Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Kasi Baibolo Likutisambizga Vichi?

 MUTU 3

Chifukwa Wuli Chiuta Wakalenga Ŵanthu?

Chifukwa Wuli Chiuta Wakalenga Ŵanthu?

1. Chifukwa wuli Chiuta wakalenga ŵanthu?

CHIUTA wakutikhumbira viwemi chomene. Wakalenga mwanalume na mwanakazi wakwamba, Adamu na Eva kuti ŵakhalenge mu munda wakutowa. Khumbo la Chiuta likaŵa lakuti ŵababe ŵana, ŵazgore charu chose kuti chiŵe paradiso, na kupwelelera vinyama.—Genizesi 1:28; 2:8, 9, 15; wonani Mazgu Ghakuumaliro 6.

2. (a) Kasi tikumanya wuli kuti Chiuta wazamuchita ivyo wayowoya? (b) Kasi Baibolo likuti mbanthu wuli awo ŵazamuŵa na umoyo wamuyirayira?

2 Kasi mukughanaghana kuti tingazakakhala nadi mu paradiso? Yehova wakutiphalira kuti: “Nayowoya ndipo nichifiskenge.” (Yesaya 46:9-11; 55:11) Chiuta wazamuchita nadi ivyo wayowoya ndipo palije icho chingamutondeska. Yehova wakuti wali na chifukwa icho wakalengera charu. “Wakachilenga waka yayi.” (Yesaya 45:18) Wakukhumba kuti mu charu mukhalenge ŵanthu. Kasi Chiuta wakukhumba kuti pa charu pakhale ŵanthu wuli? Ndipo kwa utali wuli? Baibolo likuti: “Ŵarunji [panji kuti ŵakupulikira] ŵazamuhara charu chapasi, ndipo ŵazamukhala mwenemumo muyirayira.”Salimo 37:29; Chivumbuzi 21:3, 4.

3. Pakuti ŵanthu ŵakulwara na kufwa, ni mafumbo wuli agho tingafumba?

3 Kweni pasono ŵanthu ŵakulwara na kufwa. Mu malo ghanandi ŵanthu ŵakutimbana na kukomana. Chiuta wakakhumbanga kuti charu chapasi chiŵe nthena yayi. Kasi chikachitika ntchivichi? Chifukwa wuli khumbo la Chiuta lindafiskike? Baibolo lekha ndilo likuzgora mafumbo agha.

 MULWANI WA CHIUTA

4, 5. (a) Kasi ni njani wakayowoya na Eva kwizira mu njoka mu munda wa Edeni? (b) Kasi munthu wakugomezgeka wangaŵa wuli munkhungu?

4 Baibolo likutiphalira kuti Chiuta wali na mulwani, zina lake “Dyabulosi na Satana.” Satana wakagwiliskira ntchito njoka kuti wayowoye na Eva mu munda wa Edeni. (Chivumbuzi 12:9; Genizesi 3:1) Satana wakapangiska njoka kuti yiŵe nga ndiyo yikuyowoya.—Wonani Mazgu Ghakuumaliro 7.

5 Kasi Chiuta ndiyo wakapanga Satana Dyabulosi? Yayi. Mungelo uyo wakaŵa kuchanya apo Chiuta wakalenganga charu chapasi kuti mukhale Adamu na Eva, wakajizgora yekha kuŵa Dyabulosi. (Yobu 38:4, 7) Kasi vikachitika wuli? Kasi munthu wakugomezgeka wangasintha na kuŵa munkhungu? Munthu wakubabika munkhungu yayi. Kweni wangamba kudokera, panji kukhumba chinthu icho ntchake yayi. Wangalutilira kughanaghanira chinthu icho, ndipo khumbo la kuchita viheni lingakura mu mtima mwake. Pamanyuma, para mpata wasangika wangiba. Wajizgora yekha kuŵa munkhungu.—Ŵerengani Yakobe 1:13-15; wonani Mazgu Ghakuumaliro 8.

6. Kasi mungelo wakazgoka wuli mulwani wa Chiuta?

6 Ivi ndivyo Satana Dyabulosi wakachita. Wakapulika apo Yehova wakaphalira Adamu na Eva kuti ŵababe ŵana na ‘kuzuzga charu chapasi.’ (Genizesi 1:27, 28) Panji Satana wakaghanaghana kuti, ‘Ŵanthu wose aŵa mphanyi ŵakusopa ine m’malo mwa Yehova.’ Pakuti wakaghanaghanira chomene fundo iyi, khumbo lakuti vinthu vya Yehova viŵe vyake likakura mu mtima mwake. Satana wakakhumbanga kuti ŵanthu ŵamusopenge iyo. Wakateta na kupusika Eva. (Ŵerengani Genizesi 3:1-5.) Lekani wakazgoka Satana Dyabulosi, na kuŵa mulwani wa Chiuta.

7. (a) Chifukwa wuli Adamu na Eva ŵakafwa? (b) Chifukwa wuli tikuchekura na kufwa?

 7 Adamu na Eva ŵakaleka kupulikira Chiuta ndipo ŵakarya chipambi. (Genizesi 2:17; 3:6) Ŵakamunangira Yehova ndipo pakati pajumpha nyengo, ŵakafwa nga ni umo Yehova wakayowoyera. (Genizesi 3:17-19) Ŵana ŵa Adamu na Eva ŵakaŵa ŵakwananga, ndipo nawo ŵakafwa. (Ŵerengani Ŵaroma 5:12.) Kuti tipulikiske umo ŵana ŵa Adamu na Eva nawo ŵakaŵira ŵakwananga, tiyerezgere nthe: Para mungaphika buledi panji chikondamoyo mu sefuliya yakuthifuka panji kuti yakunjira mukati, buledi panji chikondamoyo chiŵenge chakunjira mukati panji kuti chakuthifuka nga umo sefuliya iyo mwanguphikamo yiliri. Adamu wakaŵa wakwananga wati waleka kupulikira Chiuta. Pakuti tili ŵana ŵa Adamu, tose tili ŵakwananga chifukwa tili kufuma mu “chikomboli” chimoza. Pakuti tose tili ŵakwananga, tikuchekura na kufwa.—Ŵaroma 3:23; wonani Mazgu Ghakuumaliro 9.

8, 9. (a) Kasi Satana wakakhumbanga kuti Adamu na Eva ŵagomezge vichi? (b) Chifukwa wuli Chiuta wakakoma nyengo yeneyiyo yayi ŵanthu awo ŵakamugalukira?

8 Satana wakamba kugalukira Yehova apo wakapusika Adamu na Eva kuti ŵanangire Chiuta. Wakakhumbanga Adamu na Eva ŵagomezge kuti Yehova ni mutesi, ni Fumu yiheni iyo yikuŵakhumbira viwemi yayi. Satana wakati ŵanthu ŵakukhumbikwira kuti Chiuta waŵaphalirenge chakuchita yayi. Adamu na Eva ŵangajisankhira ŵekha icho ntchiwemi na chiheni. Kasi Yehova wakate wachitenge wuli? Wakate wakomenge ŵakugaluka aŵa, ndipo uchigaluka ukatenge umalirenge papo. Kweni kasi wachitenge nthena mphanyi wakazgora utesi wa Satana? Yayi.

9 Yehova wakakoma ŵakugaluka ŵara nyengo yeneyiyo yayi. Wakawona kuti pajumphe dankha nyengo kuti ŵanthu ŵajilamulire ŵekha. Ichi chikawovwira kuti  waliyose wamanye kuti Satana ni mutesi nakuti Yehova wakumanya icho ntchiwemi ku ŵanthu. Tizamusambira mu Mutu 11 chifukwa icho Yehova wakachitira nthena. Kweni kasi mukughanaghana kuti Adamu na Eva ŵakachita makora kupulikira Satana? Kasi chikaŵa chamahara kugomezga Satana na kuleka kupulikira Chiuta? Yehova wakapa  Adamu na Eva chilichose. Wakaŵapa umoyo urunji, malo ghakutowa ghakukhalamo, na ntchito yiwemi iyo ŵakakondwanga nayo. Kweni Satana wakaŵachitirapo kanthu kali kose yayi. Kasi muŵenge imwe mukate muchitenge wuli?

10. Kasi waliyose wali na mwaŵi wa kusankha vichi?

10 Mazuŵa ghano napo, waliyose wali na mwaŵi wa kusankha, ndipo ivyo tikusankha vikukhwaska umoyo withu. Tingasankha kuti Yehova waŵe Fumu yithu na kulongora kuti Satana ni mutesi. Panji tingasankha Satana kuti waŵe fumu yithu. (Salimo 73:28; ŵerengani Zintharika 27:11.) Mbanthu ŵachoko chomene pa charu chapasi awo ŵakupulikira Chiuta. Ni Chiuta yayi wakulamulira charu. Ipo ni njani?

NI NJANI WAKULAMULIRA CHARU CHAPASI?

Usange maufumu nga Satana yayi, kasi wakate wamupenge nadi Yesu?

11, 12. (a) Kasi apo Satana wakapeleka maufumu kwa Yesu, wakalongora kuti nga njani? (b) Ni malemba wuli agho ghakulongora kuti Satana ndiyo wakulamulira charu chapasi?

11 Yesu wakamanya uyo wakulamulira charu chapasi. Nyengo yinyake Satana wakalongora Yesu “maufumu ghose gha pa charu na uchindami wawo.” Pamanyuma, Satana wakaphalira Yesu kuti: “Nikupenge vinthu vyose ivi usange ungajikama na kunisopa.” (Mateyu 4:8, 9; Luka 4:5, 6) Jifumbani kuti, ‘Usange maufumu nga Satana yayi, kasi wakate wamupenge nadi Yesu?’ Yayi. Maufumu ghose nga Satana.

12 Mungajifumba kuti: Kasi Satana wangaŵa wuli fumu ya charu chose chapasi? Asi Yehova Chiuta Wankhongonozose ndiyo wakalenga vyose? (Chivumbuzi 4:11) Enya, ndiyo. Kweni Yesu wakati Satana ni “fumu ya charu ichi.” (Yohane 12:31; 14:30; 16:11) Mpositole Paulosi wakati Satana Dyabulosi ni “chiuta wa nyengo iyi.” (2 Ŵakorinte 4:3, 4) Mpositole Yohane wakalemba kuti: “Charu chose chikugona mu nkhongono za muheni.”—1 Yohane 5:19.

 KASI CHARU CHA SATANA CHIZAMUMARA WULI?

13. Chifukwa wuli tikukhumba charu chiphya?

13 Vinthu vikulutilira kunangika chomene pa charu chapasi. Nkhondo, katangali, upusikizgi, na nkhaza vili palipose. Nanga ŵanthu ŵangayezgayezga wuli, ŵangawuskapo yayi masuzgo ghose pa charu chapasi. Kweni sonosono apa Chiuta wawuskengepo charu chiheni ichi pa nkhondo ya Aramagedoni. Ndipo charu chiphya chizamunjira m’malo mwa charu chiheni ichi.—Chivumbuzi 16:14-16; wonani Mazgu Ghakuumaliro 10.

14. Kasi Chiuta wali kusankha njani kuti waŵe Fumu ya Ufumu wake? Kasi Baibolo likayowoyerathu vichi vya Yesu?

14 Yehova Chiuta wali kusankha Yesu Khristu kuti waŵe Fumu ya boma lake lakuchanya, panji kuti Ufumu wake. Baibolo likayowoyerathu kuti Yesu wazamulamulira nga ni “Karonga wa Mtende” ndipo Ufumu wake uzamumara yayi. (Yesaya 9:6, 7) Yesu wakasambizga ŵasambiri ŵake kuti ŵalombenge Ufumu uwu apo wakati: “Ufumu winu wize. Khumbo linu lichitike pano pasi, nga nkhuchanya.” (Mateyu 6:10) Mu mutu 8, tizamusambira umo Ufumu wa Chiuta uzamuwuskirapo maboma gha pa charu chapasi. (Ŵerengani Daniyeli 2:44.) Pamanyuma, Ufumu wa Chiuta uzamuzgora charu chapasi kuŵa paradiso.—Wonani Mazgu Ghakuumaliro 11.

CHARU CHIPHYA CHILI PAFUPI

15. Kasi “charu chiphya” ni vichi?

15 Baibolo likulayizga kuti: “Kuli machanya ghaphya na charu chapasi chiphya ivyo tikulindilira kuyana na layizgo lake, ndipo mu ivi muzamukhala urunji.” (2 Petrosi 3:13; Yesaya 65:17) Nyengo zinyake para Baibolo likuyowoya za “charu,” likung’anamura ŵanthu awo ŵakukhala mu charu. (Genizesi 11:1) Lekani tingati “charu chiphya” ni ŵanthu wose awo ŵakupulikira Chiuta, ndipo wakuŵatumbika.

16. Kasi Chiuta wazamuŵapa chawanangwa wuli awo ŵazamukhala mu charu chiphya? Kasi tingachita wuli kuti tizakapokere chawanangwa ichi?

 16 Yesu wakalayizga kuti ŵanthu awo ŵazamukhala mu charu chiphya ŵazamuŵa na “umoyo wamuyirayira.” (Mariko 10:30) Kasi tingachita vichi kuti tizakasange umoyo wamuyirayira? Ŵerengani pa Yohane 3:16 na 17:3 kuti musange zgoro. Baibolo likuyowoya umo umoyo uzamuŵira mu Paradiso pa charu chapasi. Tiyeni tiwone.

17, 18. Kasi tikumanya wuli kuti pa charu chapasi pazamuŵa mtende na chivikiliro?

17 Uchigeŵenga, nkhondo, kuswa malango, na nkhaza vizamuŵakoso yayi. Ŵanthu ŵaheni ŵazamuŵaposo yayi pa charu chapasi. (Salimo 37:10, 11) Chiuta wazamulekeska ‘nkhondo pa charu chose chapasi.’ (Salimo 46:9; Yesaya 2:4) Charu chizamuzura na ŵanthu awo ŵakumutemwa Chiuta na kumupulikira. Kuzamuŵa mtende wambura kumara.—Salimo 72:7.

18 Ŵanthu ŵa Yehova ŵazamuŵa ŵakuvikilirika. Mu nyengo yakale, para Ŵaisrayeli ŵapulikira Chiuta, ŵakavikilirikanga. (Levitiko 25: 18, 19) Mu Paradiso, tizamuwopaso chinthu chilichose yayi panji munthu waliyose. Nyengo zose tizamuŵa ŵakuvikilirika.—Ŵerengani Yesaya 32:18; Mika 4:4.

19. Kasi tikumanya wuli kuti mu charu chiphya muzamuŵa vyakurya vinandi?

19 Vyakurya vizamuŵa vinandi. “Muzamuŵa vyakurya vinandi mu charu. Vizamuŵa na pachanya pa mapiri.” (Salimo 72:16) Yehova, ‘Chiuta withu, wazamutitumbika,’ ndipo ‘charu chapasi chizamupambika vipasi vyake.’—Salimo 67:6.

20. Kasi tikumanya wuli kuti charu chose chapasi chizamuŵa paradiso?

20 Charu chose chapasi chizamuŵa paradiso. Ŵanthu  ŵazamuŵa na nyumba zakutowa na minda yiwemi. (Ŵerengani Yesaya 65:21-24; Chivumbuzi 11:18.) Charu chose chizamuŵa chakutowa nga umo ukaŵira munda wa Edeni. Yehova wazamutipa chilichose icho tikukhumba. Pakuyowoya za Yehova, Baibolo likuti: “Mukujura woko linu na kukhorweska chamoyo chose.”—Salimo 145:16.

21. Kasi tikumanya wuli kuti pazamuŵa mtende pakati pa vinyama na ŵanthu?

21 Pazamuŵa mtende pakati pa vinyama na ŵanthu. Vinyama vizamupwetekaso ŵanthu yayi. Ŵana ŵachoko, ŵazamuwopa yayi vinyama ivyo ni vyakofya panyengo yasono.—Ŵerengani Yesaya 11:6-9; 65:25.

22. Kasi Yesu wazamuchita wuli na ŵalwari?

22 Palije uyo wazamulwara. Apo Yesu wakaŵa pa charu chapasi, wakachizga ŵanthu ŵanandi chomene. (Mateyu 9:35; Mariko 1:40-42; Yohane 5:5-9) Kweni pakuti iyo ni Fumu ya Ufumu wa Chiuta, Yesu wazamuchizga munthu waliyose. Pazamuŵavya munthu uyo wazamuti: “Nalwara.”—Yesaya 33:24; 35:5, 6.

23. Kasi Chiuta wazamuchita wuli na awo ŵali kufwa?

23 Ŵakufwa ŵazamuŵaso ŵamoyo. Chiuta walayizga kuti wazamuwuska ŵanthu ŵanandi chomene awo ŵali kufwa. “Kuzamuŵa chiwuka cha ŵarunji na ŵambura urunji.”—Ŵerengani Yohane 5:28, 29; Milimo 24:15.

24. Kasi mukujipulika wuli kuzakakhala na umoyo mu Paradiso?

24 Tose tili na mwaŵi wa kusankha. Tingasankha kusambira za Yehova na kumuteŵetera, panji kuchita chilichose icho tingasankha. Para tasankha kuteŵetera Yehova, tizamuŵa na umoyo uwemi kunthazi. Apo munthu wakapempha Yesu kuti wazakamukumbukire para wafwa, Yesu wakamulayizga kuti: “Uzamuŵa na ine mu Paradiso.” (Luka 23:43) Mu mutu 4 tizamusambira vinandi vya Yesu Khristu na umo wazamufiskira vinthu ivyo Chiuta walayizga.