Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Kasi Baibolo Likusambizgachi Chomenechomene?

 VYAKUSAZGIRAPO

Kasi Sheole na Hadesi Ni Vichi?

Kasi Sheole na Hadesi Ni Vichi?

MU VIYOWOYERO vyakwambilira, mu Baibolo mukaŵanga lizgu la Chihebere lakuti sheole na la Chigiriki lakuti hadesi. Mazgu ghaŵiri agha ghakasangikanga mu Baibolo pa malo ghakujumpha 70. Mazgu ghose ghakuyowoya za nyifwa. Mu Mabaibolo ghanyake, mazgu agha ghali kulembeka kuti “dindi,” “malaro,” “helo,” panji “khululu.” Tiyeni tiwone umo mazgu agha ghali kulembekera mu Mabaibolo ghanyake.

Lemba la Mupharazgi 9:10 likuti: “Pakuti ku Dindi [Sheole] uko ukuluta kulije mulimo, maghanoghano, kumanya, panji vinjeru.” Kasi fundo iyi yikung’anamura kuti sheole ni malo panji malaro ghanadi uko tili kusungako ŵakutemweka ŵithu awo ŵali kufwa? Yayi. Para Baibolo likuyowoya za malaro panji dindi, likugwiliskira ntchito mazgu ghakuti sheole panji hadesi yayi, kweni mazgu ghanyake. (Genizesi 23:7-9; Mateyu 28:1) Kweniso, Baibolo likugwiliskira ntchito mazgu ghakuti “sheole” yayi pakuyowoya za dindi ilo mukusungika ŵanthu ŵa banja limoza panji dindi lakusungamo ŵanthu ŵanandi.—Genizesi 49:30, 31.

Ipo kasi mazgu ghakuti “sheole” ghakung’anamura vichi? Baibolo likutiphalira kuti mazgu ghakuti “Sheole,” panji “Hadesi,” ghakung’anamuraso chinthu chinyake padera pa dindi la ŵanthu ŵanandi. Mwachiyelezgero, lemba la Yesaya 5:14 likulongora kuti Dindi [sheole] “lasanuzgika ndipo lajura mulomo wake pwankhu!” Nangauli dindi lamira kale ŵanthu ŵakufwa ŵanandi, kweni likukhuta yayi. (Zintharika 30:15, 16) Mwakupambana na malaro ghanadi, agho pangasungika ŵanthu ŵachoko waka, ‘Hadesi [Sheole] vikukhuta chara.’ (Zintharika 27:20) Ntheura, Sheole panji kuti Hadesi ni malo ghanadi yayi. Kweni ni dindi la ŵanthu wose ŵakufwa.

Ivyo Baibolo likusambizga pa nkhani ya chiwuka, vikutovwira kuti timanye vinandi vyakukhwaskana na ivyo mazgu ghakuti “Sheole” na “Hadesi” ghakung’anamura.” Baibolo likuyowoya za Sheole na Hadesi, para likuyowoya za nyifwa iyo ŵanthu ŵazamuwuka. * (Yobu 14:13; Milimo 2:31; Chivumbuzi 20:13) Mazgu gha  Chiuta ghakuyowoyaso kuti, mu Sheole panji Hadesi muli awo ŵakateŵetera Yehova pera yayi, kweni muliso ŵanthu ŵanandi awo ŵakamuteŵetera yayi. (Genizesi 37:35; Salimo 55:15) Baibolo likusambizga kuti kuzamuŵa “chiwuka cha ŵarunji na ŵambura urunji wuwo.”—Milimo 24:15.

^ ndime 4 Ŵakufwa awo ŵazamuleka kuwuskika ni awo ŵali “mu Gehena,” kuti ni awo ŵali mu Sheole panji Hadesi yayi. (Mateyu 5:30; 10:28; 23:33) Nga ni umo ghaliri mazgu ghakuti Sheole na Hadesi, Gehena nayo ni malo ghanadi yayi.