŵakufumiskika mu munda wakutowa wa Edeni. Kasi ukumanya cifukwa cake?

Adamu na Heva ŵacimbizgika mu munda wa Edeni

Cifukwa nchakuti ŵakacita cinthu cinyake ciheni comene. Ndico cifukwa Yehova wakuŵalanga. Kasi ukumanya cinthu ciheni ico Adamu na Heva ŵakacita?

Ŵakacita cinthu ico Ciuta wakaŵaphalira kuti ŵaleke kucita. Ciuta wakaŵaphalira kuti ŵaryenge vyakurya kufuma mu makuni gha mu munda. Kweni kufuma mu khuni limoza Ciuta wakati ŵangaryanga cara, cifukwa para ŵacitenge nthena mbwenu ŵakenelanga kufwa. Ili likaŵa khuni lake. Ndipo tikumanya kuti mbuheni kutora cinthu ico ncha munthu munyake, ni nthena yayi? Kasi cikacitika nchivici?

Zuŵa linyake apo Heva wakaŵa yekha mu munda, njoka yikayowoya nayo. Aghanaghanira waka! Yikaphalira Heva kuti warye cipasi ca khuni ilo Ciuta wakaŵaphalira kuti ŵaleke kurya. Yehova wakalenga njoka kuti ziyowoyenge yayi. Ici cikulongora kuti munthu munyake ndiyo wakapangiska njoka kuti yiyowoye. Ninjani wakayowoyanga?

Wakaŵa Adamu yayi. Ipo wakwenera kuŵa yumoza wa ŵanthu awo Yehova wakalenga pambere wandalenge caru capasi. Ŵanthu aŵa ŵakaŵa ŵangelo, ndipo ise tingaŵawona yayi. Mungelo yumoza uyu wakaŵa wakujikuzga comene. Wakayamba kughanaghana za kuŵa muwusi nga ni Ciuta. Ndipo wakakhumbanga kuti ŵanthu ŵapulikirenge iye mu malo mwa Yehova. Ni mungelo uyu uyo wakapangiska njoka kuyowoya.

Mungelo uyu wakamupusika Heva. Apo wakamuphalira kuti waŵenge nga ni Ciuta usange wangarya cipasi, Heva wakagomezga. Mwantheura wakarya, ndipo Adamu nayo wakarya. Adamu na Heva ŵakakana kupulikira Ciuta, ndico cifukwa cake ŵakataya munda wawo wakutowa.

Kweni zuŵa linyake Ciuta wazamuwoneseska kuti caru cose nchakutowa nga ni umo ukaŵira munda wa Edeni. Kunthazi uku tisambirenge umo nase tingacitira nchito ya kupanga caru kuŵa nga ni munda wa Edeni. Kweni pa nyengo yasono, tiye tiwone ico cikacitikira Adamu na Heva.

Genesis 2:16, 17; 3:1-13, 24; Civumbuzi 12:9.



Mafumbo

  • Pa cithuzithuzi apa, nchivici cikucitikira Adamu na Heva?
  • Nchifukwa wuli Yehova wakaŵapa cilango?
  • Kasi njoka yikamuphalira vici Heva?
  • Ninjani wakapangiska njoka kuti yiyowoye na Heva?
  • Nchifukwa wuli Adamu na Heva ŵakata cikaya cawo ca Paradiso?

Mafumbo ghanyake

  • Ŵazgani Genesis 2:16, 17 na 3:1-13, 24.

    Kasi njoka yikapusikizgira wuli Yehova na fumbo ilo yikafumba Heva? (Gen. 3:1-5; 1 Yoh. 5:3)

    Ni mwauli umo kacitiro ka Heva kaliri cenjezgo kwa ise? (Fil. 4:8; Yak. 1:14, 15; 1 Yoh. 2:16)

    Ni mwauli umo Adamu na Heva ŵakakanira kuti ŵandabude? (Gen. 3:12, 13)

    Kasi ŵakerubi awo ŵakaŵikika ku mafumiro gha dazi gha munda wa Edeni ŵakakhozgera wuli muwuso wa Yehova? (Gen. 3:24)

  • Ŵazgani Civumbuzi 12:9.

    Ni mwauli umo Satana wakupatuskira ŵanthu ŵanandi kuti ŵaleke kukhozgera muwuso wa Ciuta? (1 Yohane 5:19)