Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova 2016

Canada: Muzi wa Inuit ku Kangirsuk, kumwera kwa Quebec

 VINTHU VYAKUKONDWESKA MU 2015

Malipoti—Nkhani Zakufuma mu Vyaru Vyakupambanapambana

Malipoti—Nkhani Zakufuma mu Vyaru Vyakupambanapambana

Kuti Waliyose ku Canada Wapulike mu Chiyowoyero Chake

Pasono vidiyo yakuti Chifukwa Wuli Mukwenera Kusambira Baibolo? yili kung’anamulika mu viyowoyero 8 vya ku Canada kuti yiwovwire ŵanthu mu charu ichi. Mu nyengo ya upharazgi wapadera wa mazuŵa 10 ku Nunavik Arctic uwo ukaŵako mu Okutobala 2014, ŵabali ŵakawoneska vidiyo iyi ku Inuktitut. Pafupifupi nyumba yiliyose mu vigaŵa vyakukwana 14, ivyo vili na ŵanthu ŵakujumpha 12,000 ŵakawonelera vidiyo iyi.

Manejara Wakakondwa Chomene

Mu Seputembala 2014, ungano wa mitundu yose mu tawuni ya Seoul ukachitikira mu Sitediyamu ya Sangam, ku  South Korea. Ŵanthu ŵakujumpha 56, 000 ŵakiza pa ungano uwu. Manejara wa sitediyamu iyi, wakawonga chomene Ŵakaboni ŵa Yehova chifukwa pa nyengo ya ungano ŵakaŵa na nkharo yiwemi kweniso ŵakaŵa ŵakukolerana. Iyo wakati: “Waliyose wakaŵa na nkharo yiwemi. Nkhazizwa chomene kuwona Ŵakaboni ŵakutozga makora chomene sitediyamu kujumpha ŵantchito ŵithu. Vingaŵa makora chomene usange ŵantchito ŵithu ŵangaŵa na mtima wanthena pakugwira ntchito. Para tikukhumba kuti tisopenge makora, tikwenera kuchita nga Mbakaboni ŵa Yehova.”

South Korea: Ungano wa mitundu yose ku Seoul mu 2014

Yehova Wakatisambizga Ivyo Vikakhumbikanga

Mu 2012, boma la Sweden likakana kuti Ŵakaboni ŵa Yehova nawo ŵapokengeko vinthu ivyo boma likupeleka  ku visopa vyose. Wupu Wakulongozga ukazomerezga kuti nkhani iyi yilute ku Khoti Likuru la mu charu ichi.

Khoti likaŵachema dankha ŵabali kuti ŵayowoye dandaulo lawo maso na maso. Ŵabali ŵanandi ŵakufuma mu vyaru vyakupambanapambana ŵakakumana pamoza kuti ŵadumbiskane umo ŵangakazgolera mafumbo agho ŵangakafumbika. Ŵakanozgekeranga mu Nyumba ya Ufumu ku Stockholm.

Apo ŵakanozgekeranga, ŵakapulika kugogoda pa chijaro. Mubali wakati wajurako, wakasanga kuti mbasungwana ŵaŵiri ŵa vyaka vya m’ma 13 na 14. Iwo ŵakati ŵakukhumba kufumba vinthu vinyake vyakukhwaskana na Ŵakaboni ŵa Yehova. Mubali wakati: “Nkhakhumbanga kuŵaphalira kuti ŵize zuŵa linyake, chifukwa tikaŵa ŵakutangwanika chomene. Tikaŵavya nyengo yakudumbiskirana nawo.”

Kweni mubali wakawona kuti wadumbiskane waka nawo. Ŵasungwana aŵa ŵakaŵa na mafumbo ghanandi chomene. Ghanyake ghakaŵa ghakukhwaskana na kuvota na nkhani zinyake. Mubali wati waŵazgora, wakawelera mu Nyumba ya Ufumu na kuphalira ŵabali ŵanyake mafumbo agho ŵasungwana ŵangufumba na umo waŵazgolera.

Zuŵa lakulondezgapo, ŵabali ŵakazizwa chomene pa nyengo iyo khoti likapulikizganga madandaulo ghawo chifukwa mafumbo ghanandi agho ŵakafumbika ni agho ŵasungwana ŵara ŵakafumba. Mubali uyo wakayimira gulu pa mulandu uwu, wakati: “Mtima ukaŵa m’malo nangauli nkhatenge niŵenge na wofi chifukwa nkhimilira pamaso pa maloya ghakumanyikwa chomene mu charu. Kweni nkhawona kuti Yehova wakalongora kale kuti wali nase chifukwa mayiro ghake wakatisambizga ivyo vikakhumbikanga.”

Khoti likaŵa ku chigaŵa chithu, ndipo mulandu ŵakawuwezgeraso ku boma kuti ligamuleso makora.

 Thumba la Mpunga Ilo Ken Wakagura

Ken wakukhala ku Haiti, ndipo wali na vyaka 6. Wakakondwa chomene wati wapulika kuti mpingo wawo uŵenge na Nyumba ya Ufumu yiphya. Wakaghanaghana kuti wapange kabokosi kakuti waŵikengemo ndalama na kukabisa ku chipinda chake. M’malo mwakuti walyere ku sukulu ndalama iyo ŵapapi ŵake ŵakamupanga, wakaŵikanga mu kabokosi kake. Wakachita ivi m’paka apo gulu lakuzenga Nyumba ya Ufumu likizira kuzakamba ntchito. Ŵabali aŵa ŵati ŵiza, wakaŵapa kabokosi kake umo mukaŵa ndalama zakukwana kugulira thumba likuru la mpunga. Mpunga uwo wakagura Ken, ŵabali ŵakaryanga namuhanya kwa mazuŵa ghanandi.

Mulara wa Ŵasilikari Wakazomerezga

Mu 2015, ŵabali ŵakeneranga kutora vikalata ku boma vyakuŵazomerezga kuti ŵalute mu vigaŵa vinyake vya ku Sierra Leone uko kukaŵa nthenda ya Ebola. Mwachiyelezgero, ŵalaŵiliri ŵa dera ŵakeneranga kuŵa na baji na vikalata vya pa msewu kuti ŵakafike ku malo agha. Ndimo vikaŵiraso kwa ŵabali awo ŵakunyamura mabuku na makalata. Awo ŵakaŵa mu Komiti Yakovwira pa Nyengo ya Suzgo, ŵakeneranga kuŵa na munkhwala wakukoma majeremusi, vyakupimira ŵalwari, na chakurya. Ntchakukondweska kuti nyengo zose boma likaŵapanga vikalata vyakuŵazomerezga kuti ŵakafike.

Pakachitika chinthu chinyake chakukhozga chomene. Ŵabali ŵakalemba kalata yakupempha mabaji 34 na vikalata 11 vyakwendera pa msewu, kweni ŵakeneranga kukumana na mulara wa ŵasilikari kuti wazomerezge. Ŵabali ŵaŵiri ŵakufuma ku ofesi ya munthavi ŵakakumana na mulara wa ŵasilikari pa zuŵa ilo ŵakaghanaghananga kuti ŵamutora mabaji na vikalata. Kweni mwasoka kalata yakupempha vinthu ivi iyo ŵakatumizga yikasoŵa. Ntheura ŵabali ŵakapempheka kuti ŵapenje ŵekha kalata yawo pa mafayelo agho ghakaŵa mu ofesi ya mulara wa ŵasilikari. Kweni  ŵakayisanga yayi. Pamanyuma mulara wa ŵasilikari wakaphalira sekeretare wake kuti wakukhumba kujara ofesi yake ndipo wawonengeso makalata yayi m’paka pajumphe masabata ghaŵiri. Ŵabali ŵakapemphera chamumtima kwa Yehova kuti waŵawovwire pa nkhani iyi. Mulara wa ŵasilikari wakalaŵiska ŵabali na kuŵafumba kuti, “Kasi mukukhumba mabaji na vikalata vilinga?” Ŵabali ŵati ŵamuphalira unandi wa ivyo ŵakukhumba, wakanyamuka pa mpando wake na kuyowoya mwaukali kuti, “Ivyo ni vinandi chomene.”

Ŵabali ŵakamulongosolera ivyo tikuchita ndiposo umo vikawovwiliranga pa nyengo ya Ebola. Mulara wa ŵasilikari wakati dankha lwii, na kulaŵiska sekeretare wake, ndipo wakati, “Ŵapani chilichose icho ŵakukhumba.”

Guinea and Sierra Leone: Ŵakanozga ndondomeko yakuti pa Nyumba za Ufumu zose paŵenge maji ghawemi ghakugeza mu mawoko