Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Kasi Baibolo Likutisambizga Vichi?

 MUTU 12

Kasi Mungachita Wuli Kuti Muŵe Mubwezi wa Chiuta?

Kasi Mungachita Wuli Kuti Muŵe Mubwezi wa Chiuta?

1, 2. Zunurani mazina gha ŵanthu awo ŵakaŵa ŵabwezi ŵa Yehova.

KASI mungatemwa kuŵa paubwezi na munthu wuli? Mungakhumba kuŵa paubwezi na munthu uyo mukumutemwa, uyo vyakuchita vinu na vyake vikuyana ndipo wali na nkharo iyo yikumukondweskani.

2 Yehova Chiuta wakusankha ŵanthu ŵanyake kuti ŵaŵe ŵabwezi ŵake. Mwachiyelezgero, Abrahamu wakaŵa mubwezi wa Yehova. (Yesaya 41:8; Yakobe 2:23) Yehova wakaŵaso paubwezi na Davide. Yehova wakati Davide ni “munthu uyo wakukolerana na mtima” wake. (Milimo 13:22) Ndiposo Daniyeli wakaŵa “wakuzirwa chomene” kwa Yehova.—Daniyeli 9:23.

3. Kasi Abrahamu, Davide, na Daniyeli ŵakachita vichi kuti ŵaŵe ŵabwezi ŵa Yehova?

3 Kasi Abrahamu, Davide na Daniyeli ŵakachita vichi kuti ŵaŵe ŵabwezi ŵa Yehova? Yehova wakaphalira Abrahamu kuti: “Wapulikira mazgu ghane.” (Genizesi 22:18) Yehova wakuŵa paubwezi na ŵanthu awo ŵakumupulikira. Nanga ungaŵa mtundu wose wa ŵanthu ungaŵa nayo paubwezi. Yehova wakaphalira Ŵaisrayeli kuti: “Pulikirani mazgu ghane, ndipo niŵenge Chiuta winu, imwe muŵenge ŵanthu ŵane.” (Yeremiya 7:23) Para namwe mukukhumba kuŵa ŵabwezi ŵa Yehova, mukwenera kumupulikira.

YEHOVA WAKUVIKILIRA ŴABWEZI ŴAKE

4, 5. Kasi Yehova wakulayizga kuti waŵapenge vichi ŵabwezi ŵake kuti waŵavikilire?

4 Baibolo likutiphalira kuti Yehova wakupenjerezga  nthowa kuti “walongore nkhongono zake pa awo mitima yawo njakufikapo kwa iyo.” (2 Midauko 16:9) Pa Salimo 32:8, Yehova wakulayizga ŵabwezi ŵake kuti: “Nikupenge mahara na kukusambizga nthowa iyo ukwenera kwendamo. Nikulongozgenge na jiso lane.”

5 Tili na mulwani munyake wankhongono uyo wakukhumba kuti tileke kuŵa ŵabwezi ŵa Chiuta. Kweni Yehova wakutivikilira. (Ŵerengani Salimo 55:22.) Pakuti tili ŵabwezi ŵa Yehova, tikumuteŵetera na mtima wose. Tikulutilira kugomezgeka kwa iyo nanga nipara tili mu masuzgo. Nase tikumugomezga Yehova nga umo wamasalimo wakachitira. Iyo wakati: “Nkhuŵika Yehova pamaso pane nyengo zose. Pakuti wali ku woko lane lamalyero, nisunkhunyikenge chara.” (Salimo 16:8; 63:8) Kasi Satana wakuchita vichi kuti watitondeske kuŵa paubwezi na Chiuta?

SATANA WAKUNENA ŴANTHU

6. Kasi Satana wakayowoya vichi vyakukhwaskana na ŵanthu?

6 Mu Mutu 11 tikasambira kuti Satana wakanena Yehova kuti ni mutesi kweniso wakuchita makora yayi vinthu, chifukwa cha kuleka kuzomerezga Adamu na Eva kuti ŵajisankhirenge ŵekha chiwemi na chiheni. Baibolo likuti Satana wakunenaso ŵanthu awo ŵakukhumba kuŵa ŵabwezi ŵa Chiuta. Satana wakuti ŵanthu aŵa ŵakuteŵetera Chiuta chifukwa chakuti ŵakumutemwa yayi kweni chifukwa cha ivyo wakuŵapa. Satana wakatiso wangalekeska waliyose kusopa Chiuta. Tiyeni tiwone ivyo tingasambirako kwa Yobu kweniso umo Yehova wakamuvikililira.

7, 8. (a) Kasi Yobu wakaŵa njani wa Yehova? (b) Kasi Satana wakayowoya vichi vyakukhwaskana na Yobu?

7 Kasi Yobu wakaŵa munthu wa mtundu wuli? Wakaŵa munthu muwemi uyo wakaŵako vyaka 3,600 ivyo vyajumpha. Yehova wakati panyengo iyo pa charu chapasi pakaŵavya munthu wakuyana na Yobu. Yobu wakawopanga  chomene Chiuta, ndipo wakatinkhanga viheni. (Yobu 1:8) Yobu wakaŵa nadi mubwezi wa Yehova.

8 Satana wakati Yobu wakuteŵetera Chiuta chifukwa cha kukhumba kuti walyerepo waka. Satana wakati kwa Yehova: “Asi mwamuvikilira na m’panda zingilizge, nyumba yake na vyose ivyo wali navyo? Mwatumbika mulimo wa mawoko ghake, ndipo viŵeto vyake vyandana mu charu. Kweni usange sono munganyoloska woko linu na kukhwaska vyose ivyo wali navyo, wamutukaninge nadi pamaso pinu.”—Yobu 1:10, 11.

9. Kasi Yehova wakamuzomerezga vichi Satana?

9 Satana wakanena Yobu kuti wakuteŵetera Yehova kuti walyerepo. Satana wakatiso wangamulekeska Yobu kuteŵetera Yehova. Kweni Yehova wakakolerana navyo yayi ivyo Satana wakayowoya. Wakamupa mwaŵi Satana kuti wamuyezge Yobu kuti wawone usange wakaŵa mubwezi wake chifukwa chakuti wakumutemwa panji yayi.

IVYO SATANA WAKACHITIRA YOBU

10. Kasi Satana wakamuchitira vichi Yobu? Kasi Yobu wakachita wuli?

10 Chakwamba, Satana wakakoma viŵeto vyose vya Yobu. Pamanyuma, wakakoma ŵantchito ŵanandi ŵa Yobu. Vinthu vyose ivyo Yobu wakaŵa navyo vikamara. Paumaliro, Satana wakakoma ŵana wose 10 ŵa Yobu na chimphepo. Kweni Yobu wakalutilira kugomezgeka kwa Yehova. “Mu vyose ivi, Yobu wakananga yayi nesi kunena Chiuta kuti wachita uheni.”—Yobu 1:12-19, 22.

Yehova wakamutumbika Yobu chifukwa cha kugomezgeka

11. (a) Kasi Satana wakamuchitiraso vichi Yobu? (b) Kasi Yobu wakachita wuli?

11 Satana wakalekera penepapa yayi. Wakati kwa Chiuta: ‘Khwaskani chiwangwa na thupi lake, wamutukaninge nadi pamaso pinu.’ Satana wakapweteka Yobu na nthenda yakuŵinya. (Yobu 2:5, 7) Kweni Yobu wakalutilira nipera  kugomezgeka kwa Yehova. Wakati: “Nitayengepo chara kunyoloka kwane m’paka nifwe!”—Yobu 27:5.

12. Kasi Yobu wakachita vichi kulongora kuti Satana ni mutesi?

12 Yobu wakamanyanga yayi ivyo Satana wakamuyowoyera kweniso chifukwa icho wakasuzgikiranga nthena. Wakaghanaghananga kuti Yehova ndiyo wakupangiska kuti wasuzgikenge. (Yobu 6:4; 16:11-14) Kweni Yobu wakalutilira kugomezgeka kwa Yehova. Apa Yobu wakalongora kuti wakateŵeteranga Chiuta kuti wamulyere yayi. Kweni wakamuteŵeteranga chifukwa chakuti wakamutemwanga. Satana wakamanyikwa kuti ni mutesi.

13. Kasi Yehova wakamuchitira vichi Yobu chifukwa chakuti wakagomezgeka?

13 Nangauli Yobu wakamanyanga yayi ivyo vikachitikanga kuchanya, kweni iyo wakagomezgeka kwa Chiuta ndipo wakalongora kuti Satana ni muheni. Yehova wakamutumbika Yobu chifukwa cha kugomezgeka.—Yobu 42:12-17.

SATANA WAKUNENASO ISE

14, 15. Kasi Satana wakuti ŵanthu wose ŵangaleka kuchita vichi?

14 Tingasambirako kanthu ku ivyo vikachitikira Yobu. Mazuŵa ghano napo, Satana wakutinena kuti tikuteŵetera Yehova kuti timulyere waka. Pa lemba la Yobu 2:4, Satana wakati: “Munthu wapelekenge vyose ivyo wali navyo kuti wawombore umoyo wake.” Pakuyowoya kuti munthu, Satana wakanenanga Yobu pera yayi kweni ŵanthu wose kuti ŵakukhumba waka kumulyera Chiuta. Pamanyuma pakuti Yobu wafwa, Satana wakalutilira kunena Yehova na ŵateŵeti ŵake. Mwachiyelezgero, pa Zintharika 27:11, pakuti: “Mwana wane, uŵe wavinjeru na kukondweska mtima wane, mwakuti nimuzgore uyo wakuninena.”

15 Mungasankha kupulikira Yehova na kuŵa mubwezi wake. Para mwachita nthena mulongorenge kuti Satana ni mutesi. Nangauli mungakhumbikwira kuti musinthe  vinthu vinyake pa umoyo winu kuti muŵe mubwezi wa Chiuta, kweni manyani kuti mwachita chinthu chamahara chomene. Satana wakumunenani kuti mungalutilira yayi kugomezgeka kwa Chiuta para mungakumana na masuzgo. Wakukhumba kutipusika kuti tileke kugomezgeka kwa Chiuta. Kasi wakutipusika wuli?

16. (a) Zunurani nthowa izo Satana wakukhumba kupusikira ŵanthu kuti ŵaleke kuteŵetera Yehova. (b) Kasi imwe mukuwona kuti Satana wangamupusikani wuli kuti muleke kuteŵetera Yehova?

16 Satana wali na nthowa zinandi chomene izo wakukhumba kutipusikira kuti tileke kuŵa ŵabwezi ŵa Chiuta. Nyengo zinyake wakuwukira nga ni “nkhalamu yakuwuluma, wakupenja munthu wakuti wamumilimitizge.”(1 Petrosi 5:8) Mungazizwanga yayi para ŵabwezi na ŵabali ŵinu panji ŵanthu ŵanyake ŵakumukanizgani kusambira Baibolo kweniso kuchita icho ntchiwemi. Mungawona nga ŵamuwukirani. * (Yohane 15:19, 20) Kweniso Satana “wakujizgora nga ni mungelo wa ungweru.” Ndipo wangatipusika kuti tileke kupulikira Yehova. (2 Ŵakorinte 11:14) Nthowa yinyake njakuti Satana wakutipangiska kuti tighanaghanenge kuti ndise ŵambura kwenelera kuteŵetera Chiuta.—Zintharika 24:10.

PULIKIRANI MALANGO GHA YEHOVA

17. Chifukwa wuli tikupulikira Yehova?

17 Para tikupulikira Yehova tikulongora kuti Satana ni mutesi. Kasi ntchivichi chingatovwira kuti tipulikirenge? Baibolo likuti: “Utemwenge Yehova Chiuta wako na mtima wako wose, umoyo wako wose, na nkhongono zako zose.” (Dotoronome 6:5) Tikupulikira Yehova chifukwa chakuti  tikumutemwa. Para tamba kumutemwa chomene Yehova, tichitenge chilichose icho wakutituma. Mpositole Yohane wakalemba kuti: “Ili ni ng’anamuro la kutemwa Chiuta lakuti tisungilire malango ghake ndipo malango ghake ngazito yayi.”—1 Yohane 5:3.

18, 19. (a) Kasi ni vinthu wuli vinyake ivyo Yehova wakuti ni viheni? (b) Kasi tikumanya wuli kuti Yehova wakukhumba yayi kuti tichitenge vinthu ivyo tingatondeka kukwaniska?

18 Kasi ni vinthu wuli vinyake ivyo Yehova wakutiphalira kuti ni viheni? Wonani vinyake mwa vinthu ivi mu bokosi la mutu wakuti “ Tinkhani Ivyo Yehova Wakutinkha.” Pakwamba mungawona nga vinthu ivi ni viheni viŵi yayi. Kweni para mungaŵerenga mavesi gha mu Baibolo agho ghali mu bokosi ili na kughanaghanirapo, muwonenge kuti ntchiwemi kupulikira malango gha Yehova. Kweniso muwonenge kuti pali vinthu vinyake ivyo mukwenera kusintha. Nangauli nyengo zinyake chingaŵa chakusuzga  kusintha vinthu vinyake, kweni para mungasintha, muŵenge na mtende mu mtima kweniso muŵenge ŵakukondwa chifukwa chakuti ndimwe mubwezi wa Chiuta. (Yesaya 48:17, 18) Kasi tikumanya wuli kuti tingasintha vinthu vinyake?

19 Yehova wakutituma kuchita vinthu ivyo tingatondeka kukwaniska yayi. (Dotoronome 30:11-14) Pakuŵa Mubwezi withu, Yehova wakutimanya makora kuluska umo ise tikujimanyira. Wakumanya ivyo tingakwaniska ndiposo ivyo tingatondeka kukwaniska. (Salimo 103:14) Mpositole Paulosi wakalemba kuti: “Chiuta ngwakugomezgeka, ndipo wazomerenge yayi kuti imwe muyezgeke na kutondeka kuzizipizga. Kweni para chiyezgo chiza, wapelekenge nthowa yakumovwirani kuti muzizipizge.” (1 Ŵakorinte 10:13) Tikugomezga kuti nyengo zose Yehova watipenge nkhongono zakuti tichitire icho ntchiwemi. Watipenge “nkhongono zakuluska zakawiro” kuti tizizipizge masuzgo.  (2 Ŵakorinte 4:7) Pamanyuma pakuti Paulosi wawona umo Yehova wakamovwilira kuzizipizga masuzgo, wakayowoya kuti: “Mu vinthu vyose, nkhusanga nkhongono mwa uyo wakunipa nkhongono.”—Ŵafilipi 4:13.

TEMWANI IVYO YEHOVA WAKUTEMWA

20. Kasi tikwenera kuŵa na mikhaliro wuli, ndipo chifukwa wuli?

20 Para tikukhumba kuŵa ŵabwezi ŵa Yehova, tikwenera kuleka kuchita ivyo Yehova wakuti ni viheni, kweni pali vinandi ivyo tikwenera kuchita. (Ŵaroma 12:9) Ŵabwezi ŵa Chiuta ŵakutemwa ivyo iyo wakutemwa. Ivyo Chiuta wakutemwa vikuyowoyeka pa Salimo 15:1-5. (Ŵerengani.) Ŵabwezi ŵa Yehova ŵakuŵa na mikhaliro nga yake. Ŵakuŵa na ‘chitemwa, chimwemwe, mtende, kuzikira, lusungu, uwemi, chipulikano, kuzika, na kujikora.’—Ŵagalatiya 5:22, 23.

21. Kasi tingachita wuli kuti tiŵe na mikhaliro iyo Chiuta wakutemwa?

21 Kasi tingachita wuli kuti tiŵe na mikhaliro yiwemi iyi? Tikwenera kusambira Baibolo nyengo zose kuti timanye ivyo Yehova wakutemwa. (Yesaya 30:20, 21) Para tichitenge nthena, tambenge kumutemwa chomene Yehova, ndipo tiyezgeyezgenge kumupulikira.

22. Kasi Yehova wazamumupani vichi para mukumupulikira?

22 Vinthu ivyo mukwenera kusintha pa umoyo winu tingaviyaniska na kuvura malaya ghakale na kuvwara ghanyuwani. Baibolo likuti “vulani wunthu wakale” ndipo vwarani “wunthu uphya.” (Ŵakolose 3:9, 10) Nangauli ntchipusu yayi kusintha vinthu vinyake na kupulikira Yehova, kweni para tasintha, iyo wakutilayizga kuti wazamutipa “njombe yikuru.” (Salimo 19:11) Pulikirani Yehova, na kulongora kuti Satana ni mutesi. Teŵeterani Yehova chifukwa chakuti mukumutemwa, chifukwa cha ivyo wazamumupani munthazi pera yayi. Ntheura muŵenge mubwezi wa Chiuta.

^ ndime 16 Tileke kughanaghana kuti munthu waliyose uyo wakutikanizga kusambira Baibolo watumika na Satana. Kweni fundo njakuti Satana ni “chiuta wa nyengo iyi,” ndipo “charu chose chikugona mu nkhongono” zake. Tikuzizwa yayi para ŵanthu ŵanyake ŵakutikanizga kuteŵetera Yehova.—2 Ŵakorinte 4:4; 1 Yohane 5:19.