Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova 2016

 INDONESIA

Tikasanganaso

Yikayowoyeka na Linda na Sally Ong

Tikasanganaso

Linda wakati: Apo nkhaŵa na vyaka 12, amama ŵakaniphalira kuti nkhaŵa na munung’una wane uyo ŵakamupeleka ku ŵanthu ŵanyake kuti ŵamulerenge. Nkhajifumbanga usange nayo wali kubabika wakumangwa makutu nga ndine. Kweni nkhakura kwambura kumumanya.

Sally wakati: Nkhamanyanga yayi kuti awo ŵakanileranga ŵakaŵa ŵapapi ŵane yayi. Iwo ŵakanitchayanga chomene ndipo ŵakanitoranga nga ndine muzga. Nkhakura wachitima chomene kweniso nkhaŵa na phukwa. Pakuti nkhaŵa wakumangwa makutu, ivi vikasazgirangako waka masuzgo. Nyengo yinyake nkhakumana na Ŵakaboni ŵa Yehova ndipo nkhamba kusambira Baibolo. Amama awo ŵakanileranga ŵati ŵamanya kuti nkhusambira Baibolo, ŵakanitchaya na lamba. Kweniso ŵakasintha maloko gha vijaro na kunijalira mu nyumba kuti nileke kufuma. Apo nkhaŵa na vyaka 20,  nkhachimbira pa nyumba ndipo nkhamba kukhala na Ŵakaboni. Kukwambilira kwa 2012, nkhabatizika.

Linda wakati: Apo nkhaŵa na vyaka 20, nkhamba kusambira Baibolo na Ŵakaboni ŵa Yehova. Nkhamba kuluta ku maungano gha chigaŵa ku Jakarta, chifukwa nkhani zikang’anamulikanga kuya mu chiyowoyero cha mawoko. Ku maungano agha nkhakumananga na ŵanyane ŵanandi ŵakumangwa makutu, kusazgapo Sally uyo wakaŵa Kaboni wa ku North Sumatra. Nkhamba kuzgoŵerana chomene na Sally, kweni nkhamanyanga yayi chifukwa chake.

Sally wakati: Tikamba kutemwana chomene na Linda. Nkhawonanga kuti tikukozgana, kweni nkhaghanaghanirangapo chomene yayi.

Linda wakati: Mu Ogasiti 2012, zuŵa lakuti machero ghake nibatizikenge, nkhaŵa na chitima chomene chifukwa nkhakhumbanga kuti nimuwone munung’una wane. Nkhapempha Yehova kuti: “Chonde mphanyi mwanovwira kuti nisange munung’una wane chifukwa nkhukhumba kuti nimuphalire vya imwe.” Nkhati nalomba waka, mwamabuchi amama ŵakapokera meseji kufuma kwa munthu uyo wakamanyanga uko kuli munung’una wane. Kufuma nyengo iyi pakachitika vinthu vinandi ivyo vikawovwira kuti nisangane na Sally.

Sally wakati: Linda wati wanilongosolera kuti ndine munung’una wake uyo wakasoŵa, nkhakwera ndege mwaluŵiro na kuluta ku Jakarta kuti tikawonane. Nkhati nafika pa chiŵanja cha ndege nkhasanga Linda wali na adada, amama, na mukuru wane munyake ŵakunilindilira. Nkhakondwa chomene uku nkhunjenjemera. Tose tikavumbatirana na kufyofyonthana. Amama ndiwo ŵakanivumbatira nyengo yitali. Waliyose wakaliranga. Apo amama na adada ŵakaniphepiskanga kuti ŵakanipeleka ku ŵanthu ŵanyake kuti ŵanilerenge, tose tikambaso kulira na kuvumbatirana.

Linda wakati: Chifukwa chakuti tikalereka mwakupambana, tikeneranga kumanyana na kuzizipizgirana. Kweni tose tikutemwana chomene.

Sally wakati: Pasono tikukhala lumoza na Linda ndipo tikuwungana lumoza ku mpingo wa Chiyowoyero cha Mawoko ku Jakarta.

Linda wakati: Tikalekana na Sally kwa vyaka vyakujumpha 20. Tikuwonga chomene Yehova kuti paumaliro tikasanganaso.