Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova 2016

Kalata Yakufuma ku Wupu Wakulongozga

Kalata Yakufuma ku Wupu Wakulongozga

Ŵabali na ŵadumbu ŵakutemweka:

Ntchimi Yesaya yikamanyanga kuti vinthu vikayendanga makora mu Ufumu wa Yuda chifukwa chakuti Yehova wakawutumbikanga. Pa Yesaya 26:12, iyo wakati: “A Yehova, . . . chilichose icho tachita, ndimwe mwatichitira.” Nase tikuyowoya mazgu ghanthena agha para taghanaghanira vinthu vyakukondweska ivyo vikachitika chaka chamara cha uteŵeti. Yehova wakuchita nadi “vyakuzizwiska . . . vyakuti vindachitikepo” nakale. (Eks. 34:10) Ghanaghanirani waka vinthu vyose ivyo Yehova watipa.

Webusayiti yithu ya jw.org, yikuchita vikuru chomene. Pasono webusayiti iyi yili mu viyowoyero vyakujumpha 600 ndipo ŵanthu ŵangaŵerenga panji kukopera mabuku mu viyowoyero vyakujumpha 750. Kasi webusayiti iyi yikovwira nadi ŵanthu ŵa mitima yiwemi kuti ŵasambire unenesko? Wonani chiyelezgero ichi: Ŵakutorana ŵanyake ŵakakhuŵara na chisopa chifukwa cha upusikizgi uwo ŵakawonanga mu visopa. Chifukwa cha kukhumba kumanya Chiuta, ŵakamba kupenja unenesko ndipo ŵakabowozga webusayiti yithu. Kufuma waka apo ŵakayibowozgera, nyengo zose ŵakajuranga na kuŵerenga mabuku ghithu ndiposo kuwonelera mavidiyo. Kweniso ŵakakopela kabuku ka Kusanda Malemba Zuŵa na Zuŵa ndipo ŵakamba kusambira lemba la zuŵa pamoza na ŵana ŵawo ŵaŵiri. Apo Ŵakaboni ŵakiza pa nyumba  yawo, iwo ŵakaŵa kuti ŵakuchita lemba la zuŵa. Ŵakaboni ŵakapulika kuti banja ili likasintha vinthu vinandi chomene chifukwa cha kusambira mabuku ghithu pa webusayiti. Ŵakasisita vinthu ivyo ŵakajilemba mu thupi, ŵakaleka vya kujidoloradolora, ŵakataya vikozgo vyawo, ndipo ŵakaleka kukondwelera maholide ghawakawaka. Kweniso ŵakaleka kuwonelera mafilimu ghaheni. Ŵakachita vyose ivi pambere Ŵakaboni ŵandize kuzakaŵapharazgira. Apo nkhani iyi yikalembekanga, ŵakutorana aŵa na mwana wawo ŵakaŵa kuti mbapharazgi ŵambura kubatizika ndipo ŵakunozgekera kubatizika sonosono.

Tapokera makalata ghanandi kufuma ku ŵabali gha kuwonga TV yithu ya JW Broadcasting. Mapulogiramu gha pa TV iyi sono ghali mu viyowoyero vyakujumpha 70, ndipo chiŵelengero chikurenge sonosono. Mabanja ghanandi ghakuwonelera mapulogiramu agha panyengo yawo ya Kusopa kwa Mbumba. Mubali munyake wakati: “Sono gulu la Yehova ndikuru chomene, kweni sono ndipo tili pafupi chomene na Likuru lithu.”

Nyengo zose ŵanthu ŵa Yehova ŵakukondwa chomene na maungano gha chigaŵa. Maungano gha chaka cha uteŵeti cha 2015 nagho ghakanozga chomene. Pa ungano uwu pakaŵa mavidiyo 42 na vithuzithuzi. Pakaŵaso sumu ziphya 6. Pakwamba chigaŵa chilichose pakaŵanga sumu yimoza. Pakuyowoya za ungano uwu, mubali munyake uyo wateŵetera nyengo yitali wakati: “Apo ungano ukaŵa mukati, waliyose wakakhumbanga yayi kuwuka apo wakhala chifukwa chakopa kuti vinthu vinyake vingamupamba.” Pakuyowoya za ungano wa chaka chamara, mishonale munyake wakati: “Mavidiyo agho ghakaŵa pa ungano uwu ghakanovwira kuti niwonenge kuti unenesko na Ufumu wa Yehova ni vinthu vyanadi.”

 Chaka chamara, Yehova wakatitumbikaso mu nthowa yinyake. Wakatipa sumu ziphya za Ufumu. Ŵakutorana ŵanyake ŵakalemba kuti: “Yehova wakutipembuzga chomene na sumu izi. Zikutisanguluska chomene para vinthu vyatifyenya.” Maungano ghithu gha chigaŵa ghakatikumbuska kuti gulu ilo likwimba sumu zithu za Ufumu likujipeleka chomene kuti ise tipindure. Likuchita vyose ivi kuti Yehova walumbike.

Tikumuchiskani mose kuti muŵapokelerenge na mawoko ghaŵiri ŵanthu awo ŵakuwelera ku gulu la Yehova. Para muchitenge nthena ndikuti mukuyezga Yehova

Kasi mpingo winu ukupharazga na mashelufu gha matayala ku malo uko kukusangika ŵanthu ŵanandi? Upharazgi uwu wawoneka kuti ngwakovwira chomene. Ŵanthu awo ŵakukhala mu nyumba izo ŵanthu ŵakuyako bweka yayi panji uko chivikiliro ntchikuru, ŵakupulika unenesko. Chifukwa cha upharazgi uwu, ŵanthu ŵanandi ŵakovwirika mwauzimu, kusazgapo ŵakulopwa. Mu Janyuwale 2015, mwanalume munyake wa ku South Korea wakiza pa shelufu ya matayala. Wakati sono wali kwamba kughanaghanirapo chomene pa vinthu vyauzimu. Ŵakaboni ŵakamba kusambira nayo Baibolo. Mu Febuluwale, wakaluta ku maungano kakwamba, ndipo mu Malichi wakaleka kukhweŵa hona. Mu Epulero, wakaluta kukawona ofesi ya munthavi ku South Korea, ndipo pasono wakuluta panthazi mwauzimu. Ichi ntchimoza waka mwa vinthu vyakukondweska ivyo tapokera kuno ku Likuru la Ŵakaboni ŵa Yehova.

Tikulomba kuti kabuku ako tikapokera pa ungano wa chigaŵa kawovwire ŵanthu ŵanandi awo ŵali kulopwa kuti ŵawelere kwa Yehova pambere umaliro undize. Tikumuchiskani mose kuti muŵapokelerenge na mawoko ghaŵiri ŵanthu awo ŵakuwelera ku gulu la Yehova. Para muchitenge nthena ndikuti mukuyezga Yehova.—Ezek. 34:16.

 Yehova wakatumbika nadi ŵanthu ŵake chaka chamara cha uteŵeti. Kasi tikwenera kulindiliraso vichi? Tiyeni tilindilire. Manyani kuti ise ŵa mu Wupu Wakulongozga tikumutemwani chomene mose ndipo nyengo zose tikumulomberani.

Tikumukhumbirani viwemi vyose,

Ndise ŵabali ŵinu,

Wupu Wakulongozga wa Ŵakaboni ŵa Yehova