Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova 2016

 INDONESIA

Nkhapona ku Chiŵembu cha Chipani

Ronald Jacka

Nkhapona ku Chiŵembu cha Chipani
  • WAKABABIKA MU 1928

  • WAKABATIZIKA MU 1941

  • MBIRI YAKE Wakateŵeterapo nga muteŵeti wa ofesi ya munthavi ya Indonesia vyaka vyakujumpha 25.

MULENJI wa Okutobala 1, 1965, gulu lakukolerana na chipani cha Indonesian Communist Party (PKI) likakhumba kupoka boma, ndipo likakoma ŵalara ŵa ŵasilikari 6. Nyengo yeneyiyo, boma likamba kulimbana na vigeŵenga. Charu chikanunkha, ndipo ŵanthu pafupifupi 500,000 awo ŵakaŵaghanaghaniranga kuti ŵali mu chipani chakulimbana na boma ichi ŵakakomeka.

Pakati pajumpha sabata zinandiko, vigeŵenga vikati vyatondeka kupoka boma, mulara wa ŵasilikari wakaniphalira kuti ŵa chipani cha Chikomyunizimu ŵakukhumba kumalana na ŵalongozgi ŵa visopa, ndipo wakwamba nkhaŵa ine. Wakaniphaliraso kuti usange nkhukhumba kupanikizga, tilute wakanilongore dindi ilo ŵakajima kuti ŵanisungemo, kweni nkhakana kuyako. Nyengo iyo, vinthu vikaŵa makora yayi, ndipo nkhakhumba yayi kuti ŵanthu ŵaniwonenge kuti nkhwenda nayo. Mphanyi ŵakamba kuwona nga namba kunjilirapo pa vya charu.